2 Samueli 19
19
1Waan Yoabuni jed'ani, Hayyichi ilma isaa Absalomu jed'e aka hama laalefate bohu jira. 2Tanaafi dabsachaani worri nyaapa dabsate guyya suni garagalte boha askarti Daudi ch'ufati tate; wonti akanatiifi askartini guyya suni hayyichi ilma ufiti bohu jira, d'ageete. 3Worri ch'allise dirati dachae, aka askarti nyaapa baqate ch'eeraani galte. 4Hayyichi mata hagogate faarse bohe waan jed'e, Ee ilma kiyya! Absalomuni ilma kiyya! Ilma kiyya Absalomuni!
5Yoabuni mana hayyicha d'aqe waan jed'eeni, Atini arra askarti tante yayu ch'eersite, nama lubbu tanteetifi ta ilmaani teeti ta d'iiratifi ta dubraatifi, nad'eeni tanteetifi gaarayoota tantele baase. 6Atini nama si jibbu jaalate nama si jaalatu jibbita! Wonti atini arra taate kunini aka atini askartifi worra gugurda isiile womatu indarre garsiifti. Wonti anini arge kana — aka sila nuni ch'ufti hobaane Absalomuni jiraatu feeta. 7Amma beeni, worra kanke garaa jabeesi, anini maqa AABBO Waaqatini kakhad'a yo atini akasi intolchini bori askartini tunini nami tokoleeni si bira ineju. Tunini badi guddo toko, ta siti d'uftu, ta atini haguma d'alatte taka inargini. 8Jennaani hayyichi kae d'aqe fullo dira d'aatu tae. Jennaani askartini isaa aka inni achi jiru d'ageennaani ch'ufti fulla isaa d'ufte.
Aka Daudini Yerusalemuti deebie
Ato wonti kunini ch'ufti tau jirtu worri Israeli baqate worra ufiti dachae. 9Gochiti Israeli fulla ch'ufati aka hama wold'abde, duuba worri waan woliini jed'e, Hayyu Daudini nyaapa keenna duraa nu baase, harka worra Filistile jalaa nu baase, ammo amma inni yayu Absalomu duraa baqate lafa keesaa bahe. 10Nu Absalomu qara aka hayyu keenna muunne, ammo amma ya woraana keesati isa ijeesani. Isani maanifi nami tokoleeni aka Daudi deebisu indubbanne?
11Dubbini worri Israeli jed'e suni Daudi geennaani inni jara qaalole kaani, Sadokifi Abiathari, gara jaarole Yuda erge, Isani aka hayyu mana isati galchani maanifi eege aantani? Jed'e gaafate. 12Nu woli fiit'a, foonumafi d'iiga, isani maanifi deebisa tiyya eege aantani? 13Ammalle Daudini waan worraani jed'e, Waan isani Amasaani jettani, Atini fiit'a tiyya, armaa achi anini gudda askarti tiyya si tolcha fulla Yoabu. Yo anini iraa oole, Waaqi na ijeesinna. 14Dubbini isaa tunini worra Yuda ch'ufa garaa seente, worri qonqo isati erge waan jed'e, siifi jari kanke ch'ufti gala.
15Ato deebiu jiru, hayyuuni worra Yuda ka Gilgali, isa taakisiisu d'ufe galaana Yordaniti wolwoldaani. 16#2 Sam 16.5-13 Ammalle Shimeini ilmi Gera, ka gosa Benjamini, ka Bahurimu bahe, utaale hayyu Daudi argu d'ufe. 17Inni nama kuma toko ka gosa Benjaminitini woliini yaani, Sibaleni, ka hojattu worra Saulo, ilmaani isaa kud'ani shanifi hojatu isaa nama diddamatini d'ufe hayyu durati galaana Yordanitini bahani. 18Worri galaana taake aka jara hayyu gegeese waan hayyuuni fed'u ch'ufa tolchufi.
Aka Daudini Shimei naasu agarsiise
Ato hayyuuni kurfefate galaana taaku jiru, Shimeini isa durati lafa d'ae, 19waan jed'eeni, Hayyicha, waan hamtu anini gaafa atini Yerusalemu baate si tolche ch'ufa biraa naa deemi, waan ch'ufa ded'i, deebite qalbi keesa naa inkeyaatini. 20Aabbo anini imbeekha ya siti dabe, tanaafi anini gosa gara mirga jirtu keesa nama ch'ufa durati si arga d'ufe, ee hayyicha. 21Jennaani Abashaini, ilmi Seruya waan jed'e, Shimeini duu male waan inni nama AABBO Waaqi fohate muude abaareefi.
22Ammo Daudini Abashaifi oboleesa isaa Yoabuni waan jed'e, Eenuti dubbi tana isaniini gahe, ilmaani Seruya? Isani na d'ibu feetani, hayyuuni Israeli amma anuma, nama Israeli tokole arra inijeesani. 23Duuba inni Shimeiti kakhate waan jed'eeni, Atini indootu.
Aka Daudini Mefiboshethi nahe
24 #
2 Sam 9.1-13; 16.1-4 Jennaani Mefiboshethini, akhaakhuni Saulo, hayyu argu d'ufe. Inni haguma hayyuuni Yerusalemuu deeme, taka miila d'iqate areeda haadate woyale imich'anne, haga hayyuuni nagayaani galuti. 25Mefiboshethini Yerusalemu bahe, hayyu fuula keesa d'umnaani hayyuuni waan jed'eeni, Mefiboshethi, atini maanifi na gula indeemini?
26Inni waan jed'eeni, Ee hayyicha, atini imbeeta, anini miila inqabu. Ee hayyicha, Anini hojattu tiyyaani, hare na fahi, hayyu gula deema jennaani inni na balleese, 27gara kanke d'aqe hamtu tiyya siti haasae, ammo atini malaika Waaqa fakaatta, waan atini feetu tolchi. 28Worra abba kiyya ch'ufa sila hobaasu malani, ammo atini mesuma kanke irati na gololchite. Karaani anini waan tokole si kad'ad'uni injiru.
29Hayyuuni waan jed'eeni, Dubbi d'ibi lakisi, anini yayu mure aka siifi Sibani hori Saulo qoodattani.
30Mefiboshethini, Sibani ha ch'ufa fud'atuti ee hayyicha, anini yayu quufe, eegi atini nagayaani galte jed'eeni.
Aka Daudini Barzilai nahe
31 #
2 Sam 17.27-29
Barzilaini namichi Gileadi Rogolemu bahe hayyicha galaana Yordani taakisiisu d'ufe. 32Barzilaini nama jaare hobae, ka ganni isaa saddeetama gahe. Inni dureesa, hori gudda qaba ammalle gaafa hayyuuni Mahanaimu jiru guddo isa gololche. 33Hayyichi waan isani jed'e, Yerusalemuti nu galchi, si qorqorad'a.
34Ammo Barzilaini waan jed'eeni, Guyyaani kiyya ya ala hobae anini maanifi Yerusalemu si woliini deema? 35Anini nami ganna saddeetama waan dansaafi hamtu gargari imbeekha? Wonti nyaatani d'ugani nati imiofti? qonqo sirbale dandae ind'agaya? Laki ufumaa ulfinna siti tahe si gaargalcha, na eebisi, ee hayyicha. 36Wonti guddooni akanaleeni naa imale, tatule diqo Yordani gama suni si gegeesa. 37Duuba anini deebie d'aatu awaala abbooti tiyyaati dua, ammo ilmi kiyya kana kimhamu fud'ad'i ha sii hojatuti atileeni waan feetu ch'ufa tolchifi ee, hayyicha.
38Hayyichi waan jed'eeni, Anini kimhamuni deeme waan atini feetu tolchaafi. Sile waan atini himatu ch'ufa sii guuta. 39Jennaani Daudifi jari isaa ch'ufti galaana Yordani taake. Inni Barzilai d'ungate eebisefi Barzilaini kae gale.
Aka worri Yudatifi ka Israeli hayyu irati wolmormani
40Worri Yudatifi worri Israeli hagi gari, ka hayyuu gegeesu d'ufe isa woliini galaana takaani Gilgali d'aqani kimhamuleeni isa gula deeme. 41Jennaani worri Israeli ch'ufti gara hayyu d'aqe waan jed'eeni, Ee hayyicha, oboleyaani teenna worri Yuda maanifi nu dabse, armaa siifi worra keetifi worra si woliini yaule ch'ufa fuud'e, galaana Yordani isani takisise? 42Jennaani worri Yuda waan jed'eeni, Hayyuuni gosa teennaniti? Isani maanifi dallantani, nu taka waan isa toko inyaanne yokhaani woma iraa infud'anne.
43Worri Israeli waan worra Yudatini jed'e, Ato inni gosa teesanile taate, isani gosa toko ch'alla, nu gosa kud'ani; tanaafi Daudileni isani ira nuti aana. Isani maanifi nu tufattani? Nami qara waan galisa hayyu dubbate nuuniti? Ammo worri Yuda haga worra Israeli ira miira hamate, oowe, dubbi jajabdu dubbate.
Aka Shebani Daudini morke
Borana Bible © Bible Society of Kenya, 2019.