2 Samueli 13
13
1Absalomuni, ilmi Daudi, oboleeti mid'aadu toko, ta Tamari jed'ani qaba, jennaani ilmi Daudi d'ibiini, ka Amnoni jed'ani, intala suni jaalate. 2Intala suni aka hamtu jaalate iti bahu dad'abe jaalala suni iraa fayyad'abe; isiini dubra, tanaafi d'iira iti d'iaachu d'owani. 3Duuba namicha tokoti ka jaala Amnoni jira. Maqaani isaa Yonadabu, ilma Shama oboleesa Daudi. Nami sunini guddo Malticha, 4inni d'ufe waan Amnoni jed'e, Atini, ilmi hayyu maanifi guyya ch'ufa gammada d'abde golgolofte deemta?
Nati himi, waan akana si d'ibe kana. Amnonini waan jed'eeni, Anini Tamari ta oboleesa kiyya Absalomu woliini d'alate jaalad'a.
5Yonadabuni waan jed'eeni, Nama fayya inqamne ufi tolchi beeni ch'iisi hojja Abbe si argu d'ufe waan jettuuni, AABBO oboleeti tiyya Tamari gadi ergi, ha d'ufte na golochituti, anini isi arma d'ufte sagale asuma d'aabde harka ufitini na golochitu fed'a. 6Jennaani Amnonini nama fayya inqamne ufi tolche d'aqe gach'iisse. Hayyichi isaa argu d'ufe jennaani Amnonini waan jed'eeni, Aabbo, oboleeti tiyya Tamari gadi ergi, ha d'ufte qit'a asuma naa d'aabde, harka ufitini na golochituti.
7Jennaani Daudini qonqo Tamari, ta mana hayyu keesa jirtuti, erge waan jed'eeni, Mana oboleesa kanke Amnoni d'aqi, sagale d'aabifi. 8Duuba Tamarinini achi d'at'e, oboleesa isii ka sire keesa ch'iisu agarte, dargaye d'akhaani fuute mid'aasite, isa durati qit'a d'aabdeefi. 9Jennaani isiini eele fuute, isa durati qit'a keesaa guurte isati kennite, ammo inni nyaachu dide waan jed'e, Nama ch'ufa armaa yaasa jennaani nami ch'ufti yae. 10Duuba inni waan isiini jed'e, Qit'a gara sire natiini kooti, atumaani nani golochi. Jennaani isiini qit'a d'aabde kaani fuute, oboleesa isii sireti itiini d'ufte. 11Isiini d'ufteeni jennaani inni olch'ee isi ufiti gadi bute waan jed'eeni, Kooti, woliini rafna, oboleeti tiyya.
12Isiini waan jetteeni, Aadda, gadi na lakisi, waan hamtu akana kana irreeni na intolchini! Wonti akana kunini nuu aadaniti, Israeli keesati tahu himmalle. 13Anini akami ch'eeraa biyya keesa deema? Atinileeni Israeli keesa daalle ch'ubbiti tata. Anini imbeekha hayyuuni si ind'owu; isa kad'ad'i, aka na fuutu. 14Ammo inni isi ch'aqasu dide maro irre isi ira qabuufi qabe buufate.
15Jennaani Amnoni aka hama isi jibbe, haga duri isi jaalate kaanile ira isi jibbe waan jed'eeni, Kai, armaa deemi.
16Isiini Aadda, lakisi anini indeemu gussitini atini akana na gussitu tunini waan qara atini na tolchite kaanile ira hamtu! jette. Ammo inni isi ch'aqasu dide, 17hojattu isa gayaame waan jed'eeni, Niiti tana na biraa fuud'i, balbala naa ch'ufi! 18Jennaani namichi hojattu kaani isii isa biraa baase balbala ch'ufe.
Isiini yo suni ubaara d'eera lafati eju, ka harka d'eera, ufira qabdi dubarti hayyu gaafasi ubaara akasiitini yaati. 19Isiini daara matati ufi nat'e, ubaara isii tarsaafte, mata qabate boote, kaate iti d'aabate. 20Oboleesi isii Absalomuni isi arge jennaani waan jed'eeni, Oboleesa kanke Amnoniti akana si fafeese? Oboleeti tiyya ch'alli, inni oboleesuma keeti, akana garaa inhamatini. Akanaani Tamarini mana Absalomu keesa teete, ka garaani hammaate gammada d'abde.
21Hayyu Daudini waan kana ch'ufa d'agaye jennaani guddo dallane. 22Absalomunileeni waan Amnonini oboleeti isaa buufatefi, jibba isaa jabeenna, afaanileeni isaani dubbachu dide.
Aka Absalomuni Amnoni ijeese
23Eegi ganni lama dabre, ka hojattuuni Absalomu ree Baal-Hasori, d'aatu dira Efraimuti, rifeensa iraa ch'iru jirtu, Absalomuni ilmaani hayyu ch'ufa artiti wolti yaame. 24Inni gara hayyu d'aqe waan jed'eeni, Ee, hayyicha, ree tiyya rifeensa iraa ch'iru jirani, siifi hojattuuni tante ch'ufti jilaa koota.
25Hayyichi waan jed'eeni, Hiyo, laki ilma kiyya nu ch'ufti d'ufu himmalle, hegeri si gaargalchina. Ato Absalomuni guddo kad'atele hayyichi isa gula deebiu dide eebisefi.
26Ammo Absalomuni waan jed'eeni, Yo atini d'ufule baate oboleesa kiyya Amnoni na gula gad'iisi. Hayyichi waan jed'eeni, Inni maanifi si gula deema? 27Ammo Absalomuni ammalle guddo kad'ate jennaani hayyichi Amnonifi ilmaani isaa taani ch'ufa Absalomu gula gad'iise.
Absalomuni jila guddo hayyu malte tolche. 28Waan jara isatini jed'e: Hojja Amnonini farso d'uge machae ufi wollaale, yo anini ijeesa isaniini jed'e, nama tokole insodaatina, ijeesa, wollaali gubba tiyya garaa jaabad'a, irinch'ich'ina! 29Duuba jari Absalomu kaani dubbi isaa gula yae Amnoni ijeese. Jennaani ilmaani hayyu taani ch'ufti gaangele ufii yaabate baqate.
30Ato worri karaa jiru Daudi qonqooni iti d'ufte waan jed'aniini: Absalomuni yayu ilmaani tante ch'ufa fit'e tokoleeni nami hafe injiru! 31Hayyichi olkae aka hama laalefate, woya ufii tarsaase, lafaani ufi d'ae. Hojattuuni isaa ta isa woliini jirtu ch'ufti akasuma laalefate woya ufi tarsaafte. 32Ammo Yonadabuni, ilmi Shama, ka oboleesa Daudi, waan jed'e, Ee hayyicha, worri Amnoni male ilmaani tante taani nama tokole inijeemne. Haguma gaafa Amnoni oboleeti isaa Tamari buufateti wonti kunini Absalomu iraa mullati. 33Tanaafi jecha ilmaani tante ch'ufa ya ijeesani jed'ani suni ind'ugeefatini; Amnoni ch'alla ijeesani. 34Duuba Absalomuni gaafasuma kae baqate. Jennaani namichi eeddo eju gumi guddo gaara iraa kara Horoneumu gula buu jirtu arge. Jennaani gara hayyu d'aqe waan arge suni iti hime. 35Yonadabuni waan hayyuuni jed'e worri sunini ilmaani tante, akuma anini qara sini jed'e kaani yatate. 36Akuma inni dubbi buufateeni ilmaani hayyuu, ta aka hama bobootu, olduude; Daudifi hojattuuni isaaleeni akasuma aka taka inargini bohani.
37-38 #
2 Sam 3.3 Absalomuni baqate gara hayyu Geshuri ka Talmai ilma Amihuri jed'ani, d'aqe ganna sadi achi tae. Daudini guyya hedu ilma isaati bohe; 39ammo inni eegi lubbu gurba isaa Amnoni bira dabre, ilma isaa Absalomu guddo garaani iti eje qaabate.
Aka Yoabuni deebii Absalomu kurfeese
Borana Bible © Bible Society of Kenya, 2019.