2 Samueli 1
1
Aka Daudini duisa Saulo d'agaye
1Eegi Sauloni due Daudini ka worra Amaleki dabsate gale, dira Ziklagi guyya lama keesa bule. 2Boriyyaate namichi toko fulla askartini Saulo teetu d'ufe, ka woya ufi tatarsaase mata ufile biyye iti naqate. Inni Dauditi d'ufe isa durati gajed'e isa guddise. 3Daudini waan jed'eeni, Atini eesaa d'ufte? Inni waan jed'eeni, Anini fulla askartini Israeli jirtuu baqad'e.
4Daudini waan jed'eeni me, Waan tahe nati odeesi. Namichi waan jed'eeni, Askartini teenna nyaapa baqatte, nama keenna hedu fit'ani, Saulofi ilma isaa Yonathanile ijeesani.
5Daudini waan jed'eeni, Atini aka Saulofi Yonathani ijeesani maanini beeta?
6 #
1 Sam 31.1-6; 1 Od-dur 10.1-6 Inni waan jed'eeni, Anini ka gaara Gilboa ira jiru, Saulo ka woraana isati hirkatufi gaarifi worri farda yaabatu ka nyaapa ka diquma isa hanqatu arge. 7Inni garagale na arge, na yaame, jennaani anini jala owaad'e. 8Inni, Atini eenu? Jed'e na gaafate; jennaani, Anini nama gosa Amaleki jed'eeni. 9Jennaani inni waan nani jed'e, Kooti, na ijeesi, anini guddo madae dandami inqabu diquma inch'ichini. 10Jennaani anini d'ufe isa ijeese wonti akanatiifi anini imbeekha aka inni yo lafa d'ae ira inhamne. Jennaani anini sure isaa ta hayyu mata iraa fuud'e, harbora harka iraa yaase, amma sitiini d'ufe, aabbo. 11Jennaani Daudifi jari isaa ch'ufti aka hama laalefatani woya ufi tatarsaasani. 12Worri laalefate bohe guyya suni ch'ufa agabu oole, maro lubbu Saulotifi ta ilma isaa Yonathanitifi, ammalle worra AABBO Waaqa ka Israeli, ka had'iisa suni keesa duetifi.
13Daudini namicha kaimiticha qonqooni d'ufe kaani, Atini eesaa d'ufte? jed'e gaafate. Inni waan jed'eeni, Anini nama Amalekiti ammo amma tana namuma lafa teesaniti.
14Daudini waan jed'eeni, Atini akami hayyu AABBO Waaqi muude ijeesu insodatini? 15Jennaani Daudini jara isaa keesa nama toko yaame, kooti isaa ijeesi! jed'eeni. Jennaani namichi namicha Amaleki kaani woraane ijeese, 16Daudini waan jed'eeni, Sumati dua tana ufitini d'ufe. Afaanuma keetiini atini, hayyu AABBO Waaqi muude anumati ijeese jette.
Aka Daudini Saulofi Yonathani faarse bohe
17Daudini Saulofi ilma isa Yonathani faaru taanaani faarse bohe, 18#Yos 10.13 faaru tana worra Yuda ch'ufa ha barsiisani jed'e. (Faaru suni kitaaba Yashari keesati t'aafani.)
19Gareeni Israeli irati worri keenna gugurdaani rawaate!
Jannooti teenna ya qaqarite!
20Gathi keesati inodeesina, dira Askaloni keesati namati inhimina.
Nad'eeni Filisti ingammachisina,
dubra worra Waaqa imbeenne gammadu d'owa.
21Bokayafi yokhaani ebeleeni gaara Gilboa irati iroobini;
oobruni isaaleeni ch'ufti ha adaala taatuti!
Wonte jannoota ch'ufa ya ch'eersani,
wonte Saulole deebiani d'ad'a inibsani.
22Guubeeni Yonathani nama ijeefte, goraadeeni Sauloleni nama inhanqanne,
nama gugurda woworaante nyaapa ijeefte.
23Saulofi Jonathanini nama dadansa jaalatani;
duafi jireennale wolumaani jirani;
worri rissa ira qolchaa,
nyeench'a ira jaba.
24Nad'eeni Israeli, Saulo boha! Inni woya didiimtu shooba isaniti uyise,
waan ch'uch'ulut'ufi worqi isaanii naqe.
25Askarti jajanna ya qaqaarisani, had'iisa keesati fit'ani,
Yonathanini due gaara ira ch'iisa.
26Oboleesa kiyya Yonathani, anini sii boha;
anini guddo si jaalad'e,
jaalalti atini na jaalate waan nami aka
imbeenne, jaalala nad'eeni nama jaalatule inch'aalti.
27Askartini jajanni ya qaqarite, miha worra ka lola ya lafati lakisani, inni amma woma imbahu.
Aka Daudi hayyu Yuda tolchani
Borana Bible © Bible Society of Kenya, 2019.