2 Petro 1
1
1Maqaani kiyya Simoni Petro, anini hojattufi ergattu Yeso Kristo. Anini tatabe tana gara worra d'uga Waaqaatiifi ta Qarqaarsa Yeso Kristotiini d'ugefacha dansa aka teenna argateti t'aafa.
2Eebafi nagaya guddisa argad'a maro hubacha Waaqaatiifi ta Yeso Aabbo keenna.
Yaamichafi fohacha Waaqa
3Jabeenni isaa jabeenna Waaqaati, ya waan nu argachu male ch'ufa nuu kenne, aka jireenna dansaani teennu, waan nu nama nu yaame guddinnaafi dansooma ufi nu qoode beennuufi. 4Kara kanaani, inni ya kakhu dansa, ta guddo wo nu baatu nuu kenne, aka eegi waan inni kakhate argattani, d'araa badi, ta lafa tana keesa jirtu, duraa baatani, Waaqa fakaattani, jireenna isaa qoodattani. 5Maro waan kanatifi jabaad'a aka dansooma d'ugefacha teesaniti darattani; dansooma keesaniti hubacha darad'a; 6hubacha teesaniti ufi qorqorti darad'a; ufi qorqorti teesaniti obsa darad'a; obsa keesaniti jireenna Waaqa darad'a; 7jireenna Waaqa keesaniti jaalala oboleyaani darad'a; jaalala oboleyaaniti jaalala darad'a. 8Waan kana ch'ufa qabaachu maltani; yo waan kana ch'ufa qit'e ufi keesa qabaattani, beekhuma Aabbo Yeso Kristo keesa jabaattani mid'aani baaftani. 9Nami waan kana inqamne balla, ila inqabu, aka daba isaa ka dabre iraa qulqulleesani imbeekhu.
10Tanaafi oboleyaani tiyya, jabaad'a, aka yaamicha Waaqaatiifi fohacha isaa waan guyya ch'ufa tolfattani; wonti akanatiifi yo waan kana tolchitani haga jirtani injiddani. 11Kara kanaani aka Finna Aabbo keennafi Qarqaarsa keenna Yeso Kristo ka hegeri argattani isani tolchani.
12Duuba waan kana anini hojja ch'ufa isani qaabsiisa, ato isani beetani, d'uga qara argatani aka dansa jabeesitanile. 13Anini guddo qajeeltu seha, yo anini qalbi teesani tuqe qaabsiise, haga anini jiru. 14Anini imbeekha d'iotu dua, akuma Aabbo Yeso Kristoni diideese nati hime. 15Anini jabaad'e, kara isanii mid'aasa, aka isani waan kana eegi anini duele hojja ch'ufa qaabattani.
D'ugeesa Petrofi raagoota
16Wonti akanatiifi nu odu duri ta woma keesa injirre gula, aka Aabbo Yeso Kristoni jabeennaani d'ufu, isaniti inhimne. Iluma teennaani guddinna isaa agarre! 17#Mat 17.1-5; Mar 9.2-7; Luk 9.28-35 Gaafa Aabbo Waaqi ulfinnafi guddinna isaa kenne, nu achi jirra, gaafa qonqooni gara Guddinna gubbati gadi d'ufte. Kunini Ilma kiyya, ka anini jaalad'u, ka guddo naa gammachiisu jette. 18Nu qonqo tana ta gubba gadi buutu d'ageenne, gaafa nu isa woliini gaara qulqullo gubba jirru.
19Nu d'aamsa raagooti nuti himte aka dansa beenna. Yo waan kana aka dansa ch'aqaftani, waan dansa tolchitani; wonti akanatiifi inni aka ifse dukana keesa ifsitu jira, haga lafti bariite urjiini ganama gara keesaniti ifsituuti. 20Waan ch'ufa ira, waan kana qaabad'a: nami tokoleeni dandae fagiisa t'aafi qulqullo keesati t'aafani akuma fed'u inhimu. 21Wonti akanatiifi dubbini fagiisaa tokoleeni taka fed'i nama keesaa imbaane, ammo Lubbu Qulqulloti nama dubbachiise, ato nami dubbi fulla Waaqati d'ufte dubbatu.
Raagoota d'arafi jireenna hama
Borana Bible © Bible Society of Kenya, 2019.