2 Odu duri 32
32
1Eegi bara hayyu Hezekiani garaa tokooni AABBO Waaqa hojate kaani, Senakeribuni, hayyuuni Ashuru, lafa Yuda had'e. Inni dira jabeesani, jaarani ch'ufa marse, askarti isatini, naabo isaa ch'ach'absa had'a jed'e. 2Hezekiani aka Senakeribuni dira Yerusalemule had'u fed'e arginaani 3-4isaafi hojattuuni isaa, aka bisaani maddaa ka dira suniti yaa, kutani woliini malatani; aka, akasiini hojja worri Ashuru Yerusalemuti d'iaatu, bisaani d'abu. Hojatuni taani nama heddu wolti baafte, madda bisaani kutani bisaani yau d'owani. 5Hayyichi dira jabeese naabo jaare, doofile ch'ufa gubbati jaare, naabo sunini alalleti naabo d'ibi jaare. Ammalle inni dira Yerusalemu, gama dullachaani ilaboru, fulla jabeesani lafa duuchani taani irati jaarani, mid'aase jaare. Inni ammalle woraanafi wonte heddu mid'aase. 6Nama d'iira ka dira suni ch'ufa nama mataa iti tolche, ballinna fulla fullo dira suniti wolti baase waan jed'eeni, 7Ilaafina, garaa jabaad'a, hayyu Ashurutifi duula isaa gudda muumme inqamne suni insodatina. Irreeni teennafi ta isaa takaniti. 8Irreeni isaa ta namaati, ammo teenna ta AABBO Waaqa keennati, ka nu qarqaare nyaapa keenna nuraa d'owu. Biyyiti dubbi hayyu tana d'ageete jennaani garaa jabaate.
9Eegi suni ato Senakeribufi askartini isaa dira Lakishi haatu, inni qonqo tana gara Hezekiatifi worra Yuda, ka isa woliini Yerusalemu jiru, erge waan jed'eeni, 10Senakeribuni, hayyuuni Ashuru, waan jed'u, Isani maani abdatani, ka dira Yerusalemu ka marsani had'ani, keesa ch'iiftani? 11Hezekiani, AABBO Waaqa keesaniti harka keenna keesaa isani baasa isaniini jed'a, ammo inni ufuma isani sobe, beelafi d'eebuni isani hobaasa. 12Nami fulla AABBO Waaqa iti kad'atani sorio baasanifi balleese, ka worra Yudatifi ka Yerusalemu waan sorio irati baasani toko ch'alla irati sorio baasisise isaniti? 13Isani waan anaafi ababooti tiyya worra gosa d'ibi tolchine imbeetani? Waaqi hedduuni gosa d'ibi taka worra isaani ya harka hayyu Ashuru keesaa baase?
14Waaqi lafa suni tokoleeni yoomi taka harka keenna keesaa worra baase? Duuba maaniti, aka Waaqi keesani isani baasu, isani heresisa? 15Amma soba Hezekiani tae isaniini balleesu kana ee injed'ina. Isa ind'ugeefatina! Waaqi gosa d'ibi taka worra ufi harka hayyu Ashuru jalaa imbaamne. Tanaafi Waaqi keesani kuninileeni dandae isani imbaasu!
16Hojattuuni Ashuru waan hagasi ira hamtule, waan AABBO Waaqatifi hojattu isaa Hezekia, dubbate. 17Tatabeeni hayyichi t'aafe taani AABBO Waaqa Israeli aka hama gurra balleesite waan jette, Waaqi gochiti d'ibiini yaamatuleeni, taka gosa isa harka kiyya keesaa imbaamne, Waaqi Hezekialeeni akasuma dandae worra ufi harka kiyya keesaa imbaasu. 18Jennaani hojatuni taani afaani Ebraniatini dubbi tana lalabde, aka worra Yerusalemu, ka naabo ira ch'iisu, sodaachise mudamsiisu aka akanaani dira suni yoosu dabsatani qabani. 19Ammalle worri Waaqa Yerusalemu, akuma Waaqa gosa d'ibi, ka harkaani mid'aasani kaani, sehe miid'e. 20Jennaani hayyu Hezekiafi raagi Isaya jed'ani, ka ilma Amozi, AABBO Waaqati bohani qarqaarsa kad'atani.
21Jennaani AABBO Waaqi malaika ufi erge malaikaani suni askarti Ashurutifi jara gugurda worrale hobaafte. Akanaani hayyichi Ashuru, ka ch'eeraani injirre, kae, lafa ufiti gale. Guyya toko, ato inni Mana Waaqa isaa keesa tau, ilmaani isaa hagi toko d'ufte goraadeeni isa ijeefte. 22Akanaani AABBO Waaqi hayyu Hezekiafi worra Yerusalemu harka Senakeribu hayyu Ashurutifi nyaapa d'ibile jalaa baase lafa worraa, mirgaa bitaa ch'ufa, nagaya tolche. 23Nami hedduuni Yerusalemu d'ufe, AABBO Waaqaa waan heddu baase Hezekiale wo kenne, duuba akanaani gochiti ch'ufti Hezekia ulfinna kenniteefi.
Fayyad'abafi kiyyiba Hezekia
(2 Hayyoota 20.1-3,12-19; Isaya 38.1-3; 39.1-8)
24Bara suni Hezekiani fayyad'abe duud'ame, jennaani AABBO Waaqa kad'ate, AABBO Waaqi akheekha inni fayyuni isaa kenne. 25Ammo Hezekiani aka hama kiyyibe, galata wollaale, waan AABBO Waaqi tolche ded'e, jennaani wollaali isaa suni Yudafi Yerusalemu badi itiini d'ufe. 26Ammo eege Hezekiafi worri Yerusalemu kiyyiba suni lakise ufi diqeese, tanaafi AABBO Waaqi worra suni haga Hezekiani jiru imballeesine.
Durooma Hezekiatifi jabeenna isaa
27Hayyu Hezekiani aka male woi horate gurra baafate. 28Inni mana worqifi qarsifi d'akhaaye ch'uch'ulut'ufi qumbifi wonteefi miha gati qabu d'ibile keesati olkayu jaarate. Ammalle mana d'ibile ka mid'aanifi daad'ifi d'ad'a keesati olkeyatu jaarate, mana looni iti galanifi ka reeni iti galtule jaarate. 29Tana malele, Waaqi loonifi reefi waan heddu d'ibile kenneefi. Tanaafi inni dira heddu d'ibile jaare. 30Nami maddo Gihoni duuche bisaani isii lafa iti fallanse gara dira Yerusalemu qajeelche, Hezekia. Wonti inni tolche ch'ufti eebifamte, 31ammalle gaafa jari jaaroleeni Babiloni isati ergite d'ufe waan akheekha waaqi tolche isa odeefate, Waaqi Hezekia yalabahe, aka akasiini isaa ilaalate, waan garaa isaa keesa jira hubatu.
Duisa Hezekia
(2 Hayyoota 20.20-21)
32Waan Hezekiani tolche ch'ufafi aka inni AABBO Waaqa hojatele ch'ufa, kitaaba Daayya Raaga Isaya, ilma Amozitifi Odu Hayyoota Yudatifi ta Israeli keesati t'aafaniti t'aafani. 33Hezekiani due jennaani awaala hayyoota, gaara gubba, fulla ilmaani Daudi iti awaalaniti awaalani. Worri Yudatifi ka Yerusalemuleeni gaafa inni due guddo boheefi awaala mid'aase. Ilmi isaa Manaseeni fulla isaa hayyu tahe.
Hayyu Yuda ka Manase jed'ani
(2 Hayyoota 21.1-9)
Borana Bible © Bible Society of Kenya, 2019.