1 Samueli 3
3
1Bara suni gaafa gurbaani Samueli jed'ani Eli jala AABBO Waaqaa hojatu, dubbifi daayyani ta gara Waaqati d'uftu take. 2Jennaani halkani toko Elini ka jaare ilti waaroofte mana ufi keesa rafu jira; 3ammalle Samuelileni Waaro Woyyuma fulla Sanduqa Wold'aqisa AABBO Waaqa, rafu jira. Ganama, ato lafti bolgodu, ka ifseeni bobau jirtu, 4AABBO Waaqi Samueli yaame. Inni owaate, anini kuno jed'e, 5Gara Eli utaale waan jed'eeni, Aabbo, anini kunooti, siti na yaame? Ammo Elini waan jed'eeni, Anini si iyyaamne, beeni, deebii rafi. Jennaani Samuelini sireti deebie gach'iise.
6-7Jennaani ammalle AABBO Waaqi Samueli yaame. Gurbaani aka nami isa yaamu kunini AABBO Waaqa imbeenne, wonti akanatiifi AABBO Waaqi taka duraani isaani indubbanne. Tanaafi inni kae, gara Eli d'aqe waan jed'eeni, Anini kunooti, siti na yaame? Ammo Elini waan jed'eeni, gurba kiyya, anini si iyyaamne, beeni, deebii rafi.
8Jennaani ammalle maro sadeeso AABBO Waaqi Samueli yaame; inni kae gara Eli d'aqe waan jed'eeni, Anini kunooti, siti na yaame? Jennaani Elini aka AABBO Waaqi gurba yaamu jiru hubate. 9Waan jed'eeni, Beeni, sireti deebii, gach'iisi, yo inni deebie si yaame waan jettuuni, AABBO dubbad'i, anini hojattuuni tante si d'agayuu jira. Jennaani gurbaani deebie ufiraa ch'iise.
10Duuba AABBO Waaqi d'ufe arti eje, Samueli, Samueli jed'e akuma qara kaani yaame Samuelini waan jed'eeni, Dubbad'i, anini hojattuuni tante si ch'aqasu jira.
11AABBO Waaqi waan jed'eeni, Guyya toko anini worra Israeli kana waan guddo hamtu tolcha, aka nami d'agayu ch'ufti rifate gurra qaabatu. 12Guyya suni anini waan worra Eli intolcha jed'e kaani ch'ufa intolcha, haga qara iti keeyad'e haga muumme isi gahuti. 13Anini qara iti hime, aka anini worra isaa haga jiru jireenna gaargalchu, maro ilmaani isaa waan hamtu taate na ch'eersiteefi, Elini waan worri tau jiru ch'ufa imbeekha, ammo ind'owarre. 14Tanaafi anini inkakhad'a, aka worri Eli ato sorio yokhaani waan d'ibi na baasele wonti sunini tokoleeni gati ch'ubbu worraa imbaafne.
15Samuelini haga lafti bariituti rafe, lafti bariinaani kae balbala Mana AABBO Waaqaa bane. Inni waan daayya keesa arge suni Eliti himu sodaate. 16Ammo Elini isa yaame waan jed'eeni, Samueli gurba kiyya, jennaani Samuelini owaate. 17Elini waan jed'eeni, AABBO Waaqi maani sini jed'e? Woma tokole na ind'ossini. Yo atini d'ossite nati himu dide, Waaqi aka taka inargini si gaargalcha. 18Jennaani Samuelini waan ch'ufa tokole inhambimne iti hime. Elini waan jed'e, Inni AABBO Waaqa, waan fed'u ch'ufa ha tolchu.
19Akuma Samuelini guddatuni, AABBO Waaqi isa woliini jiraate, dubbi isa ch'ufa lafa buu d'owe guutefi. 20Duuba worri Israeli ch'ufti, ka haga Dani eje Beershebati eju ch'ufti, aka AABBO Waaqi Samueli raaga d'uga tolche, beekhe. 21AABBO Waaqi fulla Shilo jed'ani, ta qara Samueliti mullate dubbateeni, bara ch'ufa namati mullate. Duuba hojja Samuelini dubbate ch'ufa gochiti Israeli ch'ufti inch'aqafte.
Aka Sanduqa Wold'aqisa boojiani
Borana Bible © Bible Society of Kenya, 2019.