Aro Kîmenyithania
Kîmenyithania
Paûlû aandîkîre barûga îîjî mwakeene jwa 55 nyuma ya gûciarwa kwa Jesû. Aamîandîkîre kûmenyîthia akrîstû ba Roma, barîa baijeene na Akuila na Prisila, atî akabariûngîra. Roma yaarî ntûûra înene mono na nîku mûnene ûrîa waathanaga aakaraga.
Abaandîkîîre nîkenda abatarîîria nteto ciegiî wîtîkio bwa gîkristû na ûrîa wîtîkio bûu bûthithagia mûtûûrîreene jwa mûkristû. Ariuga atîrî, “Ntiigagua nthao ngîtûmîîria Nteto Injega cia Mûrungu, nîûntû nîcio inya ya Mûrungu ya gûtûma muntû wonthe ûrîa wîtîkîtie oonoka: kîrî Ayahudi mbere, rîu kîrî antû barîa batî Ayahudi” (Aro 1.16), ningî “ ... Nteto Injega nîcio cionanagia ûrîa Mûrungu eetîkagîîria antû bakaa babaagîru. Ûntû bûu bûkarîkaga nîûntû bwa gwîtîkia, kuuma kîambîrîria mwanka mûthia” (Aro 1.17).
Paûlû nî augîîte barûgeene îîjî atî Ayahudi na barîa batî Ayahudi, bonthe nî bathagwa nî meeyia nîkwîthîrwa meeyia jarî inya. Gûtî u antû baathithia bakîria meeyia inya. Ayahudi nî baagererie kûthingata Waatho bwa Musa îndî nî baaremerwe. Waatho nîka bwatûmîre Ayahudi bamenya ûrîa beeagia bûng'ana. Paûlû nî augîîte atî nî Mûrungu wenka ûûmba gûtûma muntû aa ûmwagîru. Nî oonanîtie atî ûrîa wîtîkagia Jesû Kristû, nîwe Mûrungu aeethagia ûmwagîru. Jesû Kristû nîwe Mûrungu athûrîte nîkenda aa mwonokia wa antû.
Ningî Paûlû nî augîîte baita îrîa muntû oonaga nîûntû bwa kwîthîra arî na ngwatanîro na Kristû na ûrîa mûkristû abuîrîte gûtûûra atongeeretue nî Roho Ûmûtheru.
Nî aarîtie mantû jegiî ûrîa Ayahudi na barîa batî Ayahudi barî mûbangoone jwa Mûrungu kinya këethîra Ayahudi nî baregete gwîtîkia Kristû. Bathithîtie ûû nîkenda ûtûgi bwa Jesû bûkinyîra antû bonthe. Îndî îgiita rîgaakinya Ayahudi bamwîtîkie.
Paûlû akîthiria barûga yaawe, nî aandîkîte ûrîa mûkristû abuîrîte gûtûûra na ûrîa abuîrîte kwenda bangî na ûrîa abuîrîte gûtumîkîra Mûrungu na nthîgûrû yaawe na antû bangî. Rîu akathiria na nkeethî kuuma kîrî akristû bangî na nteto cia gûkumia Mûrungu.
Mantû jarîa jarî ku
Nkeethi na gîtûmi gîa kwandîka barûga îîjî 1.1-17
Muntû wonthe arî na ûbatu bwa kwonokua 1.18—3.20
Njîra îrîa Mûrungu atumagîra kwonokania 3.21—4.25
Ûtûûro bûbwerû ndeene ya Kristû 5.1—8.39
Aisraeli barî ndeene ya mûbango jwa Mûrungu 9.1—11.36
Ûrîa mûkristû abuîri gûtûûra 12.1—15.13
Mantû ja mûthia na nkeethi cia Paûlû 15.14—16.27
Currently Selected:
Aro Kîmenyithania: KIMERUBIBLE
Highlight
Copy
Compare
Share
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218