RUTSI 1
1
Elemeleki nende Vandu veve Visuunda Moabu
1Mumatukhu ka vakhalachi vamihanga, inzala yali mu shivala, khandi mundu mulala khurula mu litaala lia Betselehemu mu lusomo lwa Yuda, yasimukha natsia khumenya mu shivala shia Moabu; ye halala nu mukhali wewe nende vaana veve vavili. 2Mundu mwenoyo yalaangwangwa Elemeleki, khandi mukhali wewe yali Nahumi; vaana vavo vavili vali Mahuloni nende Kilioni; vali vandu vuluhia lwa Efuratsa khurula Betselehemu litaala liu mu lusomo lwa Yuda. Vasimukha nivatsia mu shivala shia Moabu nivamenyayo. 3Navutswa Elemeleki, musatsa wa Nahumi yakhutsa ma Nahumi narikala wonyene nende vaana veve vavili venavo. 4Mahuloni nende Kilioni vahila vakhali mu shivala shia Moabu; mukhali mulala yalaangwangwa Olifa na wundi Rutsi. Lwa vali nivakhamenyayo khumihika likhomi, 5Mahuloni nende Kilioni vakhutsa khandi. Nahumi yarikala vutswa wonyene, vuchila musatsa inoho vaana veve.
Nahumi na Rutsi Vakalukha Betselehemu
6Matukhu mati nikakhavira, Nahumi yahulila makhuva ndi Mwami Nyasaye yali ukasitse vandu veve lwa yali navaheele lichesa lilahi. Khu, yamanya niyirechekha khurula mu shivala shia Moabu halala na vakukhu veve vavili. 7Khu, yarula havundu ha yali nali, halala na vakukhu veve, nivakalukha mu shivala shia Yuda. 8Navutswa lwa vali nivali khu muhaanda Nahumi yavavoolela, “Kalushi khu vanyina venyu. Saalanga ndi Mwami Nyasaye amukhonye, khuli mwakhonya inzi nende vandu vanje vakhutsa khale. 9Saalanga ndi Mwami Nyasaye yikulili shia mulala khu munyi shiliango nikanyalikha anyole musatsa unyala khumuhila khandi ave na hango hehe.”
Nahumi yavaha milembe chiu vuyaanzi chiu khuvaseevula khutsia. Navutswa varaanga khulila 10nivamuvoolela, “Shikaliitsa khuva kario tawe! Khulakalukha halala nivi khutsia khumenya mu vandu vovo.”
11Navutswa Nahumi yavavoolela, “Vanakukhulu vaanje, khutukha muhuuye. Shichila shina mwenyanga munonde? Musuuvilanga nyala khwivula vaana vandi vanyala khuva vasatsa venyu? 12Huuyi, nasakhula shinyala khutsia lukhali khu musatsa wundi khandi tawe. Khali niiva ndi ni lisuuvilitswa, khandi nzi lukhali khumusatsa vutukhu vunu, khandi mbe na vaana vanyishi, 13musuuvilanga munyala khulinda khutukha lwa valiitsa khuhindila vamuhile? Vanakukhulu vaanje, shikanyala khunyalikha tawe! Limenya lianje ni litiinyu muno khuvira lienyu, shichila Mwami Nyasaye wanzivala.”
14Varanga khandi khulila. Olifa yatsunzuna nakukhulu wewe namuha milembe chiu khulekhana, navutswa Rutsi yarikala naye. 15Nahumi yavoolela Rutsi, “Lola, mbalikhayo wowo akalukhanga khu vandu veve khandi khu vanyasaye veve! Shichila shina wambakhane khutsia naye?”
16Navutswa Rutsi yamuvoolela, “Lekha khumbolela khuleshe! Chenda khutsi halala nivi. Havundu hosi hutsia, natsia. Havundu hosi humenya, namenyaho. Vandu vovo valiitsa khuva vandu vaanje, khandi Nyasaye wowo aliitsa khuva Nyasaye wanje. 17Havundu hosi ha uliitsa khukhutsila, naho ha niitsa khukhutsila, khandi niliyeveelwa. Nyasaye andumuli indovoshi indulu niiva shindu shindi shitsitsanga khwavukhanyinya inzi nende yivi nilikhali likhutsa!”
18Lwa Nahumi yalola Rutsi ashitsilililanga khutinyinya vatsi naye, avulakhu shindu shia yavoola.
19Vatsililila nu luchendo lwavo nivatukha mu litaala lia Betselehemu. Lwa vali nivakhatukhayo, vandu voosi vi litaala lienelo va vachenyela, ma vandu vakhali nivahuka nivareevana, “Uyu anyala khuva Nahumi?”
20Nahumi yavavoolela, “Muvuli khunaanga Nahumi; navutswa munaanje Mara, shichila Mwami Nyasaye walomba limenya lianje khuva lilulu muno. 21Lwa narula hanu, nali muhinda muno, navutswa Mwami Nyasaye wangalushitsa hanu makhono mele. Shichila shina munaanganga Nahumi, Mwami Nyasaye niyakhalachila khandi wachila nyakhananga?”
22Nindi Nahumi yakalukha khurula mu shivala shia Moabu na Rutsi, nakukhulu wewe mwana wi shikhana wi shivala shia Moabu. Lwa vali nivakhatukha Betselehemu, imu yi ishayiri yali nili himbi khuraanga khucheswa.
Currently Selected:
RUTSI 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013