TSINGANU 31
31
Ka Mwami Lemweli Yavoola
1Yaka nako makhuva ku Mwami Lemweli wi shivala shia Masa. Ni mechitso ka yavoolelwa na mama wewe. Yamuvoolela,
2“Ni shina shianyala khukhuvoolela yivi mwana wanje?
Ni shina shianyala khukhuvoolela yivi mwana wanje wa inzi mwene nivula?
Ni shina shianyala khukhuvoolela yivi wa nasaala khu Nyasaye ninyola?
3Uvuli khumalila tsingulu tsiotsio khu vandu vakhali;
navo vativitsanga vami.
4Mwami Lemweli, uhulishitsi!
Nu vutamanu khu vami;
nu vutamanu khu vami khung'wa idivai,
inoho vamihi khwikomba malwa.
5Nivang'wele, vivililanga malako,
khandi vambakhana khukholela vandu vanyashitswangwa katoto.
6Malwa ni ka vandu vakhutsanga,
khandi idivai ni ya vandu vanyakhananga mu mioyo;
7lekha vang'wi vivilili vumanani vwavo,
khandi vavuli khwitsushitsa linyakhana liavo.
8“Lomoloma havukono ha vandu vakhaywa khulomoloma;
khandi ulinde vulahi yavo voosi vavula ukhuvakhonya.
9Lomoloma havukono havo, uve mukhalachi wi likhola liu vulunji;
Linda vulahi vwene katoto ka vamanani nende vatakha venyanga khukholelwa.”
Mukhali Mulahi
10Ni hena wu mukhali mulahi anyala khunyolekha?
Nu mulahi muno khuvira machina ku vukuuli vululu muno.
11Musatsa wewe ali ni lisuuvilitsa muye;
shialiitsa khuva mumanani tawe.
12Amukholelanga malahi, ku khuvula khumusalilitsa,
khumatukhu koosi kashili mwoyo.
13Akhavanga tsimbusi nende vitambaya,
khandi akhola muhinzilu kwekwe ni tsingulu.
14Ali khuli tsimeli tsia vandu vakholanga vukhala;
Arulitsanga shiukhulia shieshie ihale wene muno.
15Avukhanga mu tsindolo nuvushili vutukhu,
nalombela vandu vi inzu yeye shiukhulia,
nu khukavulila varumishi veve vi shikhana mihinzilu chiu khukhola.
16Akanakananga khukuula mulimi nu khukuula;
arumishilanga tsisenti tsietsie khuraaka misabibu mu mulimi.
17Wayirechekha ni tsingulu khukhola muhinzilu;
nu khukhola mihinzilu khutukha khulukolovo.
18Wamanya vukhala vwanyolanga khu mihinzilu chiechie;
khali akholanga muhinzilu vutukhu itaaha yeye niyakhanga vulavu.
19Arumishilanga tsimbusi tsietsie khunaava
khandi anaava mwene tsinguvu tsietsie.
20Akhonyanga nu mwoyo kwosi vandu vamanani,
khandi aha vavula khwavatiila shia shindu shiosi shia venyanga.
21Khali shiaheendelakhu mwoyo mumatukhu ki imparafu ku vushindu tawe,
shichila vandu vi inzu yeye vali ni tsinguvu tsiu luya.
22Yalaanga mwene tsimbala khu shitali
nu khwinaavila tsinguvu tsia sambarau.
23Musatsa wewe nu mulala khu vimilili vi litaala likali;
yikhalanga mu shikhaalo shia vimilili vi shivala shienesho.
24Mukhali mwenoyo anaavanga tsinguvu nu khutsikuulitsa;
akuulitsilanga vandu vakholanga vukhala tsikhanda.
25Ali ni tsingulu khandi waheelwa luyali;
avulakhu shindu shianyala khuria khumatukhu kaliitsa khuvaho.
26Alomolomanga nu vusitsa,
khandi yechitsanga vandi nu mwoyo mulahi.
27Arunushitsanga shia shindu shiosi shikholekhanga mu vandu vi inzu yeye;
khandi akholanga mihinzilu chiechie khunyola shiukhulia shieshie.
28Vaana veve vavukhanga mu tsindolo nivamwitsominya;
khali musatsa wewe wayaanzilila khumwitsominya.
29Musatsa wewe avoolanga, “Vakhali vanyishi vakhola malahi muno,
navutswa yivi uli mulahi khuvira voosi.”
30Khwinihitsa mmbili khukaatilitsanga,
likoondo ni shindu shikhaya;
navutswa mukhali uheetsanga Mwami Nyasaye luyali
yenyekhanga khwitsominywa.
31Utushili khurungwa khurulana khu mihinzilu chiechie,
Leshi yitsominyilwi shia havundu hosi shichila mihinzilu chiechie.
Currently Selected:
TSINGANU 31: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013