TSINGANU 17
17
1Nu vulahi khukhayaka vushuma mu milembe,
khuvira khutsia mu mulukha kwi lilia mu inzu ya vandu valembanilamu.
2Murumishi uli nu vusitsa aliitsa khwamiha mwana muyiingwa wu muruchi wewe;
nu khunyola shitonye shi miandu chia yali anyole
khuli mulala khu vamwavo veve.
3Itsahabu nende ifetsa vichelitswa khuvirila mu mulilu,
navutswa Mwami Nyasaye neye uchelitsanga mwoyo ku mundu.
4Mundu mutamanu ahulishitsanga lilomoloma litamanu;
khandi mundu muvehi ahulishitsanga makhuva ku vuvehi.
5Mundu wu kholelanga vamanani shihenye henye anyekanga muloonji wewe;
woyo uyaanzililanga wundi nanyoli matiinyu aliitsa khusalilitswa.
6Vasakhulu vikhuminyilanga khu vitsukhulu vavo,
khuli vaana vikhuminyilanga khu vivuli vavo.
7Lilomoloma lilahi shilirulanga khu mundu muyiingwa;
inoho lilomoloma liu vuvehi shilirulanga khu mwamihi tawe.
8Mundu akanakananga asoya ili khuli lichina liu vukhumu lwa achihaananga;
vali ni lisuuvila inyala khukhola shindu shiosi.
9Mundu usemehanga mundu umukholele vutamanu yenyelitsanga vuyaanzi;
navutswa woyo witsushitsanga vutamanu yavukhanyinyanga valina.
10Mundu uli ni limanya ahuchililanga khukondeshelwa
khuvira khwechitsa mundu muyiingwa khumushuta vivoko imia indala.
11Mundu mutamanu yenyelitsanga mahingani,
khandi murumwa mululu alarumwa khwitsa khumukwana.
12Nu vulahi khwakana ni likunyuli likhali lia vanuuli vaana,
khuvira khwakana nu mundu muyiingwa wakorela mu vuyiingwa vwevwe.
13Niiva mundu alavanzila vulahi khu vutamanu,
vindu vitamanu vilatsililila khwikholekha mu vandu vi inzu yeye.
14Khuranga khulembana khuli manya litanji liahutuukha liroonyanga matsi;
khulwa yako, wikalili nikashili khutsililila khumbeli.
15Khukhalachila mundu uvula vutamanu vwosi inoho khulakhula mundu mutamanu,
viosi ni vitamanu imbeli wu Mwami Nyasaye.
16Vukhala vuvulakhuho vukhumala tsisenti khwechitsa mundu muyiingwa vusitsa,
naye mwene navula vusitsa.
17Mulina watoto neye mulina khumatukhu koosi,
amwavo yivulwangwa khukhonyana mu vutiinyu.
18Mundu musilo neye uhaananga shindu,
nu khusinjilila wundi khu likoovi.
19Mundu wayaanza khulembana wayaanza khukhola vwoni;
woyo wichinjililanga yikombanga khutivitswa.
20Mundu wi tsinganakani tsingoyanu avula khuva muhinda;
khandi mundu muvehi akwitsanga mu matiinyu.
21Mwana muyiingwa avelelitsanga tata wewe,
khandi mwivuli wu mundu muyiingwa avula vuyaanzi.
22Mwoyo kusangalanga kuli khuli lunyasi lulahi,
navutswa mwoyo kwavelela kung'ahitsanga mmbili.
23Mundu mutamanu ahuchililanga muvwivisi khuheelwa asoya
khukoyanyinya vwatoto khwikholekha.
24Mundu uli ni limanya yenyelitsanga vusitsa,
navutswa muyiingwa araangalalanga shia havundu hosi.
25Mwana muyiingwa avelelitsanga tata wewe,
khandi achilanga mama wewe ahulila vululu.
26Nu vutamanu khukhalachila shivaso mundu wi likhola liu vulunji;
khandi khushuta vimilili ni shikholwa shitamanu.
27Mundu mwichehitsi mulilomoloma wacheliha;
khandi mundu wahonjela ali ni limanya.
28Khali ndio, mundu muyiingwa nahonjeli avukulwangwa khuva nu vusitsa;
khali navula shindu shiu khuvoola, alolekhanga khuli wacheliha.
Currently Selected:
TSINGANU 17: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013