TSINGANU 16
16
1Mundu aloshitsanga ku khukhola mu tsinganakani tsietsie,
navutswa lichipu lirulanga khu Mwami Nyasaye.
2Vikholwa viu mundu vilolekhanga khuva vilahi khuye mwene;
navutswa Mwami Nyasaye neye ulolanga kali mu mwoyo kwekwe.
3Wihaane khukholela Mwami Nyasaye muhinzilu kwokwo,
naye alakhurweshitsila ka umali khuloshitsa khukhola.
4Mwami Nyasaye walombela shia shindu shiosi shichila lienya liasho;
khali vandu vatamanu vali ni litukhu lia valiitsa khunyola vutiinyu.
5Vandu vatamanu vasiinya Mwami Nyasaye;
khutukha muve numumanyanga yaka ndi valiitsa khusalilitswa.
6Muve valahi khandi vasuuvilwa,
khu Nyasaye amusemehe vwoni vwenyu.
Mulonde malako ku Mwami Nyasaye,
shindu shitamanu shivuli khumukwila.
7Lwa mundu ayaanzitsanga Mwami Nyasaye mu likhola lielie,
achilanga khali vatsiku veve nivamenya mu milembe naye.
8Nu vulahi khunyola murungu muti, kurunjilwi munjila yu vulunji,
khuvira khunyola murungu munyishi munjila yu vukaati.
9Mundu aloshitsanga khukhola kali nako mu tsinganakani,
navutswa Mwami Nyasaye amwimililanga mu likhola.
10Mwami alomolomanga nu vunyali khurula khu Nyasaye;
kamali khuviritsa khwikholekha nako kakholekhanga.
11Shipimu shiatoto nende tsilaatili ni viu Mwami Nyasaye;
machina kukhupimila vulitoho mu visiko koosi nu muhinzilu kwekwe.
12Ni likhuva liu khusiinyikha khu vami khukhola vindu vitamanu;
musinji ku khwamiha kurulananga khu likhola liu vulunji.
13Mwami ayaanzililanga khuhulila ku vulunji;
wayaanza mundu ulomolomanga katoto.
14Vululu vu mwami wamihanga vuli khuli murumwa wi likhutsa;
mundu uli nu vusitsa anyala khuvuchehitsa.
15Lwa mwami amwenyanga hamoni hehe, vulamu vuliho;
vulahi vwevwe vuli khuli imbula ikhuvanga mumatukhu ki shiuvwi.
16Nu vulahi khunyola vusitsa khuvira itsahabu;
khurovola limanya ni shindu shilahi khuvira ifetsa.
17Vikholwa via vandu valahi vivarulitsanga khu vindu vitamanu;
mundu wilindanga mu limenya alindanga vulamu vwevwe.
18Vwiloli vukhutushitsanga mu litivitswa,
khandi khwichinjilila khu khutushitsanga mu likuurwa.
19Nu vulahi khuva mwichehitsi na vamanani
khuvira khukavana na vandu vilola vindu via vayaayi vandi.
20Mundu uhulishitsanga mivaalo aliitsa khuva muhinda;
woyo uli ni lisuuvilitsa mu Mwami Nyasaye aliitsa khuva nu vuyaanzi.
21Mundu uli nu vusitsa, wamanyikhana shichila limanya;
khandi likhuva liu khuyaanzitsa lileranga halala vandu.
22Vusitsa vuli khuli shirula shiu vulamu khu mundu uli navwo,
navutswa khuchelihitsa mundu muyiingwa nu khumala vwiyangu.
23Tsinganakani tsiu mundu uli nu vusitsa tsimulombanga khulomoloma vulahi;
tsikholanga makhuva keke kava ku khuyaanzitsa.
24Makhuva malahi kali khuli vushi vwi tsinzushi;
ni malahi khutsanzama khandi khu vulamu vu mmbili.
25Mundu anyala khulola ndi likhola lielie ni lilahi,
navutswa lukhumalilikha likhola lienelo limulerelanga likhutsa.
26Luusa lu khulia luchilanga mundu akhola ni tsingulu muhinzilu,
shichila inzala yahulilanga nayo ichilanga nakhola ndio.
27Mundu mutamanu aloshitsanga khuli asalilitsa vandi;
lilomoloma lielie lili khuli mulilu mululu.
28Mundu wakoyana mu tsinganakani achilanga vandu valembana,
mundu wi tsimbemba yahulanyinyanga valina va halala.
29Mundu mululu akaatanga mureende wewe;
nu khumukoyanyinya mu limenya lielie.
30Muheenzeshitsi mundu umwikhananga khandi namukhondiola;
shichila ali ni tsinganakani tsiu khukhola shindu shitamanu.
31Khuva ni tsimbutse nende shiole khu murwi ni itaachi yu vukhumi;
vinyolekhanga mu limenya liu mundu wi likhola liu vulunji.
32Mundu uli mwikhutsili mu vuruma uviri wi tsingulu;
woyo wilindanga mwene uviri mundu uvukulanga litaala.
33Vandu vakhuvanga ikura khumanya shitsitsanga khwikholekha,
navutswa Mwami Nyasaye mwene neye wamanya lichipu.
Currently Selected:
TSINGANU 16: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013