TSINGANU 14
14
1Mukhali uli nu vusitsa yumbakhanga inzu yeye,
navutswa mukhali muyiingwa asambulanga mwene na makhono keke inzu yeye.
2Mundu wumenyanga limenya liu vulunji aheetsanga Mwami Nyasaye luyali,
navutswa woyo uli nu mwiima mutamanu amuchayanga.
3Mundu musilo aliitsa khusalilitswa shichila lilomoloma lielie liu vusilo;
navutswa lilomoloma liu mundu uli nu vusitsa liliitsa khumulinda vulahi.
4Vuchila khuva ni tsihili, khuvula lichesa lilahi,
navutswa lichesa li viraakwa linyolekhanga
shichila tsihili tsiu khulimila.
5Mushiahidi musuuvilwa avoolanga katoto;
navutswa mushiahidi muvehi alomolomanga vuvehi.
6Mundu wi shihenye henye akhavanga vusitsa vuchila khuvunyola,
navutswa mundu uli nu vucheli anyala khumanya vwangu.
7Rula mu shikhaalo shia vandu vayiingwa,
shichila likhuva liu vusitsa linyala khuvula khunyolekhayo.
8Vusitsa vu mundu wacheliha vumukholanga khumanya shia kholanga,
navutswa vusilo vu mundu muyiingwa vumukaatanga mwene.
9Vandu vayiingwa vavulakhu liheenda mwoyo liosi nivakholi vwoni,
navutswa vandu valahi venyanga khusemehwa.
10Mundu neye umanyi khuli asalilanga vululu mu mwoyo kwekwe,
mundu mucheni shianyala khusanga mu vuyaanzi vu mundu mwenoyo tawe.
11Inzu yu mundu mutamanu iliitsa khutivitswa,
navutswa liheemo liu mundu wi likhola liu vulunji lilatsililila khuvaho.
12Injila yulolekhanga nindahi khu mundu,
lukhumalilikha inyala khukhuhila mu likhutsa.
13Khali vandu nivasekhanga, mwoyo nakwo kuvelelanga;
navutswa vuyaanzi nu vwakhavwa matiinyu kanyolekhanga.
14Mundu mutamanu aliitsa khunyola ka atushili khuheelwa;
navutswa mundu mulahi aliitsa khurungwa shihanwa shieshie.
15Mundu muyiingwa asuuvilanga mu shia shindu shiosi,
navutswa mundu mucheli avukulanga vwiyangu khulola shia ye mwene akholanga.
16Mundu uli nu vusitsa nu mucheli khandi alekhananga ni vindu vitamanu,
navutswa mundu muyiingwa nu mwangu mu likhola
khandi avula shia kholanga.
17Mundu uvukulanga vurima vwangu akholanga shindu mu vusilo;
navutswa mundu vali nu vucheli yikhutsilanga.
18Vandu vayiingwa vanyolanga vusilo;
navutswa vandu vacheliha vaheelwangwa vucheli.
19Vandu vakholanga vindu vitamanu vasikamilanga vandu valahi;
nu khuvareeva nivayaanza vavakholele ka venyanga mu vwichehitsi.
20Mumanani wayambakhanwa khali nu mureende wewe;
navutswa muhinda washila valina vanyishi.
21Mundu uchayanga mureende wewe akholanga vwoni;
navutswa ali ni ikhaavi woyo wu kholelanga vamanani kali malahi.
22Kanyala khuva mundu uloshitsanga khukhola vindu vitamanu neye mutamanu?
Yavo vakholanga vindu vilahi navo vayaanzwa khandi vasuuvilwa.
23Khuhinzila ni tsingulu mu shia muhinzilu kwosi kuleranga vukhala,
navutswa makhuva makhaya kaleranga vumanani.
24Itaachi ya vandu vali nu vusitsa vanyolanga nu vusitsa vwavo,
navutswa vuyiingwa nashio shihanwa shia vayiingwa.
25Mushiahidi uli watoto ahonyinyanga vulamu vwa vandu,
navutswa mushiahidi ulomolomanga vuvehi atsamanga vandu.
26Khuha Mwami Nyasaye luyali khuchilanga mundu
ava ni lisuuvila lilahi muno,
khandi vandu vi inzu yeye valiitsa khwilushila muye.
27Khuha Mwami Nyasaye luyali nakwo musinji ku vulamu,
khu mundu alekhane ni mireeko chichilanga likhutsa nilivaho.
28Mwami anyolanga vukhumi khurulana khu vunyishi vwa vandu va yamihanga;
vuchila vandu ye ni shindu tawe.
29Mundu mwikhutsili ali ni limanya linyishi,
navutswa woyo uvukulanga vurima vu vwangu
amanyinyanga khuli ali muyiingwa.
30Mundu umenyi mu milembe avetsanga mulamu,
navutswa lishiendekha lili khuli likuule khu mmbili.
31Mundu utambitsanga mumanani anyeekanga muloonji wewe;
navutswa mundu wu kholelanga mumanani malahi amuheetsanga luyali.
32Mundu mutamanu ativitswangwa khuvirila mu likhola lielie litamanu,
navutswa vandu valahi valindwangwa vulahi khurulana khu vucheli vwavo.
33Vusitsa vunyolekhanga mu mundu uli ni limanya,
navutswa mundu muyiingwa wavukorwa.
34Likhola liu vulunji lichilanga shivala shinyola tsingulu;
navutswa vwoni vuchilanga vandu vanyola tsisoni.
35Murumishi wu kholanga muhinzilu kwekwe nu vusitsa ayaanzitswangwa nu mwami wewe,
navutswa asalilitsanga woyo umulerelanga tsisoni.
Currently Selected:
TSINGANU 14: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013