OBADIA 1
1
Khuli Shivala shia Edomu Shichinjilila nu Khutivitswa
1Malolo ka Obadia yamanyinywa. Yaka nako ku Mwami Nyasaye avoolanga khulondokhana khu shivala shia Edomu.
Khuvoolelwi likhuva lirulanga khu Mwami Nyasaye;
murumwa umali khurumwa khu vandu vi tsimbia tsindi tsiosi khuvoola,
“Yirecheshi! Chendi khutsi khukwana shivala shia Edomu.”
2Mwami Nyasaye yavoolela shivala shia Edomu,
“Niitsa khukhukhola khuva muteteshele mu vandu vi tsimbia tsindi,
shia mundu wosi aliitsa khukhuchaya.
3Vwiloli vwovwo vukhukaati,
shichila ulolanga ndi litaala liolio
nalio imbinga yi tsinyanda tsiasinjilitswa vulahi
khali wumenyanga ikulu khu vikulu,
Yivi wivoolelanga mu mwoyo,
‘Ni viina unyala khunzakulula hasi?’
4Khali niiva unyala khupulukha mwikulu ihale wene khuli shilitsa,
khali niiva wayumbakha shitsu shioshio hakari mu tsinyining'ini,
toto, niitsa khukhwakulula hasi khurulayo.
Inzi Mwami Nyasaye mali khuvoola.
5“Nikava vihuuvi inoho vanuuli vanyala khukhwinjilila,
vanyala khukhaywa khukhuyaaya shia shindu shiosi shia venyi?
Niiva vandu vatuulanga matunda ki misabibu
valiitsa khukhuhinzilila vanyala khurikakhu mitititi?
Navutswa vatsiku vovo vamali khukhutivitsa yivi.
6Munyi vitsukhulu va Esau, mwanuulwa miandu chienyu,
livishilu lienyu liosi liayaaywa!
7Valina venyu voosi vamali khumukaata,
vamukhunga khurula mu shivala shienyu;
vandu va mwamenyanga navo mu milembe vamukuura muliihe.
Valina venyu vamwaliitsanga navo vamureeka nu mureeko,
navutswa shindu shivulakhuho shia mwamanya.
8Inzi Mwami Nyasaye khureevanga,
Unyala khumanyikhu ndi khulitukhu lienelo,
niitsa khumulula vandu vu vusitsa va Edomu;
khali vali nu vucheli mu Shikulu shia Esau.
9Yivi Temani, vasikali vovo valiitsa khutechela,
shia mundu wosi khu Shikulu shia Esau aliitsa khwiirwa.
Shivune Shiachila Edomu Nasalilitswa
10“Lwa mwakhola vindu viu khusalilitsa vamwavo venyu,
nivali vitsukhulu va Yakobo;
muliitsa khuheelwa tsisoni nu khutivitswa mihika ni mihika.
11Khulitukhu lienelo, mwasinjila haluveka numurelekhu tsimoni,
khulitukhu lia vacheni vayaaya miandu chiavo,
khali vacheni nivinjilila mu vilivwa viavo
nivakavulana vuhinda vwa Yerusalemi khuvirila khu ikura;
khali munyi mwakhola khuli vo.
12Mwakhola vutamanu lwa mwayaanzilila khulitukhu lienelo,
lwa matiinyu kakwila vamwavo venyu;
mwakhola vutamanu lwa mwasekha vandu va Yuda,
khulitukhu lia vativitswa;
mwakhola vutamanu lwa mwichinjilila
khulitukhu lia vanyakhananga.
13Mwakhola vutamanu lwa mwinjila mu litaala lia vandu vaanje,
khulitukhu lia matiinyu ka vakwila;
mwakhola vutamanu lwa mwayaanzilila khulitukhu lienelo,
lwa matiinyu kakwila Yuda;
mwakhola vutamanu lwa mwavayaaya miandu chiavo
khulitukhu lia matiinyu ka vakwila.
14Mwakhola vutamanu lwa mwasinjila mu masanganjila,
khukumila vandu vali nivilukhanga.
Mwakhola vutamanu lwa mwalakhula vandu vali ni vashili mwoyo
mu makhono ka vatsiku vavo,
khulitukhu lia vanyakhananga.
Nyasaye Alakhalachila Vandu vi Tsimbia Tsindi
15“Litukhu lili himbi khutukha lwa inzi Mwami Nyasaye
niitsa khukhalachila vandu vi tsimbia tsiosi.
Khuli mwakholanga vandi,
nindio khandi muliitsa khukholelwa.
Muliitsa khurungwa khulondokhana khu vikholwa vienyu;
16khuli lwa mwang'wela mu shikombe shiu vurima vwanje,
khu shikulu shianje shitakatifu,
nindio khandi vandu vi tsimbia tsindi tsiosi
tsia himbi valiitsa khung'wa;
valiitsa khutivitswa khuli vashili khwivulwakhu khulilova.
Vaisraeli Valiitsa Khukuura
17“Navutswa vandu valala valiitsa khwihonolokha khu Shikulu shia Sayoni,
naho haliitsa khuva havundu hatakatifu;
vitsukhulu va Yakobo valiitsa khumenya
khandi mu shivala shia vaheelwa vamenyamu.
18Nalwo lwa vitsukhulu va Yakobo valiitsa khulolekha khuli mulilu,
vandu vi inzu ya Yosefu khuli tsimemo tsiu mulilu;
valiitsa khutivitsa vitsukhulu va Esau
khuli mulilu kulaalitsanga indakala yumakanu;
mundu avulakhuho uliitsa khuvula khwiirwa mu vitsukhulu va Esau.
Inzi Mwami Nyasaye mali khuvoola.
19Vandu vamenya khuluveka luli ikuvanda wi shiangalangwi
valiitsa khumenya mu Shikulu shia Esau,
yavo vamenya hasi hi vikulu
valiitsa khumenya mu shivala shia Vafilisti.
Vaisraeli valiitsa khumenya
mu lusomo lwa Efurahimu
khandi mu litaala lia Samaria
khali vandu vuluhia lwa Benyamini valimenya mu lusomo lwa Gileadi.
20Vaisraeli vali nivali mu vuhaambe havundu halaangwangwa Hala
valiitsa khumenya mu litaala lia Foenike khutukha Zerafatsi;
Vandu vali mu vuhaambe va Yerusalemi vamenyanga Sefaradi
valiitsa khumenya mu mataala ikuvanda wi shiangalangwi.
21Vandu vu Mwami Nyasaye yali niyahonyinya,
valiitsa khutikulukha khu Shikulu shia Sayoni
khwamiha Shikulu shia Edomu,
nalwo lu vwami vuliitsa khuva vu Mwami Nyasaye.”
Currently Selected:
OBADIA 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
