LIVALITSWA 15

Malako khu Misango

1Mwami Nyasaye yavoolela Musa, 2“Voolela Vaisraeli, lwa mwinjila mu shivala shiu khumenyamu, shia muheetsanga, 3muliitsa khuhaana khurula mu miruku chienyu shihunwa, likondi limiiko, likondi, inoho imbuli khu Mwami Nyasaye, khuli shihanwa shiu khusambwa inoho khukholela musango khurweshitsa lilaaka inoho khuli shihanwa shiu khwirulitsa nu mwoyo kwosi khuhaana inoho khuli shihanwa shia khase khosi shi milukha chi idini; mwayu kwi vihanwa vi shiukhulia shienesho kuyaanzitsanga Mwami Nyasaye. 4Mundu uhaananga shihanwa shieshie, aliitsa khuhaana khu Mwami Nyasaye ikilo 1 yi shihanwa shi imu yu vusi ya tsukanywa ilita 1 ya makura ku musayituni khuli shihanwa shi imu. 5Shia likondi lia muliitsa khuhaana, khuli shihanwa shiu khusambwa inoho khukholela musango, muliitsa khuhaana khandi ilita 1 yi idivai, khuli shihanwa shiu khung'wa. 6Lwa muliitsa khuhaana likondi limiiko, muliitsa khuhaana tsikilo 2 tsiu vusi vwa tsukanywa ikilo 1.5 ya makura ku musayituni, khuli shihanwa shi imu, 7halala ni ilita 1.5 yi idivai. Mwayu kuhuunyanga nu kurula mu misango chienecho, kuyaanzitsanga Mwami Nyasaye. 8Lwa muliitsa khusinza shihunwa khuhaana khu Mwami Nyasaye, khuli shihanwa shiu khusambwa inoho khuli musango ku khurweshitsa lilaaka inoho khuli shihanwa shiu khulera milembe, 9muliitsa khuhaana tsikilo 3 tsiu vusi vwa tsukanywa ni tsilita 2 tsia makura ku musayituni, khuli shihanwa shi imu; 10halala ni tsilita 2 tsi idivai. Mwayu kuhuunyanga nu kurula mu musango kwenoko, kuyaanzitsanga Mwami Nyasaye.

11“Yivi navio vindu viliitsa khuhaanwa khu shia shihunwa, likondi, limiiko inoho imbuli. 12Mukhole kenako khu shia shihanwa, khali vive ni vihanwa vinyishi viu khuhaanwa. 13Shia Muisraeli aliitsa khukhola kenako, lwa aliitsa khuhaana shihanwa shi shiukhulia, mwayu kuhuunyanga nu kuyaanzitsa Mwami Nyasaye. 14Khumatukhu koosi kaliitsa khuvaho, mucheni inoho mundu wumenyanga mu munyi, aliitsa khuhaana shihanwa shiu khusambwa, khuli mwayu kuyaanzitsanga Mwami Nyasaye, aliitsa khukhola vutswa khuli mumali khukhola. 15Khumatukhu koosi kaliitsa khuvaho, lilako lilala liene, liliitsa khuva khu munyi khandi khu vandu vacheni vamenyanga mu munyi. Munyi halala navo, muliitsa khuva shindu shilala imbeli wu Mwami Nyasaye; 16malako malala mele nende mivaalo, kaliitsa khuva khu munyi halala navo.”

17Mwami Nyasaye yavoolela Musa 18“Voolela Vaisraeli, lwa muliitsa khwinjila mu shivala shia muheetsanga, 19khandi lwa mulia viraakwa viosi via mwachesayo, muliitsa khuvikha haluveka vilala khuvio, khuli shihanwa shilahi khwinzi Mwami Nyasaye. 20Lwa mukaandanga mukati, shitonye shiu mukati ku khuraanga khutekhwa khurula khu imu yamuchesi impia, shilitsa khuhaanwa khuli shihanwa shilahi khwinzi Mwami Nyasaye. Shiliitsa khuhaanwa munjila indala yene, khuli shihanwa shia muhaananga khurula khu imu ya mwilulanga. 21Shihanwa shilahi muno yishi, shilitsa khuhaanwa khwinzi Mwami Nyasaye khurula khu mukati kwa mukaandanga, khumatukhu koosi kaliitsa khuvaho.

22“Navutswa niiva muliitsa khwitsukhana numumeneche, khali lilala khu malako ku Mwami Nyasaye yaha Musa -- 23khali lilala khu malako ku Mwami Nyasaye, yamuha khuvirila khuye, khuraanjila khulitukhu liu Mwami Nyasaye yahaana khandi khutsililila khumatukhu koosi kaliitsa khuvaho -- 24khandi niiva kaliitsa khwitsukhana nikakholeshe, Vaisraeli voosi nivashili khumanyikhu shindu shiosi, vandu voosi valiitsa khusinza shihunwa khuli shihanwa shiu khusambwa, halala ni shihanwa shitushili shi imu nende shihanwa shi idivai. Mwayu kuhuunyanga khurula khuvio kuyaanzitsanga Mwami Nyasaye. Khumeetakhu khuvio, valiitsa khusinza imbuli ikhole, khuli shihanwa shiu khurulitsaho vwoni. 25Musalisi aliitsa khukholela Vaisraeli voosi mulukha ku khuvakhola khuva vanihu; navo valiitsa khusemehwa, shichila vitsukhana nivakholi vindu vitamanu khandi valera shihanwa shiavo shiu khurulitsaho vwoni khuli shihanwa shi shiukhulia khu Mwami Nyasaye. 26Vaisraeli voosi nende vandu vacheni vamenyanga muvo, valiitsa khusemehwa, shichila vandu voosi vitsukhana nivakholi vindu vitamanu, vuchila khumanya vakholanga vindu vitamanu vienevo.

27“Navutswa niiva mundu aliitsa khwitsukhana nakholi vwoni, mundu mwenoyo aliitsa khulera shimeme shikhali shi imbuli, shili nu muhika mulala khuli shihanwa shiu khurulitsaho vwoni. 28Musalisi aliitsa khukhola khu vwaali mulukha ku khukhola mundu mwenoyo khuva munihu, khurula mu vwoni vwevwe; naye aliitsa khusemehwa. 29Lilako lilala liene yili, liliitsa khwikholekha khu mundu witsukhananga nakholi vwoni, ave Muisraeli inoho mucheni wumenyanga mu Vaisraeli.

30“Navutswa mundu wu kholanga vwoni, shichila wamanya nu vwoni, kave nu Muisraeli inoho nu mucheni, anyekanga Mwami Nyasaye, khandi aliitsa khukhungwa khurula mu vandu veve; 31lwa yachaya likhuva liu Mwami Nyasaye, khandi wameneka malako keke, mundu mwenoyo aliitsa khukhungwa khurula mu vandu veve. Aliitsa khwiirwa, shichila vwoni vwevwe.”

Mundu Wameneka Lilako li Lisabato

32Litukhu lindi, lwa Vaisraeli vali nivamenyanga mwichendanyama, mundu yanyolwayo narenyanga tsikhuyi, khulitukhu li Lisabato. 33Vandu vamunyola narenyanga tsikhuyi, vamuhila khu Musa nende Haruni khandi khu Vaisraeli voosi. 34Vamulinda vutinyu muno, shichila vali nivashili khumanya katsitsanga khwikholekha khuye. 35Nalwo lwa Mwami Nyasaye yavoolela Musa, “Mundu mwenoyo aliitsa khwiirwa. Vaisraeli voosi valiitsa khumulesa na machina ihale wene, khurula mu maheemo ka vamenyamu khutukha lwa akhutsa.” 36Nalwo lwa Vaisraeli voosi vamuhila ihale wene, khurula mu maheemo ka vamenyamu; nivamulesa na machina khutukha lwa yakhutsa, khuli Mwami Nyasaye yali navooli.

Lilako khu Makhundikho khu Tsinguvu

37Mwami Nyasaye yavoolela Musa, 38“Lomoloma khu Vaisraeli, uvavoolele: Matukhu koosi kaliitsa khuvaho, muliitsa khunavila makhundikho mu tsimbeka tsi tsinguvu tsienyu, mukoye kwa bulu khu shia likhundikho. 39Makhundikho kaliitsa khuva khuli shimanyilu shiu khumwitsushitsa. Shia khase khosi, lwa muliitsa khukalola, muliitsa khwitsushitsa malako kaanje koosi khandi mukalonde; khandi muvuli khulonda lienya lienyu vene, halala ni likomba lia muli nalio. 40Makhundikho kenako, kaliitsa khumwitsushitsa khulonda malako kaanje koosi, nu khukholwa khuva vandu vaanje vatakatifu. 41Ninzi Mwami Nyasaye, uli Nyasaye wenyu, wamurulitsa mu shivala shia Misri, mbe Nyasaye wenyu. Ninzi Mwami Nyasaye, uli Nyasaye wenyu.”

Currently Selected:

LIVALITSWA 15: LLLPRO

Highlight

Copy

Compare