MIKA 7
7
Matiinyu Kalikwila Israeli
1Ndi khu shivi muno!
Nakwa khuli mundu wakhaywa khunyolangakhu litunda liosi liu khulia
mumatukhu ki shimiyu,
shichila matunda ki misabibu nende ki mikhuyu koosi
kamala khwatuulwa khale.
2Vandu vasuuvilwa vakora mu shivala;
khali mulala avulakhuho warikala wi likhola liu vulunji;
voosi vakoonekhanga khwiira vandu,
khandi shia mulala khuvo akhavanga
khuli anyala khukumila weshie.
3Vayinaliitsa khukhola vindu vitamanu;
mwimilili nende mukhalachi vareevanga asooya,
khandi vandu vi tsingulu varumishilanga vunyali vwavo
khukhola ka vikombanga vakhole;
nindio vambakhananga khurweshitsa katoto.
4Khali valahi muno khu vandu venavo vakwa khuli marakalu,
ulolekhanga khuva museletse khuvira vandi wakwa vutswa livwa.
Litukhu liavo liu khusalilitswa limali khutukha;
khali ni vakoyanu muno.
5Uvuli khusuuvilila mu mulina wowo,
inoho khura lisuuvilitswa mu mundu wa wayaanza;
Uve mucheli mulilomoloma liolio,
khali makhuva ka ulomolomelanga mukhali wowo;
6shichila mwana wi shiyayi achayanga tata wewe;
mwana wi shikhana yilekhanyinyanga khu nakukhulu wewe,
mwana wi shikhana mukukhu ahinganyinyanga nakukhulu wewe,
khandi vatsiku vu mundu ni vandu va mwene yivulwamu.
7Navutswa khulwanje, nara lisuuvilitswa lianje mu Mwami Nyasaye,
Niitsa khulindilila Nyasaye umbonyinyanga;
Nyasaye wanje aliitsa khumbulishitsa.
Mwami Nyasaye Neye Uhaananga Vuhonyinyi
8Yivi mutsiku wanje, lekha khwikhoya
shichila nakwa mu matiinyu;
ningwa, nasinjila khandi.
Khali nimba mu shisuundi, Mwami Nyasaye neye vulavu vwanje.
9Khutukha Mwami Nyasaye asalilitse,
shichila nakhola vwoni imbeli wewe;
aliitsa khushinga khurula khu vutamanu vwanje
khandi katoto karweshitswi khulondokhana khwinzi.
Aliitsa khumbikha havulavu mu vulavu
khandi inzi mwene ndole khuli katoto karweshitswangwa.
10Nalwo lwa mutsiku wanje aliitsa khulola nikakholekhanga,
khandi tsisoni khulia mundu wambolela,
“Ni hena wu Mwami Nyasaye, uli Nyasaye wowo ali?”
Inzi mwene niitsa khulola mutsiku wanje nativitswangwa.
Aliitsa khutuuvachilwa hasi khuli matohi khu tsinjila.
11Munyi vandu va Yerusalemi, litukhu liamumbakha masisi kenyu lili himbi khutukha!
Khulitukhu lienelo, mipaka chienyu
chiliitsa khuvambaalitswa muno.
12Khulitukhu lienelo, nalwo lwa valikalukha khu munyi,
khurula Ashuria khwitsa Misri,
khurula Misri khwitsa khu Muchela kwa Efurate,
khurula khu inyanza khutukha khu inyanza yindi,
khurula khu shikulu khutukha khu shikulu shindi.
13Navutswa shivala shiliitsa khukwa shiangalangwi
shichila vikholwa vitamanu vwa vandu vamenya mushio.
Lisaala nende Litsominywa
14Yivi Nyasaye, yamiha vandu vovo ni indovoshi yoyo,
linda shiayo shioshio shia mwene warovola,
shimenyanga shionyene vutswa mu muliru
khandi vavotokhanwa nu mulimi kwi lilova linuulu.
Lekha valii mulwayilu luvisi lwa Bashani nende Gileadi
khuli wakholanga mumatukhu kakhale.
15Khumanyinyikhu viloleshitsu viu khuchenyinya
khuli wakhola lwa wa khurulitsa mu shivala shia Misri.
16Vandu vi tsimbia tsindi valiitsa khulola nikakholekhanga,
khali vanyole tsisoni shichila vunyali vwavo vwosi;
valiitsa khukorwa shia vavoola,
valiitsa khwikala maroyi.
17Valiitsa khukhoomba lukuushi khuli inzukha,
khuli vindu vimolanga hasi khu malova;
valiitsa khwitsa nivatechelanga khurula mu tsimbinga tsiavo;
valiitsa khwitsa khu yivi Mwami Nyasaye,
uli Nyasaye weru nivatechelanga,
nu khukhuha yivi luyali.
18Ni viina yivi Nyasaye, uli khuli yivi?
Nivi usemehanga vwoni vwa vandu vovo varikala,
khali shiuheenzanga khu vutamanu vwavo tawe.
Vurima vwovwo vuliitsa khuvula khuvaho mihika ni mihika;
shichila vuyaanzi vwovwo vwi mihika ni mihika.
19Mwami Nyasaye, nivi uliitsa khukhuvela khandi tsimbavasi,
uliitsa khutuuvachila hasi vutamanu vweru.
Uliitsa khusiuva vwoni vweru vwosi mu luliiva mu inyanza.
20Uliitsa khumanyinya vusuuvilwa vwovwo khu vandu vi inzu ya Yakobo,
tsimbavasi tsiotsio tsi mihika ni mihika khu Aburahamu,
khuli wisuuhila vakuuka veru mumatukhu kakhale.
Currently Selected:
MIKA 7: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
