YOSHWA 22
22
Vandu vi Tsimbia Tsili Ivukwi Vakalukha Ingo Wavo
1Nalwo lwa Yoshwa yalaanga halala vandu vi tsimbia tsia Rubeni, Gadi, nende inusu ya vandu vuluhia lwa Manaase khuluveka luli ivukwi. 2Yoshwa yavavoolela, “Mumali khukhola shia shindu shiosi, shia Musa murumishi wu Mwami Nyasaye yamuvoolela mukhole, khandi mulondi malako kaanje koosi. 3Matukhu yaka koosi mushili khwilukhakhu Vaisraeli veshie. Mwakhola vulahi numulonda malako ka Nyasaye wenyu. 4Mwami Nyasaye, uli Nyasaye wenyu, walomba Vaisraeli veshie khumenya mu milembe, khuli yali niyalaaka aliitsa khuvakholela. Khulwa yako, kalushi ingo wenyu mumenye mu shivala shia muvoolanga ni shienyu, shia Musa murumishi wu Mwami Nyasaye yamuha, khuluveka luli ivukwi wu Muchela kwa Yorodani. 5Navutswa chelitsi khuli munyala mulole ndi mulondanga Malako ka Musa, yamuvoolela mulonde. Muyaanze Mwami Nyasaye, uli Nyasaye wenyu, mukhole lienya lielie, mulonde malako keke, muve vasuuvilwa khuye, khandi mu murumishile nu mwoyo kwosi khandi ni tsingulu tsienyu tsiosi.” 6Nalwo lwa Yoshwa yavakasitsa, navaseevula khurulaho; nivatsia ingo wavo. 7Musa yali uhaani lusomo luli Bashani khu inusu ya vandu vuluhia lwa Manaase; navutswa inusu ya vandu vali nivarikale yavo, Yoshwa yali uvaheele lusomo lwi shivala nende Vaisraeli veshie khuluveka luli imbo wu Muchela kwa Yorodani. Yoshwa yavaseevula, nivatsia ingo wavo, navakasitsa. 8Yoshwa yavavoolela, “Kalushi ingo wenyu ni miandu chienyu minyishi muno -- ni tsing'ombe tsinyishi, ifetsa, itsahabu, mukasa, nende shivia, nende tsinguvu tsinyishi -- mukavane vindu via mwayaaya vatsiku venyu nende Vaisraeli veshie.” 9Vandu vi tsimbia tsia Rubeni, Gadi, nende inusu ya vandu vuluhia lwa Manaase khuluveka luli ivukwi, vakalukha ingo wavo. Valekha Vaisraeli vandi vali nivarikale mu litaala lia Shilo lili mu shivala shia Kanaani, nivatsia mu lusomo lwa Gileadi, nishili shivala shiavo shiu khumenyamu, shia vali nivavukula, khuli Mwami Nyasaye yali niyavavoolela vakhole khuvirila khu Musa.
Vwaali Vumbakhwa Himbi khu Muchela kwa Yorodani
10Lwa vatukha mu lusomo, nivashili mu shivala shia Kanaani, nivashili khwambukha Muchela kwa Yorodani, vandu vi tsimbia tsia Rubeni, Gadi nende inusu ya vandu vuluhia lwa Manaase khuluveka luli imbo wu Muchela kwa Yorodani, vumbakhayo vwaali vukali muno, himbi khu Muchela kwa Yorodani. 11Vaisraeli valala, vali nivarikale vavoolelwa, “Hulishitsi! Vandu vi tsimbia tsia Rubeni, Gadi, nende inusu ya vandu vuluhia lwa Manaase khuluveka luli ivukwi, vamali khumbakha vwaali mu litaala lia Gelilotsi, iluveka lweru lu Muchela kwa Yorodani!” 12Lwa Vaisraeli vahulila makhuva kenako, vandu voosi vakanila halala mu litaala lia Shilo, khutsia khukwana vandu vi tsimbia tsili khuluveka luli ivukwi.
13Khulwa yako, Vaisraeli varuma mundu walaangwangwa Finiasi, wali mwana wu musalisi Eliazari, khutsia khu vandu vi tsimbia tsia Rubeni, Gadi, nende inusu ya vandu vuluhia lwa Manaase khuluveka luli ivukwi mu lusomo lwa Gileadi. 14Vimilili likhomi vasimukha nivatsia na Finiasi, shia mulala khurula mu vandu vi tsimbia khuluveka luli imbo, khandi shia lwivulu nu mwimilili wavo. 15Vatukha mu lusomo lwa Gileadi, khu vandu vi tsimbia tsia Rubeni, Gadi nende inusu ya vandu vuluhia lwa Manaase khuluveka luli ivukwi; 16nivalomoloma havukono ha vandu voosi vu Mwami Nyasaye, nivavoola, “Shichila shina mukholele Nyasaye wa Vaisraeli, shindu shitamanu yishi? Muhinganyinyi Mwami Nyasaye, lwa mwiyumbashili vene vwaali yuvu! Shiumulondanga Mwami Nyasaye tawe. 17Yitsushitsikhu vwoni, vwa khwakhola nu khuli mu litaala lia Pehori, lwa Mwami Nyasaye yasalilitsa vandu veve mwene lwa ya varumila vulwale vutamanu muno? Khunyakhananga nunundi shichila vwoni vwenovo. Vwoni vwa mwakhola vwenovo vunyala khuva vushili khumutukha? 18Mutsitsanga khwambakhana khumulonda nunundi? Niiva mulahinganyinya Mwami Nyasaye nunundi, alalolela mukamba mundu wosi vurima, shia mundu wosi wumenyanga mu Vaisraeli. 19Khulwa yako, niiva shivala shienyu ni shitamanu, hambi mwiyunji na khutsi mu shivala shiu Mwami Nyasaye, ha Liheemo Litakatifu lielie lili; khandi mwivukulilikha shitonye shi shivala shieru. Navutswa muvuli khuhinganyinyakhu Mwami Nyasaye, inoho khwikhola khuva vahingani numumbakha vwaali khumeeta khu vwaali vu Mwami Nyasaye, uli Nyasaye weru tawe. 20Yitsushitsikhu khuli Akani mwana wa Zera, yambakhana khulonda malako khulondokhana khu vindu viali ni viaviritswa khutivitswa. Vaisraeli voosi vasalilitswa, shichila ka yakhola. Shiali Akani wonyene neye wakhutsa, shichila vwoni vwevwe tawe.”
21Vandu vi tsimbia tsia Rubeni, Gadi nende inusu ya vandu vuluhia lwa Manaase khuluveka luli ivukwi, vachipa vimilili vi tsinzu tsia vandu vi tsimbia khuluveka luli imbo, 22“Nyasaye Uli Ikulu khu Viosi neye Mwami Nyasaye! Neye Mwami Nyasaye! Nyasaye Uli Ikulu khu Viosi neye Mwami Nyasaye! Neye Mwami Nyasaye! Umanyi shivune shichilanga nu khukhola kenako, khandi nu vulahi munyi khumanya khandi shivune shienesho. Niiva khuhinganyinyi Mwami Nyasaye, khandi khwambakhane khusuuvila muye, muvuli khukhulekha khutsililila khuva mwoyo! 23Niiva khwambakhane khulonda Mwami Nyasaye, khandi khumbashi vwaali vweru vene vukhuhaanilakhu vihanwa viukhusambwa inoho vihanwa vi imu inoho vihanwa viu khulera milembe, leshi Mwami Nyasaye mwene akhusalilitsi. 24Navutswa shikali kario tawe! Khukholi kenako shichila khwaria ndi mumatukhu kaliitsa khuvaho, vitsukhulu venyu valiitsa khuvoolela veru, ‘Mwami Nyasaye, uli Nyasaye wa Israeli, ali nu vukhonyi shina khu munyi? 25Yalomba Muchela kwa Yorodani khuva mupaka hakari heru nende vandu vi tsimbia tsia Rubeni nende Gadi. Muvulakhu shia munyala khunyola khurula khu Mwami Nyasaye.’ Vitsukhulu venyu valiitsa khulomba vitsukhulu veru, khulekha khusaala khu Mwami Nyasaye. 26Khulwa yako, khwamanya nu khumbakha vwaali, shikali khuhaanilakhu vihanwa viu khusambwa inoho khukholelakhu misango tawe; 27navutswa khuli shimanyilu hakari ha vandu veru nende vandu venyu ndi toto khusaalanga khu Mwami Nyasaye imbeli wi Liheemo Litakatifu, halala ni vihanwa vieru viu khusambwa, vihanwa vi misango nende vihanwa viu khulera milembe; khandi khu vandu valiitsa khuvaho, nu khumali khukhutsa. Khwakhola kenako, khu vitsukhulu venyu valivula khuvoolela vitsukhulu veru Mwami Nyasaye, avulakhu shindu shianyala khuvakholela. 28Yali inganakani yeru vene ndi, niiva kaliitsa khwikholekha munjila yeneyo, vitsukhulu veru valiitsa khuvoola, ‘Lolikhu! Vakuuka veru vumbakha vwaali, khuli vwaali vwali vu Mwami Nyasaye. Shikali vwali vukhusambilakhu vihanwa inoho khukholelakhu musango tawe, navutswa khuli shimanyilu hakari ha vandu veru nende vandu venyu.’ 29Ni kilikali, khwali nu khushili khuhinganyinyakhu Mwami Nyasaye inoho khulekha khumulonda nunundi nu khumbakha vwaali vu khusambilakhu vihanwa inoho vihanwa vi imu inoho khukholelakhu misango. Shikenyekhanga khumbashe vwaali vundi vutswa, khuvira vwaali vu Mwami Nyasaye, uli Nyasaye weru, vuli imbeli wi Liheemo Litakatifu tawe.”
30Musalisi Finiasi nende vimilili va vandu vi tsimbia tsia Israeli vali nivali naye, vimilili va vandu vi tsinzu tsia vandu vi tsimbia khuluveka luli imbo, vahulila makhuva ka vandu vi tsimbia tsia Rubeni, Gadi, nende inusu ya vandu vuluhia lwa Manaase khuluveka luli ivukwi, vavavoolela, vayaanzitswa muno. 31Finiasi, wali nali mwana wu musalisi Eliazari, yavavoolela, “Khumanyi nunundi ndi Mwami Nyasaye, ali na khutsi; shichila mwambakhane khuva vahingani khuye; khandi muhonyinyi Vaisraeli nivavula khusalilitswa.”
32Nalwo lwa Finiasi nende vimilili venavo, valekha vandu vi tsimbia tsia Rubeni nende Gadi mu lusomo lwa Gileadi, nivakalukha mu shivala shia Kanaani, khu Vaisraeli, nivavavoolela ka vali nivanyoliyo. 33Vaisraeli vali nu vuyaanzi vunyishi, lwa vahulila makhuva kenako, khandi nivitsominya Mwami Nyasaye. Vavula shindu shia valomoloma khulondokhana khuli vatsia muliihe, khwononyinya shivala shia vandu vi tsimbia tsia Rubeni nende Gadi vamenyamu.
34Vandu vi tsimbia tsia Rubeni nende Gadi vavoola, “Vwaali yuvu vuliitsa khuhaana vushiahidi khulondokhana khu khutsi voosi ndi Mwami Nyasaye neye Nyasaye.” Khulwa yako, vakulikha vwaali vwenovo lira “Vushiahidi.”
Currently Selected:
YOSHWA 22: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013