YOSHWA 2
2
Varunishitsi Varumwa Yeriko
1Yoshwa mwana wa Nuni yaruma shia vandu vavili, khurula havundu halaangwangwa Shitimu na malako ku khutsia khurunishitsa muvwivisi shivala shienesho, khushila muno litaala lia Yeriko. Vandu venavo vasimukha, nivatukha hango ha Rahabu, wali mukhali wakholanga vulaaya. Vakonaho mu vutukhu vwenovo. 2Mwami wa Yeriko yavoolelwa ndi valala khu Vaisraeli, vamali khwitsa khurunishitsa makhuva kikholekhanga mu shivala shieshie. 3Mwami wa Yeriko yaruma likhuva khu Rahabu, navoola, “Lera ilwanyi vandu vitsi khukhulola, nivinjila munzu mwomwo; shichila vitsi khurunishitsa shia shindu shiosi shikholekhanga mu shivala yishi.”
4Navutswa mukhali mwenoyo yavukula vandu vavili venavo, natsia khuvavisa. Yavoola, “Ni kilikali, vandu vitsa nivinjila mu inzu yanje, navutswa shinyala khumanya havundu ha vali nivaruli tawe. 5Lwa isaa yu khwikala shilivwa yatukha, shivala nishimwami, vandu venavo varulaho nivatsia. Shinyala khumanya injila ya vandu venavo valondelakhu tawe. Vahitsanyinye vwangu; shichila muliitsa khuvanyola vwangu, nivashili khunjila.” 6Navutswa mukhali mwenoyo yali uvahili khwilungu li inzu yeye, khandi uvavisi mu makata ka yali niyachikha vulahi khwilungu li inzu yeye. 7Vandu vu Mwami wa Yeriko venavo va vahitsanyinya, nivavirila khu injila itsitsanga khu Muchela kwa Yorodani, khali khutsia khutukha ha muhaanda kukhalakanyinyanga Muchela kwa Yorodani. Lwa vandu varulaho, nalwo lwa shilivwa shikalwa vwangu.
8Khali varunishitsi venavo nivashili khukona vutukhu vwenovo, Rahabu yanina khwilungu khutsia khuvalola, 9navavoolela, “Manyi ndi Mwami Nyasaye umali khumuha shivala yishi. Shia mundu wosi wumenyanga mu shivala shinu, atechelanga naria shichila munyi. 10Khumali khuhulila makhuva, khulondokhana khuli Mwami Nyasaye yakhaaminya matsi ki Inyanza Imuuchi imbeli wenyu, lwa mwali numurulanga mu shivala shia Misri. Khuvoolelwi khandi makhuva khulondokhana khuli mwiira Sihoni nende Ogu, vami vavili va Vaamori vamenyanga khuluveka luli ivukwi wu Muchela kwa Yorodani. 11Khwatechela lwa khwahulila vwangu makhuva kenako; khandi khwakhutsa ikholo shichila munyi. Mwami Nyasaye, uli Nyasaye wenyu, ni Nyasaye uli ikulu mwikulu khandi hasi hanu khulilova. 12Nzisuuhili khuvirila mu lira lielie nunundi ndi muliitsa khulinda vandu vi inzu yanje munjila indahi, khuli lwa nakhamulinda, khandi mumbe shimanyilu shinyala khunomba suuvili munyi. 13Nyenyanga musuuvilitsi ndi muliitsa khulekha khwiira tata wanje nende mama wanje, vambotso vaanje nende vakhana veru, halala na vandu vi inzu yavo voosi! Muvuli khukhwiira!”
14Vandu venavo vamuchipa, “Nyasaye akhwiiri, niiva khulambakhana khukhola ka khuvooli khuliitsa khukhola! Niiva uliitsa khuvula khuvoolelakhu mundu ka khwakholanga, khukhusuuvilitsanga ndi lwa Mwami Nyasaye, aliitsa khukhuha shivala yishi, khuliitsa khukhulinda vulahi.”
15Rahabu yamenyanga mu inzu yumbakhwa mulisisi liu mu litaala; niyishitsa vandu venavo nu mukoye khuvirila mu litirisha. 16Rahabu yavavoolela, “Roonjeli mutsi mu shivala shi vikulu, vandu vamulondanga vavuli khumunyola. Kholi nu mwivisayo khumatukhu kavaka khutukha lwa vakalukha. Nikakhavwa, munyala khutsililila nu luchendo lwenyu.”
17Vandu venavo vavoolela Rahabu, “Khuliitsa khurweshitsa lilaaka lia ukhukholi nu khwisuuha. 18Lwa khwitsa khuseera shivala shienyu, uliitsa khuvoha mukoye mumuuchi yuku khu litirisha lia wa khwishitsilamu hasi. Laanga halala vandu va munzu mwomwo, tata wowo nende mama wowo, vamwavo vovo, nende vandu vi inzu ya tata wowo. 19Niiva mundu aliitsa khurulakhu munzu mwenomo natsia ilwanyi, niyiirwa kaliitsa khuva makhuva keke mwene. Avuli khuvoolakhu ndi nu khutsi vakhuchili nakhutsa tawe. Navutswa niiva mulala khu vandu vamuli halala navo munzu mwenomo, aliitsa khusalilitswa, ni kilikali khutsi navo va khutsitsanga khuvukulwa, navo vakhuchili nakhutsa. 20Navutswa niiva ulakhutsama khu mundu, khuliitsa khuva vavoholole khurula khu lilaaka lia khwisuuha, khuliitsa khurweshitsa.” 21Rahabu yahuchilila aliitsa khukhola kenako, navaseevula khutsia. Lwa vali nivakhatsia, Rahabu yavoha mukoye mumuuchi, kwali nukuli mu litirisha.
22Vandu venavo varoonjela, nivatsia mu vikulu khumenyayo khumatukhu kavaka khutukha lwa vandu va vahitsanyinyanga vakalukha. Vandu va vahitsanyinyanga venavo, va vakhava shia havundu hosi, navutswa mundu avulakhuho wa vanyola. 23Nalwo lwa varunishitsi vavili venavo, vakholomokha nivarula mu vikulu, nivambukha muchela. Vakalukha khu Yoshwa, nivamuvoolela shia shindu shiosi, shia vali nivavirilamu. 24Vavoolela Yoshwa, “Ni kilikali, Mwami Nyasaye umali khukhuha shivala shiosi. Khali ndio, vandu voosi vamenyanga mu shivala shienesho, vatechelanga nivaria lwa vakhulolanga.”
Currently Selected:
YOSHWA 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013