YOSHWA 18
18
Khukavulwa khwi Shivala Shiarikala
1Lwa vali nivamali khukwana nu khukuura, Vaisraeli vakanila halala mu litaala lia Shilo, nivasinjilitsaho Liheemo Litakatifu. 2Khwali nukhurikale na vandu vi tsimbia saba, tsia Israeli vali nivashili khuheelwakhu lusomo lwosi lwi shivala. 3Nalwo lwa Yoshwa yavoolela Vaisraeli, “Mutsitsanga khulindilila khutukha litukhu shina, numushili khutsia khuvukula shivala shiu Mwami Nyasaye, uli Nyasaye wa vakuuka venyu, yamuha? 4Mumbe vandu vavaka khurula mu shia luhia. Niitsa khuvaruma khutsia khuchenda chenda mu shivala shienesho shiosi, khuheenza lusomo lwa venyanga vanyole khuva lwavo vene. Nivamali kenako, valiitsa khukalukha khwinzi vambolele. 5Shivala shienesho shitsitsanga khukavulwamu hali saba, khulondokhana khu vandu vi tsimbia tsiavo; vandu vuluhia lwa Yuda valiitsa khurikala mu lusomo lwavo khuluveka luli ikuvanda; khandi vandu vuluhia lwa Yosefu vatsililila khuva mu lusomo lwavo khuluveka luli ivuluka. 6Nuwakhamala khuhandika makhuva khulondokhana khu tsisomo saba tsi shivala shienesho, nderela hanu mukhuvile ikura imbeli wu Mwami Nyasaye, uli Nyasaye weru. 7Navutswa vandu vu lwivulu lwa Levi shivatsitsanga khunyolakhu lusomo lwosi na munyi tawe, shichila shitonye shiavo shia vanyola nu khurumishila Mwami Nyasaye khuli vasalisi. Khali vandu vi tsimbia tsia Gadi, Rubeni, nende inusu ya vandu vuluhia lwa Manaase vanyola shivala shiavo khale khuluveka luli ivukwi wu Muchela kwa Yorodani, lwa Musa murumishi wu Mwami Nyasaye, yali niyavaha.”
8Vandu venavo vasimukha nivarulaho, nivatsia khukola khandi khuheenza shivala shienesho, lwa Yoshwa yali navavoolele, “Simushi mutsi shia havundu hosi mu shivala shienesho, khandi mukalushi khwinzi. Namukhuvila ikura hanu mu litaala lia Shilo, khureeveshitsa khu Mwami Nyasaye.” 9Vandu venavo vasimukha nivatsia shia havundu hosi mu shivala shienesho, nivaraanga khuhandika khuli vakavula shivala shienesho mu tsisomo saba, nivahandika mira ka mataala kali mu shivala shienesho. Khulwa yako, vakalukha khu Yoshwa mu maheemo ku khumenyamu kali Shilo. 10Yoshwa yakhuva ikura, khureeva Mwami Nyasaye inganakani shichila vo, nakavulila shia luhia khu vandu vi tsimbia tsia Israeli tsiali nitsirikale lusomo lulala lwi shivala shienesho.
Lusomo lwa Vandu Vuluhia lwa Benyamini Vaheelwa
11Lusomo lwi inzu ya vandu vuluhia lwa Benyamini, nalwo lwali lukhuraanga khukavulwa. Shivala shiavo shiali hakari ha vandu vi tsimbia tsia Yuda nende Yosefu. 12Mupaka kwa Benyamini kwraanjila khuluveka luli ivuluka wu Muchela kwa Yorodani. Kwatikulukha khutsia khuluveka luli ivuluka wi shikulu shi litaala lia Yeriko, khali khutsia khuluveka luli imbo, khuvirila mu shivala shi vikulu khutsia khutukha mu shiangalangwi shili mu litaala lia Betsi-aveni. 13Mupaka kwenoko kwatsia nu kutukha khu shikulu khuluveka luli ikuvanda wi litaala lia Luzi (lilaangwangwa khandi lira Betseli); khandi nu kukholomokha khutukha mu litaala lia Atarotsi-adari, lili khu shikulu khuluveka luli ikuvanda wi litaala lia Betsi-horoni. 14Nalwo lwa mupaka kwatsililila nu kutsia khuluveka lundi, nu kushiama khutsia khuluveka luli ikuvanda, khuraanjila khuluveka luli imbo wi shikulu shienesho, nu kutsia khutukha mu litaala lia Kiriatsi Baali (inoho Kiriatsi-yeharimu), litaala lia vandu vuluhia lwa Yuda. Yuku nakwo kwali mupaka khuluveka luli imbo. 15Mupaka khuluveka luli ikuvanda, kwraanjila khundulu khwi litaala lia Kiriatsi-yeharimu, nu kutsia khutukha khu Tsisieveye tsia Nefutoha. 16Mupaka kwenoko kwakholomokha, nu kutsia khutukha hasi hi shikulu khuluveka lundi lu Luhoongo lwa Hinomu, khuluveka luli ivuluka khundulu khu Luhoongo lwa Refahimu. Kwakholomokha nutsia khuluveka luli ikuvanda, khuvirila mu Luhoongo lwa Hinomu, khuluveka luli ikuvanda khuluchinga lwa vandu vuluhia lwa Vayeebusi, nu kutsililila mu litaala lia Eni-rogeli. 17Kwashiama nu kutsia khuluveka luli ivuluka khutukha mu litaala lia Enushemeshi, khandi nu kutsililila khutukha mu litaala lia Gelilotsi, khuluveka lundi lu khu Injila ya Adumimu. Mupaka kwenoko kwakholomokha khandi khutukha khu Lichina lia Bohani (Bohani yali mwana wa Rubeni.) 18Kwatsililila khutsia khuluveka luli ivuluka wi Shikulu shia Betsi-araba, khandi nu kukholomokha nu kutukha mu litaala lia Araba. 19Mupaka kwenoko kwatsililila khutsia khutukha khuluveka luli ivuluka wi Shikulu shia Betsi-hogula, nu kumalilishila khuluveka luli ivuluka havundu ha matsi kinjilanga mu Inyanza yi Ichumbi havundu wu Muchela kwa Yorodani kutsukhanga matsi kakwo mu inyanza khuluveka luli ikuvanda. Yuku nakwo kwali mupaka kuli khuluveka luli ikuvanda. 20Muchela kwa Yorodani, nakwo kwali mupaka khuluveka luli ivukwi. Yichi nachio chiali mipaka chi shivala shia vandu vuluhia lwa Benyamini vanyola khuva shiavo vene.
21Mataala ka vandu vi inzu ya vandu vuluhia lwa Benyamini kali Yeriko, Betsi-hogula, Emeke-kezizi, 22Betsi-araba, Zemarahimu, Betseli, 23Avi imu, Para, Ofura, 24Chefaramoni, Ofuni, nende Geba; mataala likhomi na kavili nende michitsi chili himbi khuko. 25Khwali na mataala kandi khuli Gibioni, Raama, Beherotsi, 26Mizipa, Kefira, Moza, 27Rekemu, Irupeheli, Tarala, 28Zela, Hahelefu, Yebusi (inoho Yerusalemi), Gibeha, nende Kiriatsi-yeharimu: mataala likhomi na kane, nende michitsi chili himbi khuko. Yishi nashio shiali shivala shia vandu vuluhia lwa Benyamini, vanyola khuva shiavo vene.
© The Bible Society of Kenya, 2013