YONA 1
1
Yona Yachelitsa Khwilukha Mwami Nyasaye
1Litukhu lindi, Mwami Nyasaye yalomoloma khu Yona mwana wa Amitayi; navoola, 2“Simukha vwangu utsi wilwatse mu litaala lia Nineve, shichila vutamanu vwa vandu vakholamu vumali khutukha khwinzi.” 3Navutswa Yona yaraanga luchendo lu khutsia havundu halaangwangwa Tarishishi khwenya khwilukha Mwami Nyasaye. Yakholomokha natsia mu litaala lia Yopa. Yanyolayo imeli yali nitsitsanga Tarishishi. Yarunga murungu ku luchendo, nanina mu imeli yeneyo, khutsia navo Tarishishi, khwenya khwilukha Mwami Nyasaye. 4Navutswa Mwami Nyasaye yachila vushindu vwi tsingulu tsinyishi nu vuhuutsa khu inyanza, ma imbuutsa niva inditoho muno, khali imeli niva himbi khwavukhanamu. 5Nalwo lwa vandu voosi vali nivali mu imeli varia; shia mulala naraanga khusaala khu nyasaye wewe. Vasiuva misiko chiali mu imeli mu inyanza, khwenya yaanguhi. Nikhali, Yona yali ukholomoshe winjile mukari mwene mwi imeli; khandi yali ukoni tsindolo tsinditoho. 6Mwimilili wi imeli yatsia khuye, namureeva, “Yivi ukonanga tsindolo, shichila shina ukonanga? Vukha usaale khu nyasaye wowo! Haundi, nyasaye alakhwitsushitsa makhuvuli khutiva.”
7Khulwa yako, vandu vali nivali mu imeli vavoolelana, “Hambi, leshi khukhuvi ikura khulole ni viina uchilanga vindu vitamanu yivi ni vikhukwila.” Vakhuva ikura, manikwila Yona. 8Nalwo lwa varaanga khumureevishitsa, “Khuvoolele ni viina uchilanga nu khunyola matiinyu yaka? Nu muhinzilu shina kwa wu kholanga? Wivulwa hena? Urulanga mu shivala shina? Urulanga mu vandu vuluhia shina?”
9Yona yachipa navoola, “Ndi Muhebrania; khandi naria Mwami Nyasaye, uli Nyasaye wu mwikulu, walomba likulu nende lilova.” 10Vandu venavo vamanya nivaria muno, nivavoolela Yona, “Ni shina shiukholi yishi!” Vandu venavo vali vamanyi ndi Yona yilukhanga Mwami Nyasaye, shichila yali navavoolele. 11Nalwo lwa vamureeva, “Ni shina shia khunyala khukhukhola, nikanyalikha inyanza ihonjele?” Navutswa inyanza yali nitsilililanga khuvanyashitsa.
12Yona yavavoolela, “Mbukuli musiuvi mu inyanza. Nalwo lwa inyanza ihonjela shichila munyi; khandi manyi vulahi vwene ndi imbuutsa inditoho iyi imunyashitsanga shichila inzi.”
13Khali ndio, vandu venavo vachelitsa khuluuka imeli ni tsingulu tsiavo tsiosi khuchihila khuluchinga, navutswa nivakhaywa; shichila imbuutsa yatsililila khuvanyashitsa. 14Nalwo lwa valila nivasaala khu Mwami Nyasaye, nivavoola, “Yivi Mwami Nyasaye, khukhusayanga nuyaanza khuvuli khutivitswa, shichila vulamu vu mundu uyu. Uvuli khukhuvukula khuli nu khutsi khwachila mundu uvula vutamanu uyu nakhutsa! Mwami Nyasaye, ni lienya liolio kikholeshe kario.” 15Vavukula Yona, nivamusiuva mu inyanza; nonoho lwi inyanza yahonjela. 16Nalwo lwa vandu venavo vamanya nivaria muno Mwami Nyasaye. Vakholela Mwami Nyasaye misango, khali nivisuuha khumurumishila.
17Navutswa Mwami Nyasaye yali urovole khale isutsi ingali khumiila Yona. Yona yamenya munda mwi isutsi yeneyo khumatukhu kavaka, mbasu nu vutukhu.
Currently Selected:
YONA 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
