YAKOBO 3
3
Khulinda Lulimi Lweru
1Vasuuvili vashianje, nu vulahi vandu vanyishi mu munyi khuvula khuva veechitsi. Khuli mumanyi, khutsi va khuli veechitsi va khwechitsanga vandi, navo va khuliitsa khukhalachilwa vululu muno khuvira vandi. 2Khutsi voosi khwamenya nukholanga vindu vitamanu. Navutswa niiva mundu anyala khuvula khukholakhu shindu shitamanu shiosi mulilomoloma lielie, mundu mwenoyo nu museletse khandi anyala khwilinda mwene munjila indahi. 3Lwa khuvohanga mukoye mu munwa kwi ifarasi khuchilomba ikhulonde, khuli nu vunyali vu khuchilomba khutsia wa khwenyanga ive nitsitsanga. 4Inoho kanakanakhu shindu khulondokhana khu imeli: khali niiva imeli ningali muno, khandi imbuutsa inditoho ichihilanga, inyala khusukumwa ningara indititi yene, nu khutsia shia havundu hosi ha mundu uchihilanga yenyanga ive nitsitsanga. 5Nindio khandi lulimi luli. Khali niiva nu lutititi lwene, lwichinjililanga khulondokhana khu vindu vikali vinyishi.
Khali kanakanikhu khuli isasi indala yu mulilu ihaambitsanga, niyeelitsa muliru kwosi! 6Lulimi luli khandi khuli mulilu. Lulimi lwa yitsula vindu vitamanu vinyishi, lwa luli shivelo shilala khu vivelo viu mmbili kweru. Lukoyanyinyanga mundu, khandi lwononyinya mmbili kwekwe khuli mulilu kusambanga shindu. Lwononyinyanga vulamu vweru nu mulilu kurulanga mu shihatisi. 7Mundu ali nu vunyali vu khuvaya miruku, khandi wavaya vindu vindi viosi vili mwoyo -- tsinyama tsiumbulimu nende manyonyi, vindu vimolanga hasi nende tsisutsi. 8Navutswa mundu avulakhuho unyala khuvaya lulimi; nu lutamanu khandi shiulunyala khulindwa munjila indahi tawe; shichila lwa yitsula vutsiva vu khwiira. 9Khulurumishilanga khusanditsa Mwami Nyasaye, uli Tata weru khandi khulaama vandu, valoongwa mu likoondo lia Nyasaye. 10Makhuva ku khwitsominya nende ku khulaama karulanga mu munwa mulala kwenoko. Vasuuvili vashianje, kavuli khwikholekha munjila yeneyo? 11Matsi ki ichumbi nende matsi malahi, kanyala khurula mu isieveye indala yene? 12Vasuuvili vashianje, musala ku mukhuyu kunyala khwama matunda ki misayituni inoho musala ku musabibu khwama matunda ku mukhuyu? Khali matsi ki ichumbi, shikanyala khurula mu isieveye ya matsi malahi tawe.
Vusitsa Khurula Mwikulu
13Ni viina mu munyi uli nu vusitsa nende limanya? Leshi amanyinyi havulavu amenyanga limenya lilahi, khuvirila mu vikholwa vievie mulichehitsa khandi mu vusitsa. 14Navutswa niiva mioyo chienyu chiayitsula imbotokha, vurima nende vwimani, muvuli khwichinjilila khulondokhana khu kenako, numuvoola vuvehi khuvira katoto. 15Vusitsa khuli vwenovo, shiuvurulanga mwikulu tawe. Nu vwa vandu vu mu shivala shinu; Roho shianyala khuva avwimililanga tawe. Nu vwa matimoni. 16Havundu ha khuli ni imbotokha nende vwimani, khuliho khandi nu vukoyanu nende vindu vitamanu vinyishi lukanu na lukanu. 17Navutswa lukhuraanga lwene, vusitsa vurulanga mwikulu nu vunihu; vwayaanza milembe, nu vuhoma, nu vu vulina; vwa yitsula tsimbavasi khandi vuchilanga vandu vakhola vikholwa vilahi; shiuvuli vu khwihonela vandi, inoho khuva nu vwikhola kholitsi vwa vandu khuva valunji tawe. 18Likhola lilahi lirulananga khu likhola liu vulunji, khuvirila mu milembe na vandu vachilanga milembe nichivaho.
Currently Selected:
YAKOBO 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013