ISAYA 65
65
Likhalachilwa nende Vuhonyinyi Vukhumalilikha
1Mwami Nyasaye avoolanga,
“Nali nayirechekha khuchipa lisaala lia vandu vaanje vasaalanga khwinzi,
navutswa vambakhana khusaala khwinzi.
Nali navirecheshela khunyola inzi,
navutswa vambakhana khuchelitsa khukhava.
Vandu vuluhia lwenolo vambakhana khusaala khwinzi,
khali niiva nali nzirecheshi khuchipa,
‘Ndiho! Ndiho; niitsa khumukhonya munyi.’
2Mbasu kwosi nali namenya ninyenyanga khwinjilitsa vandu vaanje vahingani,
vayaanza khukhola vindu vitamanu,
nivakholanga ka vene vayaanzililanga.
3Ni vandu vamenya nivandindilanga,
vakholanga misango mu milimi,
khandi vasambanga vubani khu vwaali vwalombwa khu matofari.
4Vikhalanga mu vilindwa
mavava ha vwivisi mu vutukhu vwosi,
nivaliitsanga inyama yi ingulume,
khandi vang'wa isupu yalombwa khu vindu vi shifwavi;
5vavoolelanga yavo vakananga navo,
‘Leshi khwisuunda himbi khu khutsi,
shichila khuli vandu vatakatifu!’
Vandu venavo vachilanga nimba nu vurima vunyishi,
vurima vwanje khuvo
vuli khuli mulilu kwakhanga khulitukhu liosi.
6“Loli, nako kandi nako mu mwoyo kwanje:
Shinzitsanga khuhonjela vutswa tawe,
navutswa nzitsanga khuvanzila;
ni kilikali, valiitsa khurunga viosi.
7Inzi Mwami Nyasaye, niitsa khuvanzila vutamanu vwavo,
nikanyalikha vavurunji nu vutamanu vwa vakuuka vavo.
Vakhola misango khu vikulu nivamba tsisoni khu rukulu;
Niitsa khuvasalilitsa mu vunyishi,
khuvarunga ka vakholanga khale.”
8Mwami Nyasaye avoolanga,
“Mundu avulakhuho wononyinyanga matunda malahi ki misabibu,
nikhali alombanga idivai khurula khuko.
Vandu vavoolanga,
‘Lekha khwononyinya,
shichila shindu shilahi shilimu.’
Nindio khandi niitsa khukhola havukono ha varumishi vaanje;
shinzitsanga khuvativitsa voosi tawe.
9Niitsa khukasitsa vandu vi inzu ya Yakobo,
khandi vitsukhulu vavo valiitsa khumenya mu shivala shianje shi vikulu.
Vandu vaanje va narovola valiitsa khumenyayo,
navo valiitsa khuva varumishi vaanje.
10Lwomera lwa Sharoni luliitsa khuva shiayo
shi miruku chiayitswamu,
Luhoongo lwa Akori luliitsa khuva havundu hi miruku chihulushila,
shichila vandu vaanje vakhavanga inzi.
11“Navutswa ni shina shianyala khumukhola munyi vamwalekha inzi,
vamwivilila shikulu shianje shitakatifu,
munyi vamusaalanga khu nyasaye ‘Gadi’,
nakhwo khuvoola, ‘Ikhaavi’
khandi khu ‘Meni’
nakhwo khuvoola, ‘Maraava.’
12Mali khuvakhalachila likhutsa liu khwiirwa,
voosi muliitsa khwiirwa mushisinzilu,
shichila, lwa namulaanga, mwambakhana khunjipa;
lwa nalomoloma, mwambakhana khuhulishitsa.
Mwakhola vindu vitamanu numulolanga,
khali numurovola vindu via nali nambakhana.
13Khulwa yako, inzi Mwami Nyasaye mbolanga ndi
varumishi vaanje valiitsa khulia,
navutswa inzala iliitsa khumala munyi;
varumishi vaanje valiitsa khung'wa,
navutswa vuluhu vuliitsa khumuleka;
varumishi vaanje valiitsa khwikhoya,
navutswa muliitsa khuheelwa tsisoni.
14Varumishi vaanje valiitsa khwimba
nivasangala mu mioyo chiavo,
navutswa munyi muliitsa khulila nu vuveleli mu mioyo,
numulila tsikhwili khuvirila mulinyakhana.
15Vandu vaanje va narovola
valiitsa khurumishila lira lienyu khuli shilaamo;
nivavoola, ‘Mwami Nyasaye alamwiira;’
navutswa niitsa khukulikha varumishi vaanje lira liyia.
16Nalwo lwa mundu ureevanga khukasitswa mu shivala,
aliitsa khukasitswa na Nyasaye uli musuuvilwa,
khandi mundu wisuuhanga mu shivala shinu,
aliitsa khwisuuha khu Nyasaye uli musuuvilwa;
shichila vutiinyu vwaliho mumatukhu ka khale vwayivililwa
khandi vwakora imbeli wanje.”
Vindu Viyia viu Vukhumi
17Mwami Nyasaye avoolanga,
“Loli, nombanga likulu liyia nende lilova liyia.
Vindu viali niviakholekha khale viliitsa khwivililwa,
nu khuvula khwitsushitswa.
18Navutswa musangale nu khwikhoya mihika ni mihika,
mu shia inzi mwene noonganga;
shichila nzitsanga khukhola Yerusalemi
khuva litaala likali liu khuyaanzitsa,
vandu vamenyanga mulio khuva nu vuyaanzi.
19Niitsa khwikhoyela mu Yerusalemi,
khandi sangale nindi mu vandu vaanje;
liyooko liu khwikhula inoho khulila
liliitsa khuvula khuhulilikhana.
20Indana ivulakhuho iliitsa khukhutsilamu;
khali musakhulu aliitsa khuvula khukhutsilamu
nashili khutushitsa matukhu keke kukhukhutsa;
shichila mwana aliitsa khukhutsa nali ni mihika imia indala;
khandi mundu uliitsa khuvula khutushitsa mihika imia indala
aliitsa khuvukulwa khuli walaamwa.
21Vandu valiitsa khumbakha tsinzu nu khumenyamu,
valiitsa khuraaka misabibu nu khulia matunda kachio.
22Valiitsa khuvula khumbakha
ma vandi vamenyemu;
inoho khuraaka ma vandi valii;
shichila khuli lwa musala kuvukulanga matukhu khu kumeela,
nindio khandi matukhu ka vandu vaanje kaliitsa khuva,
khandi vandu vaanje va narovola
valiitsa khulia lucheeli lwavo vene.
23Valiitsa khuvula khukhola mihinzilu chi shikhaya,
inoho khwivula vaana valiitsa khukwa mu maraava;
shichila valiitsa khuva vu Mwami Nyasaye yakasitsa,
vo nende vitsukhulu vavo.
24Khali nivashili khusaala khwinzi niitsa khuvachipa,
khali nivalomolomanga, niitsa khuvahulila.
25Vihulukhu nende shimeme shi likondi viliitsa khulia halala,
isimba iliitsa khwaya vunyasi khuli ihili;
navutswa lukuushi luliitsa khuva shiukhulia shi inzukha.
Viliitsa khuvula khusalilitsa inoho khwononyinyakhu shindu khu shikulu shianje shitakatifu.
Inzi Mwami Nyasaye mali khuvoola.”
Currently Selected:
ISAYA 65: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013