ISAYA 64
64
1Vwakhavele vulahi nukavuli likulu hali khavili nu khwitsa hasi,
khu vikulu vikhulole maviranje khutechela!
2Mulilu kwakhavisambi khuli kusambanga shisakha,
khuli mulilu kuchilanga matsi nikayuya.
Nalwo lwa uliitsa khwitsushitsa vatsiku vovo lira liolio,
khandi nalwo lwa vandu vi tsimbia tsindi
valiitsa khutechela shichila uliho.
3Lwa wakhola vindu viu khuchenyinya via khwakhalindililanga,
witsa hasi, ma vikulu nivitechela lwa walolekhaho.
4Khurula khale mundu avulakhuho wahulila
na maroyi keke;
khali mundu avulakhuho walolakhu Nyasaye khuli yivi,
wu kholelanga yavo valindililanga muye muhinzilu.
5Yivi ukhonyanga yavo vasangalanga khukhola likhola liu vulunji,
vitsushitsanga khuli wenyanga vamenye.
Wakhuvukulila vurima lwa khwakhola vwoni;
khwakholanga vwoni khurula khale,
khuliitsa khuhonyinywa?
6Khwakwa khuli shindu shi shifwavi,
vikholwa vieru vilahi viakwa khuli inguvu yi indakala.
Khutsi voosi khwaniala khuli vunyasi,
khandi khuli vushindu,
vwoni vweru vukhuhuutsanyinyanga ihale wene.
7Khali mundu avulakhuho witsanga khusaala khu yivi;
khali mundu avulakhuho ukhukhavanga
ni tsingulu tsietsie tsiosi.
Yivi mwene wakhwivisa
khandi walekhana na khutsi shichila vwoni vweru.
8Navutswa khali ndio, yivi Mwami Nyasaye,
nivi tata weru;
khutsi khuli matohi,
navutswa nivi uli muloonji ukhuloonganga;
nivi mwene wakhuloonga.
9Yivi Mwami Nyasaye, nuyaanza lekha khukhuvukulila vurima;
inoho khwitsushitsakhu vwoni vweru mihika ni mihika.
Khutsi navo va khuli vandu vovo;
ukhuvele tsimbavasi.
10Mataala koko matakatifu kakwa khuli shiangalangwi,
litaala likali lia Sayoni liakwa khuli mwichendanyama,
litaala likali lia Yerusalemi liayononyinywa.
11Inzu yeru indakatifu khandi yaheelwa vukhumi,
wa vakuuka veru va khwitsominyila yasambwa nu mulilu,
khandi shia havundu hosi ha khwali nu khwayaanza hakwa lichiinga.
12Ni kilikali, unyala khwiyikalila khukholakhu shindu?
Yivi Mwami Nyasaye,
unyala khutsililila khuhonjela vutswa
khali nu khusalilitsa khuvira shichelo?
Currently Selected:
ISAYA 64: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013