ISAYA 6
6
Khuli Isaya Yalaangwa
1Khumuhika kwa Mwami Uzia yakhutsa, nalola Mwami Nyasaye. Yali wikhale khu shisoko shiu vwami vwevwe, shiali hikulu muno khandi naheelwangwa vukhumi; khandi ikaanzu yeye yitsula mu Litempeli. 2Vilombe vialaangwangwa Serafimu viasinjila hikulu hehe; shia Serafimu yali ni tsimbaha sita: yarumishila tsimbaha tsivili khukhunikha imbeli wayo; yarumishila tsimbaha tsindi tsivili khukhunikha khu vilenje viayo, manipulushila tsindi tsivili. 3Serafimu yalaanganga yeshie, nivoola,
“Mutakatifu, mutakatifu!
Mwami Nyasaye wi Mikaanda Chiliihe neye mutakatifu!
Shivala shiosi shiayitsula vukhumi vwevwe.”
4Muhumu kwarula khu woyo walaanjililanga kwachila musinji kwi Litempeli nu kutechela, ma mwooshi nu kwitsula mu Litempeli.
5Nalila nimbola, “Wooyi! Inzi ndi khu vutiinyu; shichila ndi mundu wayaanza khulomoloma makhuva matamanu, khandi menyanga mu vandu valomolomanga makhuva matamanu; inzi mwene mali khulola ni tsimoni tsianje Mwami Nyasaye, uli Mwami Nyasaye wi Mikaanda Chiliihe.”
6Serafimu indala khutsio yapulukha niyitsa himbi ha nali nindi, nichinji mandaa ku mulilu mu mukhono kwekwe, ka yali niyahuli na makamata khurula khu vwaali. 7Yandila khu munwa kwanje na makamata kenako, nivoola, “Lola, mandaa ku mulilu yaka kamali khukhutiila khu munwa kwokwo. Vutamanu vwovwo vumali khurulitswaho, khandi umali khusemehwa khurula mu vwoni vwovwo.”
8Nalwo lwa nahulila Mwami Nyasaye navoola,
“Ni viina wanyala khuruma?
Ni viina unyala khutsia havukono heru?”
Nalwo lwa navoola,
“Inzi ndi hanu! Nduma inzi!”
9Mwami Nyasaye yambolela,
“Simukha utsi khuvoolela vandu yava:
‘Muliitsa khuhulishitsa hali khanyishi,
navutswa muliitsa khukhaywa khumanya;
muliitsa khuheenzeshitsa hali khanyishi,
navutswa muliitsa khukhaywa khulola.’ ”
10Nalwo lwa yambolela,
“Yingohitsa vandu yava,
khali uvikalitse maroyi,
nu khuvavekhulitsa;
nivakhakholelwi vario,
valiitsa khulola ni tsimoni tsiavo,
valiitsa khuhulila na maroyi kavo,
valiitsa khukalukhana nu khuhonyinywa.”
11Nalwo lwa nareeva,
“Yivi Mwami Nyasaye,
nu luhono shina lwa kavukula?”
Mwami Nyasaye yanjipa,
“Khutukha lwa mataala kaliitsa khupomolwa khukwa lichiinga,
vuchila vandu khumenya muko,
khandi tsinzu khusang'alwa;
ma shivala shitivitswi.
12Inzi Mwami Nyasaye niitsa khuhila vandu ihale wene,
khali mundu avuli khurikalakhu mu shivala shinu.
13Khali niiva mulala mu vandu likhomi aliitsa khurikala mu shivala,
shilitsa khusambwa khandi,
khuli musala ku museno,
kushili ni shisiikhi shiakwo
nu kumali khureemwa.”
Lukuutsa lutakatifu nalwo luli khuli shisiikhi shienesho.
Currently Selected:
ISAYA 6: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013