ISAYA 41
41
1Nyasaye avoolanga,
“Munyi vandu varulanga mu visuulu,
mumbulishitsi numuhonjeli!
Munyi vandu vi tsimbia tsindi, nyoli tsingulu vuyia!
Leshi vasinjile mavalomolome;
hambi khwakane halala khukhalachilwa.
2Ni viina wa vwanyinya mu mulilu mu mukwani wa khukwana
khurula khuluveka luli ivukwi,
nu khumuha tsingulu tsiu khukuura shia havundu hosi ha atsitsanga?
Ni viina umuheetsanga tsingulu tsiu khukuura vami nende vandu vi tsimbia tsindi?
Shivavi shieshie shivamalanga khuli nu lukuushi.
Mivanu chiechie chivasalanyinyanga khuli nu vunyasi vwa vushindu vuhuutsanga.
3Avahitsanyinyanga nu khuvavira mu milembe,
vwangu muno vuchila khuseenakhu hasi!
4Ni viina wachila kenako koosi nikakholekha,
narunishitsa vindu viakholekhanga khuraanjila muliraanga?
Inzi, Mwami Nyasaye neye waliho muliraanga khandi mulimalilikha;
khandi niitsa khuvaho mihika ni mihika.”
5Vandu vi visuulu vamala khulola kakholekha khandi varia;
tsimbeka tsiosi tsi shivala tsitechelanga;
vamala khwisuunda himbi, vitsanga.
6Shia mulala akhonyanga wundi
khali avoolela amwavo wewe,
“Utinye mwoyo!”
7Mufundi wi tsimbaho atinyilitsanga mwiraanyi wi itsahabu,
khandi mundu ukhonganga musambwa kuve munyiukhu
atinyilitsanga mundu ukhong'ondanga nu musumari.
Vavoolanga, “Kwayunganyinywa vulahi” --
mayunganyinya musambwa nu musumari.
8“Navutswa munyi, Vaisraeli vamuli varumishi vaanje,
yivi Yakobo, wa narovola,
munyi vitsukhulu va Aburahamu wali mulina wanje,
9ninzi wamurulitsa mu tsimbeka tsiosi mu shivala,
nimulaanga khurula ihale wene,
nimuvoolela, ‘Nivi murumishi wanje,’
ninzi wakhurovola, navutswa shili khukhwambakhana;
10lekha khuria, shichila ndi nivi!
Lekha khuheenda mwoyo, shichila ndi Nyasaye wowo!
Niitsa khukhutinyilitsa, niitsa khukhukhonya;
niitsa khukhulinda nu khukhuhonyinya.
11“Lola, yavo voosi vakhuvukulilanga vurima
ni kilikali valiitsa khuheelwa tsisoni nu khukuurwa;
yavo vakhukwananga valiitsa khuva shindu shikhaya,
navutswa valiitsa khutivitswa.
12Khali niiva uliitsa khukhava vatsiku vovo,
shiuliitsa khuvanyola tawe.
Yavo vakhukwananga valiitsa khuva shindu shikhaya;
13shichila ninzi Mwami Nyasaye, uli Nyasaye wowo,
Ninzi ukhutinyilitsanga nimbola,
‘Lekha khuria;
shichila niitsa khukhukhonya.’ ”
14Mwami Nyasaye avoolanga,
“Yivi Yakobo uli khuli inyende,
munyi Vaisraeli, muvuli khuria;
shichila niitsa khumukhonya. Inzi Mwami Nyasaye mali khuvoola.
Ninzi Nyasaye Mutakatifu wa Israeli, uli Muhavini wenyu.
15Loli, niitsa khumukhola muve khuli shindu shiu khwilulilakhu,
nu vuuma vuyia khandi vuuchi.
Muliitsa khwilula vikulu nu khuviononyinya;
vikulu viliitsa khutuuvukhanamu khuli lukuushi.
16Muliitsa khuvilula, ma vushindu vuvihuutsanyinyi;
imbuutsa iliitsa khuvihuutsanyinya.
Muliitsa khwikhoya khwinzi Mwami Nyasaye;
khandi muve nu vukhumi mu Nyasaye Mutakatifu wa Israeli.
17“Lwa vandu vamanani nende vavula shindu vakhavanga matsi ka vang'wa,
navutswa vavula shia vang'wa;
minwa chiavo chiahangalala.
Navutswa inzi Mwami Nyasaye navachipa;
inzi Mwami Nyasaye shinzitsanga khuvalekha tawe.
18Nzitsanga khukhola michela chikholomoshe khu vikulu viahangalala
khandi tsisieveye tsinyoleshe mu tsihoongo.
Niitsa khukalukhanyinya shiangalangwi khukwa litivwi lia matsi,
shivala shiumakanu khukalukhana khukwa shivala shi michela chikholomokhamu.
19Niitsa khuraaka mwichendanyama musala kwa ceda
munyenye, manimane nende musayituni.
Niitsa khuraaka mitarakwa mu shiangalangwi,
misiyenze nende chi tsipainati.
20Vandu valiitsa khulola nikanyalikha vamanye nu khwekakhu shindu
ndi inzi Mwami Nyasaye neye ukholi kenako,
Nyasaye, uli Mutakatifu wa Israeli neye wakhola kenako.”
Mwami Nyasaye Walechelitsa vanyasaye vu Vuvehi
21Yaka nako ku Mwami Nyasaye, Mwami wa Israeli, avoolanga,
“Munyi vanyasaye va vandu vi tsimbia tsindi,
vooli kachilanga nu mukhuyaala;
khakhuvooleli vulahi vwene!
22Leshi vavalere, vakhuvoolele kaliitsa khwikholekha.
Khuvoolelikhu vindu viakholekhanga khale,
nikanyalikha khuvimanye,
khandi khumanye kaliitsa khwikholekha;
inoho khuvoolelikhu havulavu katsitsanga khwikholekha.
23Khuvoolelikhu kaliitsa khwikholekha yaka nikamali khwikholekha,
nikanyalikha khumanye ndi nu munyi vanyasaye;
kholikhu shindu, shive shilahi inoho shitamanu,
nikanyalikha khutechele nu khuria.
24Navutswa lolikhu, munyi muli shindu shikhaya,
khandi muvula muhinzilu kwa munyala khukhola;
mundu usaalanga khu munyi akholanga shifwavi.
25“Mali khusona mundu khurula ivuluka, naye umali khwitsa;
mulala khurula ivukwi wa liuva lirulanga usaalanga khwinzi.
Aliitsa khutuuvachila vamihi hasi khuli ni malova,
khuli muloonji wi tsinyungu aswaalanga litohi.
26Ni viina wavoola havulavu kenako khurula muliraanga, nikanyalikha khukamanye,
khandi nikashili khwikholekha, nikanyalikha khuvoole yavoola likhola liu vulunji?
Mundu avulakhuho khali mulala khu munyi wavoola havulavu makhuva kenako,
avulakhuho wavoola makhuva kenako nikashili khwikholekha,
avulakhuho khali mulala wahulilakhu likhuva liosi khurula khu munyi.
27Ninzi waraanga khuvoola havulavu kenako mu Sayoni;
Ninzi waruma mu Yerusalemi murumwa khutsia khwilwatsa makhuva malahi.
28Navutswa lwa naheenza vulahi,
nimbula khulolakhu mundu;
avulakhuho khali mulala khu vanyasaye venavo wakhonya inganakani,
avulakhuho khali mulala wanjipakhu shindu
lwa na vareevanga.
29Loli, vanyasaye vavo voosi ni vavehi,
muhinzilu chiavo ni chi shikhaya;
misambwa chiavo chia valomba ni miteteshele
khandi chivula tsingulu tsiosi.”
Currently Selected:
ISAYA 41: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013