ISAYA 35
35
Muhaanda Kuhaananga Vutakatifu
1Lisangala liliitsa khuva mwichendanyama nende shivala shiumakanu,
shiangalangwi shilitsa khwikhoya nu khuneera khuli mawua;
2viliitsa khuneera mawua mu vunyishi,
khandi vilaanjilile nu khwimba tsinyimbo.
Viliitsa khunyola vukhumi khuli vwi Shikulu shia Lebanoni,
khandi vunyali khuli vwi Shikulu shia Karameli inoho Luhoongo lwa Sharoni.
Viliitsa khulola vukhumi vu Mwami Nyasaye,
vunyali vwa Nyasaye weru.
3Mutinyilitse vandu vateteshela,
mamukhonye vaheendanga mwoyo.
4Vooleli yavo vakhutsanga mwoyo,
“Muve ni tsingulu, muvuli khuria!
Loli, Nyasaye wenyu aliitsa khuvasinzila
yavo vamusalilitsanga.
Aliitsa khwitsa nu khumuhonyinya.”
5Nalwo lwa vandu vavekhula valiitsa khulola,
vandu vikala maroyi valihulila shia vavoolanga;
6nalwo lwa vandu valema valiitsa khusila sila nu khusieva;
yavo vakhinyalitsanga khulomoloma valimba tsinyimbo nivali nu vuyaanzi.
Matsi kaliitsa khurundukha mwichendanyama,
michela chiliitsa khukhalakanyila mu shiangalangwi.
7Muyeeshe kutuumanga muya kuliitsa khukwa litivwi lia matsi,
khandi havundu humakanu haliva ni tsisieveye tsia matsi.
Havundu ha vivwe vimenyanga haliitsa khukwa shitohi,
vunyasi vuliitsa khukalukhana khukwa vitundu nende liise.
8Khuliitsa khuvaho nu muhaanda mukalamu
kuliitsa khulaangwa “Muhaanda Kuhaananga Vutakatifu.”
Mundu mwoni avulakhuho uliitsa khuchendela khukwo;
navutswa kuliitsa khuva kwa vandu va Nyasaye;
mundu uli khu luchendo, inoho muyiingwa avulakhuho uliitsa khukoyana.
9Isimba ivulakhuho iliitsa khuvayo
inoho inyama indulu yumbulimu ilinyolekhayo,
navutswa vandu vahonyinywa valiitsa khuchendayo.
10Vandu vahonyinywa vu Mwami Nyasaye valiitsa khukalukha,
valiitsa khwitsa Sayoni nivimbanga tsinyimbo;
valiitsa khunyola likhoya li mihika ni mihika;
valiitsa khuva nu vuyaanzi nu khusangala,
shivaliitsa khuva nu vuveleli nivanyakhana mu mwoyo tawe.
Currently Selected:
ISAYA 35: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013