ISAYA 28
28
Likhuva khu Samaria
1Wooyi! Muli khu vutiinyu munyi vandu vilola
khandi vatandi varulanga mu lusomo lwa Efurahimu,
vukhumi vwenyu vukoranga khuli liwua linialanga!
Ni kilikali, vukhumi vulandanga mu luhoongo luli ni lilova linuulu,
lia vatandi vatanditswa idivai.
2Loli, Mwami Nyasaye wayirovolela mundu uli nu vunyali nende tsingulu;
neye uli khuli imbula ingali ya machina
nende yu vushindu vulitoho,
khuli imbuutsa inditoho,
khuli michelelo chia matsi chikholomokhanga;
aliitsa khuvisiuva ni tsingulu tsietsie khulilova.
3Vwiloli vwa vatandi va Efurahimu
vuliitsa khutuuvachilwa hasi;
4khali vukhumi vwavo vuliitsa khuvungulukha khuli liwua linialanga;
vukhumi vwalanda mu luhoongo luli ni lilova lilahi
vuliitsa khuva khuli matunda ku khuraanga khucheswa mumatukhu ki shimiyu;
mundu nakaloli, akatuulanga nu khukalia vwangu.
5Khulitukhu lienelo, Mwami Nyasaye wi Mikaanda Chiliihe
aliitsa khuva khuli itaachi yu vukhumi,
khuli shilemba shilahi shiene khu vandu veve
valiitsa khuva nivarikala mwoyo.
6Aliitsa khwimilila vakhalachi veve khukhola katoto,
nu khuha valindi vi litaala likali tsingulu.
Isaya nende Vaprofeti Vatandi va Yuda
7Navutswa valala vali muvo vatandanga idivai,
khandi vavoya voyanga shichila malwa;
khali musalisi nende muprofeti vatanda shichila malwa;
vakoyanyinywa shichila idivai;
vavoya voyanga shichila malwa;
vavoolanga vuvehi shichila malolo kavo;
visikarilanga lwa vaviritsanga viyaalo mushiina.
8Tsimesa tsiosi tsia yitsula masali;
khandi havundu havulakhuho ha vunihu vuli.
9Vakholelanga shihenye henye nivavoola,
“Ni viina wayechitsa vucheli,
ni viina wayivaalila likhuva?
Anyala khwechitsa yavo vonyene valeshitswa khununa maveele,
yavo varulitswa khu vakhali vanunyinyanga!
10Akhwechitsanga khuli vaana vati,
lilako nililonda lilako lindi,
luvaaso nu luvaaso,
khali yili na yelo!”
11Ni kilikali, niiva muliitsa khwambakhana khumbulishitsa,
Mwami Nyasaye aliitsa khulomoloma khu vandu veve yava
khuvirila mu vandu vi tsinomolomo tsindi,
valomolomanga tsinomolomo tsinjeni.
12Khali ndio, niiva yali wavalaaka,
“Niitsa khumumanyinya havundu ha munyala khuhulishila,
Munyi vamwachioka, niitsa khumukhola muhulushi;
hanu naho ha muliitsa khuhulushila.”
Navutswa vambakhana khumbulishitsa.
13Khulwa yako, navo valiitsa khwechitswa likhuva liu Mwami Nyasaye,
lilako nililonda lilako lindi;
indukuta ni indukuta,
luvaaso nu luvaaso,
khandi liechitso ni liechitso.
Muliitsa khwisikarila mu shia shindu shiosi shia mukholanga.
Muliitsa khusalilitswa, mulikumilwa nu mureeko,
nu khuvohwa mucheela.
Milembe chiu Vuvehi Chisalilitsanga
14Khulwa yako, munyi va muchayanga vandi, muhulishitsi ku Mwami Nyasaye avoolanga,
munyi va mwamihanga vandu mu Yerusalemi!
15Munyi mwichinjililanga numuvoola,
“Khwakhola lilakano ni likhutsa,
khandi khwahulishitsana ni shihatisi;
muvoolanga ndi lwa matiinyu kakwa shikanyala khumukwila tawe;
shichila mwakhola vuvehi khuva khuli shilushilu shienyu,
vukaati khuva khuli shiniikha shiu khwikamamu.”
16Mwami Nyasaye avoolanga,
“Loli, mbikhanga musinji mu Sayoni, kuliitsa khuva khuli lichina,
lichina liachelitswa, lichina liu vukuuli vululu liu mumbeka,
lichina liu musinji kwatoto;
lichina liahandikwakhu makhuva yaka,
‘Mundu uli ni lisuuvila woyo aliitsa khutsililila khwikhutsila.’
17Niitsa khurumishila katoto khuva khuli ikavilo yu khupimila,
niitsa khurumishila likhola liu vulunji khuli shindu shiu khupimila;
imbula ya machina iliitsa khweya shia vuvehi vwosi vwa musuuvililanga,
khandi michelelo chia matsi chiliitsa khwononyinya havundu ha mwilushilanga.”
18Nalwo lwa lilakano lienyu ni likhutsa liliitsa khukalukhanyinywa,
khandi ka mwahulishitsana ni shihatisi kalirulitswaho.
Lwa matiinyu kenako kaliitsa khwikholekha,
muliitsa khutivitswa.
19Shia matiinyu koosi kaliitsa khumukwila,
kaliitsa khumukuura;
shia mu mavwevwe koosi muliitsa khuvirilamu,
khali shia mbasu nu vutukhu;
muliitsa khutechela lwa muliitsa khuva numuhulilanga likhuva;
20shichila munyi muliitsa khuva khuli mundu uchelitsanga
khukona mu shitali shimbiha khuye,
khali shianyala khukololokha,
inoho khwivimba mulinjeti munyelele
kukhanyala khumuvimba tawe;
21shichila Mwami Nyasaye aliitsa khukwana khuli yakhola khu Shikulu shia Perazimu,
khandi nave nu vurima vululu khuli yavetsanga mu Luhoongo lwa Gibioni;
khukhola shikholwa shieshie --
shikholwa shieshie ni shiu khuchenyinya!
Nu khurweshitsa muhinzilu kwekwe,
muhinzilu kwekwe nu kukhuhuka.
22Khulwa yako, muleshe khuchaya vandi!
Niiva mulakhola ndio, matiinyu kaliitsa khumukwila makali muno
khuvira ka muvirilamu nunundi;
shichila mali khuhulila ndi Mwami Nyasaye wi Mikaanda Chiliihe
umali khuviritsa khuli atsitsanga khumulula shia shindu shiosi khulilova.
23Reechi maroyi kenyu muhulile kambolanga;
hulishitsi vulahi vwene kanomolomanga.
24Kanyala khuva katoto mundu ulimanga mulimi ku khuraakamu viraakwa atsilililanga khulima?
Ni kilikali atsilililanga khukupomola nu khukwirecheshitsa?
25Lwa avetsanga namali khukuuvusa,
araakamu vukuutsa vwi tsinyasi khuli vukuutsa vwi tsipila pili nende Kumimu.
Araakamu inganu nende ishayiri mu tsimbaso
khandi araakamu imu yindi khu tsindulu tsiu mulimi kwenoko;
26shichila yivaalilwa vulahi vwene;
Nyasaye wewe neye wamwechitsa.
27Vukuutsa vwi tsipila pili shiuvunyala khuhulakwa ni shikong'o,
inoho likaare khuchenditswa ikulu wa kumini tawe;
navutswa vukuutsa vwi tsipila pili vuhulakwangwa ni shisala,
khandi shikong'o nashio shihulanga Kumini.
28Imu isielelwangwa khulomba shiukhulia,
navutswa mundu shiachihulaakanga mihika ni mihika tawe;
Mundu achenditsanga likaare nende tsifarasi khuchendela khuyo,
navutswa shianyala khuchisionola tawe.
29Vucheli vu khuchenyinya yuvu
vurulanga khandi khu Mwami Nyasaye wi Mikaanda Chiliihe;
inganakani yeye ni yu khuchenyinya,
vusitsa vwevwe nu vwatoto.
Currently Selected:
ISAYA 28: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013