HAGAI 1

Lilako liu Khumbakha Vuyia Litempeli

1Khulitukhu liu khuraanga liu mweli wa sita khumuhika kwa khavili, nu kuli muhika kwa Dario wa Perisia yamihanga, Mwami Nyasaye yalomoloma nu Muprofeti Hagai. Yamuvoolela atsi khuvoolela Zerubabeli mwana wa Shalitieli, wali nali gavana wa Yuda nende Mukali wa vasalisi voosi Yoshwa mwana wa Yehozadaka, makhuva ka yali navooli.

2Mwami Nyasaye wi Mikaanda Chiliihe yavoolela Hagai, “Vandu yava vavoolanga ndi matukhu kashili khutukha ku khumbakha vuyia Litempeli lianje.” 3Nikhali Mwami Nyasaye umbolele inzi Muprofeti Hagai, 4“Munyala khuva mukholanga malahi lwa mumenyanga mu tsinzu tsienyu tsiumbakhwa vulahi vwene yetso, na Litempeli lianje yili liayeevulukha.” 5Mwami Nyasaye wi Mikaanda Chiliihe avoolanga, “Kanakanikhu nikava mukholanga malahi! 6Mwaraaka mu vunyishi, numuchesa viti; muliitsanga shiukhulia, navutswa khali shimutukhanga tawe. Mung'wetsanga, navutswa vuluhu shiuvuvwetsanga tawe. Mwifwalanga tsinguvu, navutswa khali mundu avulakhuho khu munyi unyolanga luya; khandi mundu unyolanga murungu akuvikhanga mu visikolo viahuutukha.”

7Mwami Nyasaye wi Mikaanda Chiliihe avoolanga, “Kanakanikhu nikava mukholanga malahi! 8Tikulushi mutsi nunundi mu vikulu, mulere misala, munzumbashile vuyia Litempeli, nikanyalikha mbe nu vuyaanzi nu khulolekha mu vukhumi vwanje.

9“Mwalindililanga khuchesa vinyishi, navutswa lolikhu khuli mwachesa viti. Lwa mwalera viraakwa vienyu ingo, navihuutsa huutsa. Shichila shina nikhola ndio? Shichila Litempeli lianje, liayeevulukha, navutswa shia mulala khu munyi anyakhanilanga inzu yeye. 10Nashio shivune shichilanga imbula nivula khukhuva viraakwa nivivula khumeela mu milimi. 11Ninzi walera shimiyu mu shivala khandi khu vikulu, khu viraakwa, khu idivai impia, khu makura, khandi khu shia shindu shiosi shimeelanga hasi mu malova, khu vandu nende tsing'ombe, khandi khu shia muhinzilu kwosi kwa mukholanga.”

Vandu Vahulila Lilako liu Mwami Nyasaye

12Nalwo lwa Zerubabeli mwana wa Shalitieli nende Mukali wa vasalisi voosi Yoshwa mwana wa Yehozadaka, halala na vandu voosi vali nivakalukha nivarula mu vuhaambe, valonda lilako liu Mwami Nyasaye, uli Nyasaye wavo. Valonda khandi makhuva ku Muprofeti Hagai yali navooli khuli Mwami Nyasaye, uli Nyasaye wavo yali namurumi; ma vandu nivahaana luyali khu Nyasaye. 13Nalwo lwa Hagai, wali murumwa wu Mwami Nyasaye yavoolela vandu likhuva liu Mwami Nyasaye. Yavoola, “Inzi ndi na munyi.” 14Mwami Nyasaye yatsuva Zerubabeli mwana wa Shalitieli, wali gavana wa Yuda, Mukali wa vasalisi voosi Yoshwa wali nali mwana wa Yehozadaka, halala na vandu voosi vali nivakalushi khurula mu vuhaambe khukhola muhinzilu khu Litempeli. Vitsa nivakhola muhinzilu khu Litempeli liu Mwami Nyasaye wi Mikaanda Chiliihe, uli Nyasaye wavo, 15khulitukhu lia makhomi kavili na kane liu mweli kwa sita, khumuhika kwa sita, lwa Mwami Dario yamihanga.

Currently Selected:

HAGAI 1: LLLPRO

Highlight

Copy

Compare