HABAKUKU 1
1
1Yili nalio likhuva liu Mwami Nyasaye yamanyinya Muprofeti Habakuku mu malolo.
Habakuku Yililila khu Nyasaye
2“Mwami Nyasaye, nu luhono shina
lwa niitsa khutsililila khulila ukhonye,
navutswa yivi wayambakhana khuhulishitsakhu?
Inoho khulila khu yivi shichila lisalilitswa,
navutswa uvulakhu lienya liu khukhuhonyinya.
3Shichila shina uchilanga nindola vindu vitamanu
nivikholekha?
Litivitswa nende lisalilitswa viambotokhana;
likwana nende lilembana vili shia havundu hosi.
4Khali ndio, malako kacheha tsingulu,
katoto kakhaywa khurweshitswa.
Vandu vatamamu vihonelanga vandu vi likhola liu vulunji,
khali likhola liu vulunji likoyanyinywangwa.”
Lichipu lia Nyasaye
5Nalwo lwa Nyasaye yavoolela vandu veve,
“Heenzikhu vandu vi tsimbia tsindi, mulole!
Muliitsa khuchenyinywa!
Muliitsa khuhuka;
shichila kholanga shindu nunundi numurelekhu tsimoni
shia muliitsa khuvula khusuuvila
khali nu muvoolelwa;
6shichila soonyinyanga Vababilonia,
vandu vuluhia lululu khandi luli vwangu!
Varoonjelanga khutsia khukwana vivala vindi
khali vavukula ni tsingulu malova kavo.
7Ni vandu varilwa khandi vatechelitsanga;
vene vikholelanga katoto nende malahi.
8“Tsifarasi tsiavo ni tsinyangu muno khuvira tsingoi;
tsindulu muno khuvira visusu vili ni inzala;
tsifarasi tsiavo tsisila silanga vwangu muno.
Vahili vatsio varulanga ihale wene;
Vasila silanga vwangu khuli shilitsa
ni shienyanga khuroonya khu shindu.
9“Mikaanda chia vasikali vavo vitsanga khusalilitsa;
vatechelitsanga vandu imbeli wavo.
Vakumilanga vavohe vanyishi
khuli vavunjitsanga muyeeshe.
10Vakholelanga vami shihenye henye,
khali vachayanga vamihi.
Vihenye henyelanga shia imbinga yosi,
shichila vavunjitsanga malova nivavukula shivala.
11Nalwo lwa vaviraho vwangu khuli vushindu;
vakholanga vindu vitamanu kalolekha nu vutamanu,
shichila tsingulu tsiavo neye nyasaye wavo!
Habakuku Yililila khu Nyasaye lwa Khavili
12“Kanyala khuva nivi Mwami Nyasaye,
khurula khale?
Nivi Nyasaye wanje, Mutakatifu wanje.
Shiukhunyala khukhutsa tawe.
Mwami Nyasaye, nivi warovola Vababilonia khukhukhalachila.
Yivi uli khuli Lwanda lwanje,
wavaha tsingulu tsiu khukhusalilitsa.
13Yivi uli mutakatifu muno, shiuheenzanga khu vutamanu,
khali uvula lienya liu khulola vindu vitamanu nivikholekhanga.
Shichila shina ulolanga vandu vatamanu
nivatambitsa mundu wi likhola liu vulunji khali uhonjela,
lwa vandu vatamanu vativitsanga vandu vali valunji khuvavira?
14“Nivi wu kholanga vandu khuva khuli tsisutsi mu inyanza,
khuli vindu vimolanga hasi vivula mwimilili!
15Vababilonia vakumilanga vandu ni ingaka, khuli ni tsisutsi;
ni vavakhwesa ni ineti yavo;
va vavunjelitsanga mu ineti ingali yavo,
khandi vayaanza nivasangala.
16Khali vakholelanga ineti yavo misango,
nivasambila ineti ingali yavo vubani;
shichila natsio tsichilanga nivamenya limenya liu khwiyaanzilila,
nivalia shiukhulia shilahi shiene.
17“Vanyala khutsililila khwalaminya ineti yavo,
nu khwiira vandu vi tsimbia tsindi
vuchila tsimbavasi mihika ni mihika?”
Currently Selected:
HABAKUKU 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
