ESITA 5
5
Ka Esita Yareeva Mwami Ahaseru Amukholele
1Khulitukhu lia khavaka Esita yifwala tsikaanzu tsietsie nasinjila hakari hu lwanyi lwi inzu yu vwami, khuluveka lundi lwa havundu hi shisoko shiu vwami shili. Mwami Ahaseru yali nali havundu henaho mukari, niyikhale khu shisoko shiu vwami naheenzi khuluveka lu muliango ku khwinjililamu. 2Lwa Mwami Ahaseru yalola Muruchi wi shikhali Esita nasinjile mu lwanyi, yayaanzitswa naye, manamuchela ni indovoshi yu vwami yalombwa khu itsahabu. Khu, Esita yisuunda khuye manatiila khuvutoonje vwi indovoshi yeneyo. 3Mwami Ahaseru yamureeva, “Muruchi wi shikhali Esita, ni shina? Mbolela shia wenyanga khukholele? Nakhuha shia wenyanga, khali inusu yu vwami vwanje.”
4Nalwo lwa Esita yachipa, “Yivi Mwami Ahaseru, niiva kakhuyaanzitsanga, nakhikombi yivi nende Hamani munjenihi vutukhu vunu mu mulukha kwi lilia lia mali khumulombela.”
5Nalwo lwa Mwami Ahaseru yavoola, “Voolela Hamani yitsi vwangu, nikanyalikha khukhole ka Esita yikombanga kakholwi.” Mwami Ahaseru nende Hamani vasimukha nivatsia mu mulukha kwi lilia lia Esita yali navalombele. 6Lwa vali nivang'wetsanga idivai, Mwami Ahaseru yareeva Esita, “Mbolela shia wenyanga khuhe? Ulaheelwa shia wenyanga. Ni shina shia wenyanga khukholele? Narweshitsa ka wenyanga kakholwi, khali niiva ulandeva inusu yu vwami vwanje.”
7Esita yachipa, “Kholela kandi nako mu mwoyo yaka, 8Niiva yivi Mwami Ahaseru wenyanga khukholela kakhureevi, nakhayaanzi yivi nende Hamani munjenihi mukamba mu mulukha kwi lilia kundi kwa nzitsanga khumulombela. Namuvoolela shia nyenyanga khulitukhu lienelo.”
Hamani Yalolela Modekai Vurima
9Hamani yarula mu mulukha kwi lilia nu vuyaanzi khandi nasangalanga mu mwoyo. Navutswa lwa yalola Modekai nali ha shilivwa shi inzu yu vwami, yaheenza nalola Modekai shiamusinjilili inoho khumuha luyali tawe; Hamani yamulolela vurima. 10Navutswa Hamani yilinda mwene vulahi natsia ingo. Yalaanga valina veve ingo wewe navoolela mukhali wewe Zereshi khwitsa khwiyunga navo. 11Hamani yichinjilila khuvo shichila miandu chiali nachio, vaana veve vi shiyayi vanyishi, khuli Mwami Ahaseru yali niyamuha muhinzilu ku vunyali, khandi khuli yali niyaheelwa luyali lukali muno khuvira vimilili nende varumishi vu Mwami Ahaseru. 12Hamani yatsililila khuvoola, “Shikali kenako konyene vutswa tawe. Khali Muruchi wi shikhali Esita shiyalaangakhu mundu wundi wosi mu mulukha kwi lilia nikakhali inzi nende Mwami Ahaseru, navo va yalaanga mu mulukha kwi lilia lia yali niyakhola. Inzi halala nu Mwami Ahaseru khulaanjilwi khandi mukamba mu mulukha kwekwe kwi lilia. 13Navutswa kenako koosi kavula vukhonyi khwinzi, lwa Muyahudi Modekai atsilililanga khwikhala ha shilivwa shiu Mwami Ahaseru.”
14Nalwo lwa mukhali wewe Zereshi nende valina veve vamuvoolela, “Lekha misala chili ni tsimita makhomi kavili khutsia ikulu chisimiishwi, ma uvoolele Mwami Ahaseru asunjikhu Modekai mu mavwevwe. Numali khukhola kenako, ulatsia mu mulukha kwi lilia, halala nu Mwami Ahaseru nuli nu vuyaanzi.” Inganakani yeneyo yayaanzitsa Hamani, nahaana lilako misala chienecho chisimiishwi.
Currently Selected:
ESITA 5: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013