ESITA 3
3
Khuli Hamani Yenya Khutivitsa Vayahudi
1Lwa vindu vienevo viakholekha, Mwami Ahaseru yachinguula Hamani nali mwitsukhulu wa Agagi khu muhinzilu ku vunyali; Hamani yali mwana wa Hamedatsa. Mwami Ahaseru yamuha shisoko shiu luyali lukali khuvira vimilili vandi voosi va yamihanga navo. 2Varumishi voosi vu Mwami Ahaseru vali nivali ha shilivwa vasikama manivinamila Hamani khulu khumuha luyali; shichila Mwami Ahaseru yahaana lilako vakhole kenako. Navutswa Modekai yambakhana khusikama inoho khumwinamila khulu khumuha luyali. 3Nalwo lwa varumishi vu Mwami Ahaseru vali nivali ha shilivwa shiu Mwami Ahaseru vareeva Modekai, “Shichila shina wambakhane khulonda lilako liu Mwami Ahaseru?” 4Shia litukhu vali vamenya nivalomolomanga khuye; navutswa yambakhana khuvahulishitsa. Khulwa yako, vavoolela Hamani makhuva kenako khwenya khulola niiva anyala khutsililila khwikhutsila mwiima kwa Modekai; shichila Modekai yali uvavoolele ndi nu Muyahudi. 5Lwa Hamani yalola ndi Modekai wambakhane khusikama inoho khumwinamila khulu khumuha luyali; yali mululu muno. 6Navutswa Hamani yali ni lienya liu khusalilitsa Modekai wonyene vutswa. Khulwa yako, lwa yavoolelwa vandu va Modekai yivulwamu, Hamani yakhava khuli anyala khwiira Vayahudi voosi, shia havundu hosi mu shivala shiu Mwami Ahaseru yamihanga.
7Khumweli ku khuraanga, nu kuli mweli kwa Nisani, khumuhika kwi likhomi na chivili kwa Mwami Ahaseru yamihanga, shia litukhu Hamani yahaananga lilako ikura ikhuvwi (Vachilaanganga, “Puri”). Vali vamenya nivachikhuvanga shia khu mweli khutukha khu mweli kwi likhomi na chivili, nu kuli mweli kwa Adari.
8Nalwo lwa Hamani yavoolela Mwami Ahaseru, “Vandu vandi vali munu vasalana khandi vayiyahula haluveka mu tsisomo tsiosi mu shivala shia wamihanga. Vali na malako lukanu vutswa khurula khu malako ka vandu vi tsimbia tsindi, khandi vambakhananga khulonda malako koko yivi Mwami Ahaseru. Khulwa yako, vulava vutamanu nutsililila khwikhutsila ka vakholanga. 9Niiva ka khuyaanzitsanga yivi Mwami Ahaseru, haana lilako liu khuvativitsa; khandi ninzi urunga ifetsa inyishi khuvira tsikilo 10,000 khurula mu livishilu liu vwami khu vandu vakhola muhinzilu kwenoko.”
10Mwami Ahaseru yanavula ipete yeye ya yarumishilanga yu muhuuli khu shitere shieshie, naha Hamani mwana wa Hamedatsa, wali mwitsukhulu wa Agagi, wali nali mutsiku wa Vayahudi. 11Mwami Ahaseru yavoolela Hamani, “Uheelelwi tsisenti nende vandu, wu vakhole ka khuyaanzitsanga.”
12Nalwo lwa vakarani vu Mwami Ahaseru valaanga halala khulitukhu li likhomi na khavaka liu mweli kukhuraanga. Likhuva liahandikwa khu vamihi vu Mwami Ahaseru, vagavana vi tsisomo, khandi khu vimilili va vandu voosi, khu shia lusomo mululomolomo lwa vandu vamenyanga mulwo, khandi khu shia mundu mululomolomo lwelwe, khulondokhana khuli Hamani yali navooli. Likhuva lienelo liahandikwa khuvirila khu lira liu Mwami Ahaseru, manilituuywakhu muhuuli kwi ipete yeye. 13Vilukhachi vahila lilako lienelo mu tsisomo tsiosi tsiu mu shivala shienesho. Lialimu na mivaalo ndi khulitukhu lilala, nilili litukhu li likhomi na khavaka liu mweli kwa Adari, Vayahudi voosi -- vatititi nende vahindila, vakhali nende vaana -- kenyekhanga viirwi. Venyekhanga vasinzwi, vuchila khuvelwa tsimbavasi, mavavanuuli miandu chiavo. 14Makhuva kahandikwa kahaanwa kasomwi shia havundu hosi mu tsisomo tsi shivala shienesho, khwenya shia mundu yirecheshele litukhu lialaakwa.
15Vandu vilukhaka nivatsia khulanditsa likhuva lienelo khulondokhana khu lilako liu Mwami Ahaseru yahaana; lilako lienelo liahaanilwa mu lwanyi lwi litaala lia Susa. Mwami Ahaseru nende Hamani vikhala hasi manivang'wa; navutswa shileeche shiraanjitswa mu litaala lia Susa.
Currently Selected:
ESITA 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013