ESITA 2
2
Esita Yakholwa khuva Muruchi wi Shikhali
1Lwa vindu vienevo viavira, lwa vurima vu Mwami Ahaseru vwali navuchehi, yitsushitsa Muruchi wi shikhali Vashiti, ka yali nakholi khandi lilako liali ni liahandichwi khulondokhana khuye. 2Nalwo lwa varumishi vakhonyanga Mwami Ahaseru vavoola, “Khwikombanga Mwami Ahaseru akhavilwi vakhana vavukha vashili vachima vakaasa likoondo. 3Nu vulahi Mwami Ahaseru narovole vimilili khurula mu shia lusomo lwi shivala shia yamihanga valere mu inzu ya vandu vakhali mu litaala lia Susa vaana vi shikhana voosi vachima vakaasa likoondo. Mundu ulaangwangwa Hegai, nali shitsili shirumishilanga Mwami Ahaseru, usinjililanga vakhali neye ulinda vakhana venavo; khandi vaheelwi makura ku khwivekha nende vindu vindi vinyala khuvalomba vakase muno. 4Nu vulahi mwana wi shikhana uyaanzitsa Mwami Ahaseru arovolwi khuva Muruchi wi shikhali mu vwiyangu vwa Vashiti.” Inganakani yeneyo yayaanzitsa Mwami Ahaseru, nakhola ka yavoolelwa.
5Muyahudi mulala walaangwangwa Modekai khurula mu vandu vuluhia lwa Benyamini, mwana wa Yahiru yali wamenya mu litaala lia Susa. Yahiri yali mwana wa Shimei, mwana wa Kishi; 6wa Mwami Nebukadineza wa Babilonia yarulitsa Yerusalemi, halala nu Mwami Yekonia wa Yuda nende vavohe valala nivahilwa mu vuhaambe. 7Modekai yali nu musiala wewe walaangwangwa Esita, wi lira lielie lindi Muluhebrania ni Hadasa; khandi Esita yali wakaasa likoondo khandi yali nu mmbili mulahi. Lwa vivuli va Esita vakhutsa, Modekai yavukula Esita namutushitsa khandi namukhola khuva khuli mwana wewe.
8Lwa lilako liu Mwami Ahaseru lialanditswa havulavu, vakhana vanyishi valerwa mu litaala lia Susa; manivavikhwa mu makhono ka Hegai khuvalinda. Khali Esita yahilwa mu inzu yu vwami yu Mwami Ahaseru nivaha Hegai, nali mundu wasinjililanga inzu ya vakhali vunyali vu khumulinda. 9Hegai yayaanzitswa na Esita, khali Hegai namukholela koosi ka yenyanga akholelwi. Vuchila khwononyinya vwiyangu, yamuha makura ku khwivekha nende shiukhulia. Yamuha havundu halahi hene mu inzu ya vakhali vamenyamu; narovola varumishi vakhana saba vanyala khumurumishila khurula mu inzu yu vwami.
10Esita yali wavisa lwivulu nende luhia lwelwe lwarulamu, shichila Modekai yali wamukaya khuvoola kenako. 11Shia litukhu Modekai yali wamenya nakonya konyanga halwanyi lwi inzu ya vakhali vamenyamu alole khuli Esita atsilililanga mu limenya lielie khandi khumanya kakholekhanga khuye.
12Lwa vwiyangu vwa shia mwana wi shikhana khwinjilamu khulola Mwami Ahaseru vwatukha, mwana wi shikhana mwenoyo namali muhinzilu kwenyekhanga khulondokhana khu mwiima kukhwilomba khwa vakhali, nichili mieli sita chiu khwivekha makura ka manemane khandi mieli chindi sita chiukhwive kha makura kandi vutswa. 13Lwa mwana wi shikhana yinjilamu khutsia khulola Mwami Ahaseru, yaheelwa shia shindu shiosi shia yenyanga khurula mu inzu ya vakhali vamenyamu mahila mu inzu yu vwami yu Mwami Ahaseru. 14Mwana wi shikhana yinjilamu khutsia khulola Mwami Ahaseru halukolovo; khandi litukhu lialondakhu mu mavwevwe yakalukhanga munzu yindi ya vakhali vamenyamu, mavikhwa mu makhono ka Shahashigazi avalinde, nali shitsili shiasinjililanga vakhali vamenyinywa vu Mwami Ahaseru. Mwana wi shikhana niyakharulayo, shiyakalukhanga khulola Mwami Ahaseru tawe; nikakhavele umuyaanzi muno mamulaanje lira lielie.
15Lwa vwiyangu vwa Esita wali mwana wi shikhana wa Abihaili nali khootsa wa Modekai, wali niyamuvukula khuva khuli mwana wewe khwinjilamu khutsia khulola Mwami Ahaseru vwatukha; shiyareevakhu shindu shiosi tawe, nikakhavele ka Hegai, wali shitsili wasinjililanga vakhali yamuvoolela akhole. Esita yali wayaanzitswa nu mundu wosi wamulolakhu. 16Esita yahilwa khu Mwami Ahaseru mu inzu yu vwami ya yamenyamu khu mweli kwi likhomi, nu kuli mweli kwa Tebetsi, khumuhika kwa saba muliamiha lielie. 17Mwami Ahaseru yayaanza muno Esita khuvira vakhana vandi voosi; yamulolela tsimbavasi khandi namukholela ka yenyanga khuvira vachima vandi voosi. Khulwa yako, Mwami Ahaseru yafwala Esita ikofia yu vwami namukhola khuva Muruchi wi shikhali mu vwiyangu vwa Vashiti. 18Nalwo lwa Mwami Ahaseru yakholela vimilili vamukhonyanga muhinzilu halala na varumishi veve mulukha mukali kwi lilia; vakhola mulukha kwi lilia kwenoko khulu khuha Esita luyali. Mwami Ahaseru yarulitsayo mirungu chiu vushuru mu tsisomo tsiosi nahaana vihanwa via vami vatukhananga vahaane.
Modekai Yahonyinya Mwami Ahaseru
19Lwa vakhana vachima vivunjelitsa halala lwa khavili, Modekai yali niyikhale ha shilivwa shiu Mwami Ahaseru. 20Navutswa Esita, yali wavavisa lwivulu nende luhia lwelwe, khulondokhana khuli Modekai yali niyamukaya; shichila Esita yalondanga malako ka Modekai khuli yakholanga lwa yamutushitsa.
21Mumatukhu kenako, lwa Modekai yali niyikhale ha shilivwa shiu Mwami Ahaseru, vandu vavili khu vitsili viu Mwami Ahaseru, nivali vandu valindanga havundu ha vahulachilanga imu. Vitsili vivili vienevo vali nu vurima manivakhava khuli vanyala khwiira Mwami Ahaseru. 22Navutswa Modekai yavoolelwa makhuva kenako, navoolela Muruchi wi shikhali Esita; Esita neye wavoolela Mwami Ahaseru ka Modekai yali namuvoolele. 23Lwa varunishitsa makhuva kenako, nikalolekha khuva katoto, vandu vavili venavo vasungwa khu misala. Makhuva kenako koosi kahandikwa mu shitabu shi Tsinyinga imbeli wu Mwami Ahaseru.
Currently Selected:
ESITA 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013