MWILWATSI 3
3
Shia Shindu ni Tsinyinga Tsiene
1Shia shindu shiosi shikholekhanga mumatukhu ka shialaakwa,
khandi shia likhuva likholekhanga mu isaa yalio;
2khuliho ni isaa yu khwivulwa nende isaa yu khukhutsa;
isaa yu khuraaka nende isaa yu khuchesa;
3Isaa yu khwiira nende isaa yu khuhonyinya;
isaa yu khupomolanyinya nende isaa yu khumbakha;
4Isaa yu khuva nu vuveleli nende isaa yu khuyaanza;
isaa yu khwikhula nende isaa yu khusieva.
5Isaa yu khulomba vulina nende isaa yu khuvula khulomba vulina;
isaa yu khukhumbelana nende isaa yu khuvula khukhumbelana.
6Isaa yu khunyola nende isaa yu khukoritsa;
isaa yu khuvikha vulahi nende isaa yu khwononyinya vutswa,
7Isaa yu khurandulanyinya nende isaa yu khunaava;
isaa yu khuhonjela nende isaa yu khulomoloma;
8isaa yu khuva nu vuyaanzi nende isaa yu khuhimana;
isaa yu khukwana nende isaa yu khuva ni milembe.
9Nu vukhala shina vwa mundu anyolanga khurulana khu muhinzilu kwa akholanga nacheemulila? 10Mali khulola misiko militoho chia Nyasaye atiukhanga vandu. 11Neye walomba shia shindu shiosi khuva shilahi mu isaa yenyekhanga. Khali ndio, wavikha mu mundu vuuha vu khumanya kaliitsa khwikholekha, navutswa wamwiima vucheli vu khumanya vikholwa vievie, khuraanjila muliraanga khutukha mulimalilikha. 12Manyi vulahi ndi shindu shivulakhuho shilahi khu vandu, khuvira khuva nu vuyaanzi khandi khumenya limenya lilahi liu khuyaanzitswa khumatukhu koosi ka vashili mwoyo mu shivala shinu. 13Khutsi voosi khutukha khulii nu khung'wa, khandi khwikhoyele shia khunyolanga khurulana khu muhinzilu kwa khukholanga nu khuchemulila; shichila ni shihanwa shia Nyasaye. 14Manyi vulahi ndi shia shindu shiosi shia Nyasaye akholanga shiliitsa khuvaho mihika ni mihika. Shindu shivulakhuho shinyala khumeetwakhu inoho khurulitswakhu. Nyasaye washilomba muliiva lienelo, khu vandu vamuhe luyali. 15Shia shindu shiosi shiliho nunundi, shialiho khurula khale; khandi shiliitsa khuvaho, shialiho khurula muliraanga; khandi kikholekha mumatukhu kakhale, kaliitsa khulerwa imbeli wa Nyasaye.
Vutamanu Vukholekhanga mu Shivala
16Khumeeta khu kenako, nayitsa khunyola ndi mu shivala shinu havundu ha katoto kali, naho ha vutamanu vunyolekhanga; khandi havundu hi likhola liu vulunji likholekhanga, naho ha vutamanu vunyolekhanga. 17Nakanakana nimbola, “Nyasaye aliitsa khukhalachila vandu vi likhola liu vulunji nende vatamanu; shichila wamala khuviritsa isaa ya shia shindu shiosi shikholekha, khandi isaa yu muhinzilu kwosi kukholekha.” 18Nakanakana mu mwoyo nimbola ndi Nyasaye achelitsanga vandu, khuvamanyinya ndi vali vutswa khuli tsinyama tsiumbulimu. 19Khali ndio, kaliitsa khukwila vandu, nako kaliitsa khukwila khandi tsinyama tsiumbulimu. Mundu akhutsanga, khandi tsinyama tsiumbulimu tsikhutsanga. Mundu yesesanga miuya, khandi tsinyama tsiumbulimu tsiesesanga. Mundu ali vutswa khuli tsinyama tsiumbulimu, shichila shia shindu shiosi ni shikhaya vutswa. 20Vandu vatsitsanga havundu halala hele ni tsinyama tsiumbulimu. Vandu valoongwa khu malova; khandi tsinyama tsiumbulimu tsialoongwa khu malova; nikhali viosi vikalukhanga khandi khu malova. 21Ni viina wamanya, nikava mwoyo ku mundu kutsitsanga mwikulu inoho kwi inyama yumbulimu kutsitsanga hasi mwilova? 22Nalwo lwa niitsa khumanya ndi shindu shivulakhuho shilahi shiu mundu anyala khukhola khuvira khuva nu vuyaanzi khu muhinzilu kwekwe kwa mwene akholanga; shichila nakwo kwa yenyekhanga khurweshitsa. Ni viina unyala khuvoolela mundu kaliitsa khwikholekha khuye, namali khukhutsa?
Currently Selected:
MWILWATSI 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013