LITSUSHITSWA 9

Vandu Vambakhana Khulonda Malako

(Khur 32:1-35)

1“Munyi Vaisraeli, muhulishitsi! Muli himbi nunundi khutsia khwambukha Muchela kwa Yorodani, mamuvukule shivala shia vandu vi tsimbia tsindi vi tsingulu tsinyishi khuvira tsienyu. Mataala kavo ni makali, khandi kayumbakhwa na masisi maraambi katukhanga khu malesi. 2Vandu vamenyayo ni varaambi khandi vali ni tsingulu; ni vitsukhulu va Anakimu, khuli mwamanya. Mwahulila kavoolwa khulondokhana khuvo, ‘Ni viina unyala khuvakwana?’ 3Navutswa nunundi kenyekhanga mumanye ndi Mwami Nyasaye, uli Nyasaye wenyu, aliitsa khumwimilila imbeli, khuli mulilu kumemanga nu kulaalitsa shia shindu shiosi. Aliitsa khuvakuura lwa muliitsa khuva numwisuundanga wa vali, khu muvakhunji khurulamu nu khuvativitsa vwangu, khuli ye mwene yalaaka aliitsa khukhola.

4“Lwa Mwami Nyasaye, uli Nyasaye wenyu, aliitsa khuvakhungamu imbeli wenyu, muleshe khwivoolela, ‘Vulunji vwakhuli navwo vuchilanga Mwami Nyasaye, nakhulera mu shivala yishi.’ Navutswa muliitsa khuvoola ndi vwoni vwa vandu vi tsimbia yitsi navwo vuchilanga Mwami Nyasaye navakhunga mu shivala shiavo vene, khu khutsi khumenye mushio. 5Shikali mutsitsanga khuvukula shivala shiavo shienesho, shichila muli valunji inoho valahi tawe; navutswa shichila vwoni vwa vandu venavo navwo vuchilanga Mwami Nyasaye, navakhunga mu shivala shiavo, shia yisuuha nalaaka aliitsa khuha vakuuka venyu Aburahamu, Isaka nende Yakobo. 6Kenyekhanga mumanye ndi Mwami Nyasaye, uli Nyasaye wenyu, amuheetsanga shivala shilahi shienesho, shichila mutushili khunyola tawe; navutswa muli vahaaka.

7“Mwitsushitse khandi muvuli khwivilila khuli mwalomba Mwami Nyasaye, uli Nyasaye wenyu, khumuvukulila vurima, numuli mu shiangalangwi. Khuraanjila khulitukhu lia mwarula mu shivala shia Misri khutukha nunundi, muhinganyinyi Mwami Nyasaye. 8Khali lwa mwali numuli ha Shikulu shia Sinai, mwachila Mwami Nyasaye namuvukulila vurima -- yamulolela vurima vunyishi, khali niyenya khumutivitsa. 9Lwa natikulukha khu shikulu ninzia khunyola machina kakhongwa ki lilakano liu Mwami Nyasaye yalomba na munyi liali ni lia handikwakhu; namenyayo khumatukhu makhomi kane mbasu nu vutukhu, vuchila khuliakhu inoho khung'wakhu matsi. 10Nalwo lwa Mwami Nyasaye yamba machina kakhongwa kavili, ka yali niyahandikakhu mwene makhuva ka yamuvoolela khuvirila mu mulilu, khulitukhu lia mwakanila ha Shikulu shia Sinai. 11Lwa matukhu makhomi kane, mbasu nu vutukhu kali nikakhavwa, Mwami Nyasaye yamba machina kavili kakhongwa kenako, machina kakhongwa ka yali nikayahandikakhu lilakano.

12“Mwami Nyasaye yambolela, ‘Yikha vwangu khurula khu shikulu, shichila vandu vovo va warulitsa mu shivala shia Misri, vakoyani khandi vakholi vwoni. Vambakhane khulonda malako ka navavoolela valonde, khandi vilombele vene shifwanani shiu musambwa.’

13“Mwami Nyasaye yambolela khandi, ‘Ni kilikali, vandu yava ni vahaaka. 14Lekha vativitsi khu vavuli khwitsushitswa mu shivala. Niitsa khumukhola khuva luhia lwi tsingulu khuvavira.’

15“Nishevukha ninzikha khurula khu Shikulu, mumatukhu ka shiali nishiakhanga mulilu; nali ningumile machina kavili kakhongwa, ki lilakano liali ni liahandikwakhu. 16Lwa naheenza, nalola ndi mukholele Mwami Nyasaye, uli Nyasaye wenyu vwoni; mwali mwilombele shifwanani shiasasanga khuli shimoli shihunwa khu shivia. Mwambakhana khulonda malako ku Mwami Nyasaye, yali navooli mulonde. 17Navukula machina kavili kakhongwa kenako manisiuva hasi; katong'oshela imbeli wenyu. 18Nakwa hasi khandi mahunama imbeli wu Mwami Nyasaye khumatukhu makhomi kane mbasu nu vutukhu, vuchila khuliakhu inoho khung'wakhu shindu shiosi. Niitsa khukhola ndio, shichila mwali numukholele Mwami Nyasaye vwoni, khandi mumulombi khuva nu vurima. 19Naria shichila Mwami Nyasaye, yali nu vurima vululu, khandi nava mululu muno khali khwenya khumutivitsa. Navutswa Mwami Nyasaye yambulishitsa khandi. 20Mwami Nyasaye yalolela vurima Haruni khandi niyenya khumutivitsa, navutswa nasaalila Haruni khandi khumatukhu malala kenako. 21Navukula khandi shindu shiachila numukhola vwoni, shia mwali numulombi shienesho, nishili shimoli shihunwa, manisamba mu mulilu. Nashitong'olanyinya, khandi nisia nishikwa khuli lukuush. Nasiuva mu muchela kwa kholomokhanga khurula khu shikulu.

22“Mwachila khandi Mwami Nyasaye, uli Nyasaye wenyu, namuvukulila vurima lwa mwali numuli mu mataala ka Tabera, Masa, nende Kiburotsi-hatava. 23Lwa Mwami Nyasaye yamuruma khurula mu litaala lia Kadeshi-bareneha, khutsia khuvukula shivala shia yali natsitsanga khumuha, mwamuhanganila. Mwambakhana khusuuvila muye inoho khulonda malako keke. 24Munyi mwahinganila Mwami Nyasaye khumatukhu koosi khurula nimumanya.

25“Nakwa hasi mahunama imbeli wu Mwami Nyasaye khumatukhu makhomi kane mbasu nu vutukhu, shichila Mwami Nyasaye yali ninganakani yu khumutivitsa. 26Nasaala khu Mwami Nyasaye nimbola, ‘Mwami Nyasaye, lekha khutivitsa mwene vandu vovo, vandu va wahonyinya khandi nurulitsa mu shivala shia Misri, khuvirila mu tsingulu tsiotsio nende vunyali vwovwo. 27Yitsushitsa varumishi vovo, Aburahamu, Isaka nende Yakobo; uvuli khuheenda mwoyo shichila mahingani, vutamanu nende vwoni vwa vandu yava vakholi. 28Nikakhavele ndio, Vamisri valiitsa khuvoola wali wakhaywa khuhila vandu vovo mu shivala, shia yivi mwene wali nu walaaka uliitsa khuvaha. Valiitsa khuvoola ndi wahila vandu vovo mu shiangalangwi khwiirilamu, shichila vambakhana khukhuyaanzitsa. 29Navutswa ni vandu vovo va mwene warovola, khandi nurulitsa mu shivala shia Misri, khuvirila mu tsingulu tsinyishi khandi vunyali vwovwo.’

Currently Selected:

LITSUSHITSWA 9: LLLPRO

Highlight

Copy

Compare