LITSUSHITSWA 29

Lilakano Liakholwa Vuyia

1Yaka nako makhuva ki lilakano liu Mwami Nyasaye yavoolela Musa akhole na Vaisraeli nivali mu shivala shia Moabu, khumeeta khu lilakano lia yali niyakhola navo ha Shikulu shia Sinai.

2Musa yalaanga halala Vaisraeli voosi navavoolela, “Munyi vene mwalola ku Mwami Nyasaye yakhola Mwami wa Misri, varumishi veve, nende vandu vi shivala shieshie voosi. 3Mwalola matiinyu makali, viloleshitsu nende vindu viu khuchenyinya via yakhola. 4Navutswa khali khutukha nunundi Mwami Nyasaye ashili khumuha vucheli vu khumanya inoho tsimoni tsiu khulola inoho maroyi ku khuhulila. 5Ninzi wamwimilila khukhalakanyila mu shiangalangwi khumihika makhomi kane. Tsinguvu tsienyu tsiali nitsishili khurandukha inoho vilaaro via mwifwalanga khurandukha. 6Mwali numushili khuliakhu mukati inoho khung'wakhu idivai inoho malwa khu mumanye ndi Mwami Nyasaye neye Nyasaye wenyu. 7Lwa khwatukha havundu hanu, Mwami Sihoni wa Heshiboni nende Mwami Ogu wa Bashani vakhukwana, navutswa khwavakuura. 8Khwavukula shivala shiavo manukhuha vandu vi tsimbia tsia Rubeni, Gadi, khandi inusu ya vandu vuluhia lwa Manaase khumenyamu. 9Khulwa yako, muve vacheli mulonde nu mwoyo kwosi makhuva ki lilakano yili, khu munyole likuura mu shia shiosi shia mukholanga.

10“Munyi voosi musinjile imbeli wu Mwami Nyasaye, uli Nyasaye wenyu -- imbeli wa vimilili venyu, varumishi venyu vasakhulu venyu, nende Vaisraeli vandi voosi, 11vaana venyu nende vakhali venyu, khandi vacheni vamenyanga mu munyi, va mwisiachilanga tsikhuyi khandi vamuchinjila matsi. 12Muli hanu nunundi khusanga mu lilakano liu Mwami Nyasaye, uli Nyasaye wenyu akholanga na munyi khandi khuhuchilila khukhola ka yenyanga, 13khu amuhuchilile nunundi khuva vandu veve, khandi ave Nyasaye wenyu khuli yali niyalaaka vakuuka venyu Aburahamu, Isaka, nende Yakobo. 14Kholanga lilakano yili, halala ni lilaaka, shikali na munyi vonyene vutswa 15vamusinjile hanu nunundi na khutsi imbeli wu Mwami Nyasaye, uli Nyasaye weru tawe; navutswa khali na yavo vashili khusinjilakhu hanu nunundi.

16“Munyi vene mwamanya khuli khwamenyanga, nu khuli mu shivala shia Misri, khandi khuli khwa khalakanyila mu vivala via vandu vi tsimbia tsindi, khu luchendo lweru khutukha hanu. 17Mwalola misambwa chiavo mitamanu nende vifwanani vi shifwavi vialombwa khu musala, machina, ifetsa, nende itsahabu. 18Muheenzelitsi mulole ndi mundu avulakhuho mu munyi, ave musatsa, mukhali, vandu vu munzu inoho luhia lwa vandu vasinjile hanu nunundi, uliitsa khwambakhana khusuuvila mu Mwami Nyasaye, uli Nyasaye weru; khandi asaale khu vanyasaye va vandu vi tsimbia tsindi. Kaliitsa khwikholekha khuli muuli kumeelanga kuva shiraakwa shilulu khandi shiu vutsiva. 19Muheenzelitsi mulole ndi mundu avulakhuho mu munyi nunundi, uliitsa khuhulila makhuva khulondokhana khu lisuuhitswa yili, nu khwivoolela mwene ndi makhuva kenako ni malahi, khali niiva numukoyanu. Yaka kaliitsa khwononyinya munyi voosi, kave muli valahi inoho vatamanu. 20Mwami Nyasaye aliitsa khuvula khusemeha mundu khuli mwenoyo. Nikhali, aliitsa khumuvukulila vurima, khandi matiinyu koosi kahandikwa mu shitabu yishi kaliitsa khumukwila, khutukha lwa Mwami Nyasaye aliitsa khumutivitsa. 21Mwami Nyasaye aliitsa khumwahula haluveka, khurula mu vandu vi tsimbia tsia Israeli; khandi aliitsa khuchila anyole matiinyu khulondokhana khu vilaamo vili mu lilakano, liahandikwa mu shitabu shia mechitso ku Mwami Nyasaye.

22“Mumatukhu kaliitsa khuvaho, vitsukhulu venyu nende vandu vacheni khurula ihale wene valiitsa khulola matiinyu nende linyakhana liu Mwami Nyasaye yalerela shivala shienyu. 23Milimi chiliitsa khuvula khwama shiraakwa shiosi, nichilimu na salufa nende ichumbi; shindu shiosi shivulakhuho, shilitsa khuraakwakhu, khali vunyasi khumeelamu. Shivala shienyu shiliitsa khuva khuli mataala ka Sodomu nende Gomora, Adima nende Zebohimu, ku Mwami Nyasaye yativitsa nali nu vurima vululu muno. 24Vandu vi tsimbia tsindi tsiosi, valiitsa khureeva, ‘Shichila shina Mwami Nyasaye nakhola yaka khu shivala yishi? Shichila shina navalolela vurima vululu?’ 25Valiitsa khuchipa, ‘Shivune shili ndi vandu yava vambakhana khulonda lilakano liu Mwami Nyasaye, uli Nyasaye wa vakuuka vavo, lilakano lia yakhola navo, lwa yavarulitsa mu shivala shia Misri. 26Vakalukhana nivarumishila vanyasaye, va vali nivashili khumanya, vanyasaye vu Mwami Nyasaye yakaya vavuli khusaala khuvo. 27Khulwa yako, Mwami Nyasaye yavukulila vandu veve vurima vululu, manachila, vilaamo viahandikwa mu shitabu yishi khuvakwila. 28Mwami Nyasaye yavavukulila vurima vululu, khandi khuvirila khu vurima vwa yali navwo, yavarulitsa mu shivala shiavo; navahila mu shivala shicheni, wa vamenyanga nunundi.’

29“Vindu vilala viliho viu Mwami Nyasaye, uli Nyasaye weru, yavisa muvwivisi vivuli khumanyikhana; navutswa vindu viamanyikhana ni vieru, halala na vitsukhulu veru, nikanyalikha khukhole shia shindu shiosi, shia malako kavoolanga shikholwi.”

Currently Selected:

LITSUSHITSWA 29: LLLPRO

Highlight

Copy

Compare