LITSUSHITSWA 26

Vihanwa viu Khucheswa

1“Lwa muliitsa khuva numuli mu shivala shiu Mwami Nyasaye, uli Nyasaye wenyu amuheetsanga mumenyamu, 2shia mulala khu munyi aliitsa khuvikha mu muhinda kwekwe shitonye shieshie shi shiraakwa shiukhuraanga khucheswa, ma ahile havundu halala hele ha muliitsa khusaalila. 3Muliitsa khutsia khu musalisi wu kholanga muhinzilu khulitukhu lienelo; ma mumuvoolele, ‘Sanditsanga Mwami Nyasaye, uli Nyasaye wanje nunundi, shichila mali khwinjila mu shivala, shia yali niyalaaka aliitsa khuha vakuuka veru.’

4“Musalisi aliitsa khuvukula muhinda kwenoko khurula khu munyi, makusinjilitsi imbeli wu vwaali vu Mwami Nyasaye, uli Nyasaye wenyu. 5Lwa muliitsa khuva numuli imbeli wu Mwami Nyasaye, muliitsa khukalushila khuvoola makhuva yaka, ‘Kuuka wanje yali mundu wahuya huyanga khurula mu vandu vuluhia lwa Aramiani, wahila vandu vi inzu yeye khutsia khumenya mu shivala shia Misri. Vali vandu isavu indititi lwa vasimukha nivatsia khumenyayo; navutswa vamanya nivivulana mu vunyishi khandi nivava luhia lwi tsingulu tsinyishi. 6Navutswa lwa Vamisri vakhusalilitsa vululu, manivakhunika khukhola muhinzilu khuli varukwa; 7khwalila tsikhwili khu Mwami Nyasaye, uli Nyasaye wa vakuuka veru akhukhonye, ma Mwami Nyasaye nakhuhulila. Yalola khuli khwanyakhananga, vutiinyu vweru vwa khwavirilamu khandi khuli khwatambitswangwa. 8Mwami Nyasaye yakhurulitsa mu shivala shia Misri, khuvirila mu vunyali nende tsingulu tsietsie tsiu khuchenyinya. Yakhola viloleshitsu nende vindu viu khuchenyinya, manachila vindu viu khurishitsa nivikholekha. 9Yakhulera havundu hanu; khandi nakhuha shivala shi lilova lilahi khandi shinuulu yishi, nende vushi. 10Khulwa yako, nakhalerela Mwami Nyasaye shitonye shi shiraakwa shiukhuraanga khuchesa shiambele.’

“Muliitsa khusinjilitsa muhinda kwenoko imbeli wu Mwami Nyasaye, uli Nyasaye wenyu, mamusaale khuye. 11Munyi nende vandu vu lwivulu lwa Levi nende vandu vacheni vamenyanga mu munyi, muliitsa khwikhoyela vindu vinyishi vilahi, viu Mwami Nyasaye, uli Nyasaye wenyu, yamuha halala na vandu vi inzu yenyu.

12“Lwa muliitsa khuva numumali khurunga shitonye shilala khu likhomi khu viraakwa vienyu, viamwachesa khumuhika kwa khavaka, muhika kukhurulitsa injeso, muliitsa khuchihaana khu vandu vu lwivulu lwa Levi, vandu vacheni, vavisandu nende vakhutsakhali, khu valilia nivamenyanga mu mataala kenyu. 13Nalwo lwa muliitsa khuvoolela Mwami Nyasaye, uli Nyasaye wenyu, ‘Ndulitsi mu inzu yanje shitonye shitakatifu, mambele vandu vu lwivulu lwa Levi, vandu vacheni, vavisandu, nende vakhutsakhali, khulondokhana khuli wambolela khole. Shili khumeneka malako koko inoho khwivilila lilala khuko. 14Shili khuliakhu khali shitonye shilala khushio lwa nikhulanga. Shili khurulitsakhu mu inzu yanje, khali shitonye shilala khushio lwa nali nimali khwonekha; khandi shili khuhaanakhu khali shitonye shilala khushio, khuli shihanwa khu vandu vakhutsa. Mwami Nyasaye, uli Nyasaye wanje, mali khulonda malako koko; kholi shia shindu shiosi, shia wavoola khole khulondokhana khu injeso. 15Heenzela hasi khurula mwikulu, havundu hoho wumenyanga hatakatifu, ma ukasitsi vandu vovo Israeli. Ukasitsi khandi shivala shi lilova lilahi khandi shinuulu nende vushi shiukhuheele, khuli walaaka uliitsa khukholela vakuuka veru.’

Muli Vandu vu Mwami Nyasaye

16“Mwami Nyasaye, uli Nyasaye wenyu, yenyanga mulonde malako keke nende mechitso keke koosi nunundi. Mulakalonda nu mwoyo kwosi nende tsingulu tsienyu tsiosi. 17Mwakhiyama havulavu nunundi ndi Mwami Nyasaye, neye Nyasaye wenyu; mulaachi mulatsililila khumuhulila, khulonda malako keke, mechitso keke nende mivaalo keke koosi, khandi khukhola kavoolanga mukhole. 18Mwami Nyasaye umali khumuhuchilila nunundi khuva vandu veve mwene, khuli yalaaka aliitsa khukhola; khandi yenyanga mulonde malako keke koosi. 19Aliitsa khumukhola khuva luhia lwi tsingulu tsinyishi khuvira vandu vi tsimbia tsindi tsiosi tsia yaloonga. Muliitsa khwitsominya lira lielie, numumuha luyali, nu khuva vandu veve, nivali miandu chiechie, khuli mwene yalaaka.”

Currently Selected:

LITSUSHITSWA 26: LLLPRO

Highlight

Copy

Compare