LITSUSHITSWA 24

Khulekhana khu Musatsa nende Mukhali

1“Niiva mundu musatsa aliitsa khuhila mukhali, navutswa mukhali mwenoyo avuli khumuyaanzitsa, shichila uloli shindu shitamanu khulondokhana khuye; mamuhandichile ibarwa yu khulekhana, amuhe nu khumukhunga khurula munzu mwemwe, 2masimushi khutsia khuva mukhali wu musatsa wundi, 3niiva musatsa wa khavili woyo, aliitsa khumwambakhana amuhandichile ibarwa yu khulekhana, amuhe nu khumukhunga khurula munzu mwemwe ( inoho musatsa wa khavili wali niyamuhila aliitsa khukhutsa); 4khu musatsa wali wu khuraanga wu mukhali mwenoyo wamukhunga, shialiitsa khuhuchilila khumuhila khandi, khuli mukhali wewe namali khwononyinywa tawe. Shikholwa khuli shienesho ni shifwavi imbeli wu Mwami Nyasaye. Muvuli khukholelakhu vutamanu mu shivala, shia nzitsanga khumuha mumenyemu.

5“Niiva mundu musatsa ali nu mukhali wayahila khu vwangu yuvu, aliitsa khuvula khurumwa khutsia naye khukwana muliihe, inoho khuheelwa muhinzilu kundi khuli kwenoko. Aliitsa khumenya hango hehe muvuvoholole khumuhika mulala, khuyaanzitsa mukhali wayahila.

6“Lwa muheetsanga mundu shindu shia aliitsa khukalushitsa, muvuli khuvukula luchina lwelwe lu khusia imu inoho lichina liu khusielakhu, khuva khuli shindu shia muli nashio mu makhono kenyu. Numukhola murio, muliitsa khuva numunuulanga vandu vi inzu yeye, shindu shichilanga nivanyola shiukhulia shiu khuvalomba khuva mwoyo.

7“Niiva mundu aliitsa khunyolwa nakumilanga ni tsingulu Muisraeli weshie khumukhola muvohe, khandi niiva aliitsa khumukhola khuli nu murukwa, inoho khumukuulitsa, nalwo lwi shihuuvi shienesho shilitsa khwiirwa. Nindi muliitsa khurulitsaho vutamanu mu vandu venyu vene.

8“Lwa muliitsa khuva numulwalanga vuchele, nuvuli vulwale vu khuhaambitsana, muve vacheli khukhola ka vasalisi vuluhia lwa Levi vamuvoolela mukhole; khuli navoola vakhole, muve vacheli mukhole kenako. 9Mwitsushitse ku Mwami Nyasaye, uli Nyasaye wenyu yakhola Miriamu, numuli khu luchendo lwenyu lu khurula mu shivala shia Misri.

10“Lwa mwikopitsanga mureende wenyu shindu shiu khumurunga munjila ya kalaha, muvuli khwinjilakhu munzu mwemwe, khutsia khuvukula shindu shiu khukumila mu makhono, khumanyinya ndi aliitsa khumurunga. 11Muliitsa khusinjila ilwanyi khumulinda, khumulekha amulerele shindu shia muliitsa khuva nu mwenyanga khukumila mu makhono kenyu, khumanyinya ndi aliitsa khumurunga. 12Niiva mundu mwenoyo nu mumanani, uvuli khutsia khukona tsindolo nuli ni shindu shieshie shia mwakumila ma makhono kenyu, khumanyinya ndi aliitsa khumurunga. 13Muliitsa khukalushitsila mundu mwenoyo shindu shieshie shia yamuha mu makhono, khumanyinya ndi aliitsa khumurunga halukolovo, khu yifwale inguvu yeye lwa aliitsa khuva niyenyanga khukona tsindolo. Numukhola ndio, nalwo lwa aliitsa khumukasitsa, ma shive shikholwa shiu vulunji imbeli wu Mwami Nyasaye, uli Nyasaye wenyu.

14“Muvuli khutambitsakhu murumishi wa mwasamulitsa uli mumanani, inoho uvula shindu shiatiilakhu, ave nu mulala khu Vaisraeli veshie, inoho khu vacheni vamenyanga mu lilala khu mataala kenyu. 15Muliitsa khumurunga mirungu chiechie khulitukhu lia muliitsa khuva nu mumusamulitsi, khali liuva nilishili khuyeela; shichila nu mumanani khandi nachio chichilanga nalia. Nikakhavele kario, anyala khulila tsikhwili khu Mwami Nyasaye, mamuve mukholi vwoni.

16“Vivuli valiitsa khuvula khwiirwa, shichila vutamanu vwa vaana vavo vakhola, inoho vaana khwiirwa, shichila vutamanu vwa vivuli vavo vakhola. Shia mundu wosi aliitsa khwiirwa shichila vwoni vwevwe mwene.

17“Muvuli khwiima vandu vacheni nende vavisandu vamenyanga mu munyi katoto ka venyanga khukholelwa. Muvuli khuvukula inguvu yu mukhutsakhali khuli shindu shia mwakumila mu makhono kenyu, khumanyinya ndi aliitsa khumurunga. 18Mwitsushitse khumanya ndi, khali munyi mwali varukwa mu shivala shia Misri, khandi Mwami Nyasaye, uli Nyasaye wenyu neye wamuhonyinya khurulayo. Nashio shivune shichilanga nimuvoolela mukhole ndio.

19“Lwa muchesanga viraakwa mu mulimi kwenyu, nu khwivilila munyuma shivoho shi viraakwa via muchesi, muvuli khukalukha khutsia khulokoota. Muliitsa khurichila vandu vacheni, vavisandu nende vakhutsakhali, khu Mwami Nyasaye, uli Nyasaye wenyu atsililile khumukasitsa, mu muhinzilu kwenyu kwosi. 20Lwa muliitsa khuva numwakhatuula matunda kenyu ki misayituni, muvuli khukalukha khandi khwatuula kaliitsa khuva nikarikala. Kaliitsa khuva matunda ka vandu vacheni, vavisandu, nende vakhutsakhali. 21Lwa mwatuulanga matunda ki misabibu mu milimi chienyu, muvuli khukalukha khutsia khwatuula matunda ki misabibu. Kaliitsa khuva matunda ka vandu vacheni, vavisandu nende vakhutsakhali. 22Mwitsushitse khumanya ndi khali munyi, mwali varukwa mu shivala shia Misri; khandi nashio shivune shichilanga nimuvoolela mukhole ndio.

Currently Selected:

LITSUSHITSWA 24: LLLPRO

Highlight

Copy

Compare