LITSUSHITSWA 19

Mataala Kukhwilushilamu

(Liv 35:9-34; Yosh 20:1-9)

1“Lwa Mwami Nyasaye, uli Nyasaye wenyu, ava niyakhativitsa vandu vi tsimbia tsiosi tsimenyanga mu shivala shia amuheetsanga; khandi lwa muliitsa khuva numwavakhunga, khandi mumenyanga mu mataala kavo nende tsinzu tsiavo, 2muliitsa khwahula haluveka mataala kavaka mu shivala, shiu Mwami Nyasaye, uli Nyasaye wenyu amuheetsanga mumenyemu. 3Muliitsa khuheenza mulole shipimu shiu luchendo, mamukavuli shivala shienesho mu tsisomo tsivaka, khu nikava mundu aliitsa khuva wayiira wundi yilushilimu. 4Niiva mundu anyala khwitsukhana niyiiri wundi, wakhalolekhanga khuli nu mutsiku wewe, anyala khwilushila mu lilala khu mataala kenako mavuli khwiirwa. 5Khuvoole, niiva vandu vavili valiitsa khutsia mu muliru khureema musala, khandi niiva murwi kwi ihaywa kulasila khurula mu muhini kwi ihaywa khukwila wundi nu khumwiira, lwa mulala khuvo aliitsa khuva nareemanga musala, mureemi wu musala anyala khwilushila mu lilala khu mataala kavaka kenako, nu khuvula khwiirwa. 6Niiva khuliho ni litaala lilala lionyene vutswa, luchendo lu khwinjila mulio lwakhavele luraambi muno, khandi mundu wenyanga khuvanzila shisahi yakhamukumili nu khwiira mundu, uliitsa khuva navula vutamanu vwosi shichila vurima vwevwe. Khali ndio, yitsukhana niyiiri mundu, wakhalolekhanga khuli nu mutsiku wewe. 7Nashio shivune shichilanga nimuvoolela ndi mwahuli haluveka mataala kavaka.

8“Niiva Mwami Nyasaye, uli Nyasaye wenyu, aliitsa khuvambalalitsa lusomo lwenyu, khuli yalaaka aliitsa khukholela vakuuka venyu, khandi amuhe shivala shiosi shia yalaaka vakuuka venyu aliitsa khumuha, 9khu, mulameeta mataala kandi kavaka khu kavaka kenako. (Aliitsa khumuha shivala yishi, niiva muliitsa khukhola shia shindu shiosi, shia muvoolele nunundi, khandi niiva muliitsa khuyaanza Mwami Nyasaye, uli Nyasaye wenyu khandi mumenye khulondokhana khu mechitso keke.) 10Kholi ndio, khu shisahi shia vandu vavula vutamanu shivuli khusuundulwa mu shivala, shiu Mwami Nyasaye, uli Nyasaye wenyu, amuheetsanga mumenyamu; khandi khu muvuli khuva munyi, navo va mwasuundula shisahi.

11“Navutswa niiva mundu uli nu vutsiku nu weshie aliitsa khukonekha weshie, mwenoyo nu khumwiira, khandi yilushili mu lilala khu mataala kenako, 12vimilili vi litaala lia yarulamu, valiitsa khuruma mundu khutsia khumulaanga vamukalushitsi khu mundu wenyanga khuvanzila shisahi khumwiira. 13Muvuli khumulolela tsimbavasi. Rulitsi mwiiri khuli mwenoyo mu shivala shia Israeli, khu mumenye limenya lilahi.

Tsinzakho Tsiakhale

14“Muvuli khusuundakhu shilokha shiu lwakho lu mureende wenyu, lwasimiikhwa mumatukhu kakhale, mu shivala shiu Mwami Nyasaye, uli Nyasaye wenyu amuheetsanga mumenyemu.

Makhuva khu Vashiahidi

15“Mushiahidi mulala shiatushili khuhaana vushiahidi khu mundu ukholi shindu shitamanu tawe. Vashiahidi vavili vutswa, navo vamanyinya toto mundu ukholi vutamanu. 16Niiva mundu aliitsa khuchelitsa khusalilitsa wundi, navoola vushiahidi vu vuvehi ndi wundi ukholi shindu shitamanu, 17voosi vavili valiitsa khusimukha vatsi havundu halala hele, ha vasaala mavakhalachilwi na vasalisi nende vakhalachi, valiitsa khuva nivakholanga muhinzilu mumatukhu kenako. 18Vakhalachi venavo valiitsa khurunishitsa mu vunyishi shindu shitamanu, shiu mundu mwenoyo aliitsa khuva nakholi; khandi niiva mundu mwenoyo aliitsa khuva navooli vushiahidi vu vuvehi khu weshie, 19mundu mwenoyo aliitsa khusalilitswa munjila indala yene, khuli mundu wavoola vushiahidi vu vuvehi khu weshie yakhasalilitswi. Nindi muliitsa khurulitsa vene vindu vitamanu mu munyi. 20Nalwo lwa vandu vandi voosi valiitsa khuhulila nu khuria; khandi vutamanu khuli vwenovo vulivula khwikholekha khandi mu munyi. 21Muvuli khuvavela tsimbavasi; navutswa vulamu khu vulamu, imoni khu imoni, liino khu liino, mukhono khu mukhono, khandi shilenje khu shilenje.

Currently Selected:

LITSUSHITSWA 19: LLLPRO

Highlight

Copy

Compare