LITSUSHITSWA 14

Mwiima Kukhwikhula Kwakaywa

1“Munyi navo vandu vu Mwami Nyasaye, uli Nyasaye wenyu. Khulwa yako, muvuli khwisalaaka khu mmbili inoho khuveka liswi imbeli khu mirwi chienyu, lwa muliitsa khuva nu mwikhulanga vandu vakhutsa venyu. 2Munyi navo vandu vatakatifu khu Mwami Nyasaye, uli Nyasaye wenyu. Munyi navo vandu vu Mwami Nyasaye yamurovola mwene khuva veve khurula mu vandu voosi vamenyanga khulilova.

Miruku Minihu nende Chioneshe

(Lev 11:1-47)

3“Muvuli khuliakhu shindu shiosi shiu Mwami Nyasaye yaviritsa khuva shioneshe. 4Yitsi natsio tsinyama tsia munyala khulia: ing'ombe, likondi, imbuli, 5imbongo, shisutsi, imbuli yumbulimu, inoho imbuli yu mu shikulu. 6Munyala khulia muruku kwosi kwavukhanamu hali khavili tsimbakaywa khandi kuliitsanga ikamuula. 7Navutswa muvuli khuliakhu muruku kwosi kuvula tsimbakaywa tsiavukhanamu hali khavili khandi kukhaliitsanga ikamuula. Muliitsa khuvula khulia tsingamia, shisungura, inoho shikamania. Miruku yichi chiliitsa khuva chioneshe; shichila chiliitsanga ikamuula, navutswa chili ni tsimbakaywa tsia vukhanamu hali khavili. 8Muvuli khuliakhu tsingulume. Tsiliitsa khuva tsioneshe; shichila tsili ni tsimbakaywa tsia vukhanamu hali khavili, navutswa shitsiliitsanga ikamuula tawe. Muvuli khuliakhu khali muruku kwosi khuchio, inoho khali khutiila khu mivili chiachio, ni tsimali khukhutsa.

9“Munyala khulia isutsi yosi lukanu na lukanu, ili ni vivakaya nende tsimbaha; 10navutswa muvuli khulia shindu shiosi shivula vivakaya nende tsimbaha; shindu shienesho shiliitsa khuva shioneshe.

11“Munyala khulia linyonyi liosi linihu. 12Navutswa muvuli khulia manyonyi yaka: shilitsa, inditsu, ling'ang'a, 13inangovia, shiumuuchi shilitsa shimwamu inoho shichionjonjo lukanu na lukanu, 14linyonyi liu lukanu lundi, 15liahuti, likhule liu mu vutukhu, libata liu mu matsi, likhongotsa, lukanu lundi lwosi, 16likhule litititi, likhule likali, likhule lilavu, 17likhule liu mu shiangalangwi, osipreyi, nende komoranti, 18linyonyi liliitsanga tsisutsi, ling'ang'oi, lukanu na lukanu; nende linyonyi lilaangwangwa hopoe nende linyinya.

19“Viiku viosi vili ni tsimbaha viliitsa khuva vioneshe; muvuli khuliakhu viiku vienevo. 20Munyala khulia shiiku shiosi shili ni tsimbaha.

21“Muvuli khuliakhu shindu shiosi shiakhutsa shiene. Muleshele vandu vacheni vamumenya halala navo valii, inoho mukuulitsili vandu vacheni vandi. Navutswa munyi navo vu Mwami Nyasaye, uli Nyasaye wenyu; muli vandu veve.

“Muvuli khuteekhakhu shimeme shi likondi inoho shi imbuli nishishinunanga maveele.

Malako khu Injeso

22“Muliitsa khuvikha haluveka injeso -- likhomi khurula khu viraakwa vienyu, via muliitsa khuva numuchesi shia khumuhika. 23Muliitsa khutsia navio havundu halala hele wu Mwami Nyasaye, uli Nyasaye wenyu, aliitsa khuva niyarovola khuva havundu ha muliitsa khusaala khuye. Muliitsa khulia imbeli wewe havundu henaho likhomi li viraakwa via muliitsa khuva nu mwachesa vi imu, idivai, nende makura ku musayituni, nende shimoli shiukhuraanga khwivulwa shi ing'ombe inoho shimeme shi likondi shiukhuraanga khwivulwa. Muliitsa khukhola kenako, khu mweche luyali shia khase khosi khutsililila khuha Mwami Nyasaye, uli Nyasaye wenyu. 24Niiva havundu ha vatsitsanga khusaalila haliitsa khuva nu luchendo luraambi khurula ingo wenyu, khumulomba khuchinga shilala khu likhomi khu viraakwa, via muliitsa khuva nu mwachesa viu Mwami Nyasaye yamukasitsa navio, muliitsa khukhola kalondakhu yaka: 25Muliitsa khukuulitsa shia shindu shiosi, shia muchesi ma muhile tsisenti tsia munyoli havundu halala hele ha vasaalilanga. 26Muliitsa khurumishila tsisenti tsienetso khukuula shia shindu shiosi, shia mwenyanga khuli ing'ombe, likondi, idivai, inoho malwa, inoho shindu shiosi shia mwikombanga. Munyi nende vandu vu munzu mwenyu, muliitsa khulia numuliyo shiukhulia shienesho imbeli wu Mwami Nyasaye, uli Nyasaye wenyu ma mwikhoye.

27“Muvuli khwivilila vandu vu lwivulu lwa Levi vamenyanga mu mataala kenyu; shichila vavulakhu shitonye shia vaheelwa inoho miandu chiavo vene. 28Muliitsa khulera injeso yenyu ya shia shiraakwa shia muchesi shiosi nu khuvikha mu mataala kenyu shia khumuhika kwa khavaka kukhumalilikha. 29Shiukhulia yishi shiliitsa khuva shia vandu vu lwivulu lwa Levi, lwa vavula miandu chiavo vene. Shiliitsa khuva khandi shia vandu vacheni, vavisandu, nende vakhutsakhali vamenyanga mu mataala kenyu. Valiitsa khwitsa vanyole shia shindu shiosi shia venyanga. Muliitsa khukhola ndio, ma Mwami Nyasaye, uli Nyasaye wenyu, amukasitse mu shia shindu shiosi shia mukholanga.

Currently Selected:

LITSUSHITSWA 14: LLLPRO

Highlight

Copy

Compare