LITSUSHITSWA 11

Vunyali vu Mwami Nyasaye ali Navwo

1“Khulwa yako, muliitsa khuyaanza Mwami Nyasaye, uli Nyasaye wenyu khandi mutsililile shia khase khosi, khukhola ka yenyanga mukhole, mulonde mechitso keke, mivaalo keke nende malako keke. 2Mwitsushitse nunundi ka, mweka khulondokhana khu Mwami Nyasaye, khuvirila mu liiva liosi lia mwavirilamu lwa mwamenyanga naye. Ni vanga munyi, shikali ni vaana venyu vavirila mu liiva lienelo tawe; navutswa mwalola vukhumi vwevwe, tsingulu tsietsie, vunyali vwali navwo, 3nende viloleshitsu vievie. Mwalola ka yakhola Mwami wa Misri nende vandu voosi vi shivala shieshie. 4Mwalola khuli Mwami Nyasaye yativitsa mukaanda kwa vasikali va Vamisri, halala ni tsifarasi tsiavo nende makaare kavo, lwa ya kakhaaminyila mu Inyanza Imuuchi, lwa vali nivahitsanyinyanga munyi. 5Mwamanya ku Mwami Nyasaye yamukholela lwa mwali numuli mu shiangalangwi numushili khutukha hanu, 6khandi khuli yakhola Datsani nende Abiramu, vaana vali va Eliabu warulanga mu vandu vuluhia lwa Rubeni. Lilova likukha manilivamiila imbeli wa Vaisraeli voosi, halala na vandu voosi vi tsinzu tsiavo, maheemo kavo, varumishi voosi nende miruku chiavo chiosi. 7Navutswa munyi vene, navo mwalola ni tsimoni tsienyu vindu vi tsingulu, viu Mwami Nyasaye yali nakholi.

Tsikhaavi Tsili mu Shivala Shialaakwa

8“Khulwa yako, mutsililile khulonda malako koosi, kamboli mulonde nunundi, khu muve ni tsingulu tsiu khwinjila khutsia khumenya mu shivala, shia muli himbi khwambukha; 9khandi mu limenya khumatukhu manyishi mu shivala, shiu Mwami Nyasaye yalaaka aliitsa khuha vakuuka venyu nende vitsukhulu vavo, shivala shi lilova lilahi khandi shinuulu, nende vushi. 10Navutswa shivala shia muli himbi khutsia khumenyamu, shishili khuli shivala shia Misri, shia mwamenyamu khale tawe. Lwa mwaraaka viraakwa mu shivala shia Misri, mwakhola mihinzilu chienyu ni tsingulu numuchemulila khusama na matsi milimi chienyu; 11navutswa shivala shia muli himbi khutsia khumenyamu, ni shivala shili ni vikulu nende tsihoongo, shivala shia imbula inyishi ikhuvamu. 12Mwami Nyasaye, uli Nyasaye wenyu neye ulindanga shivala shienesho; khandi Mwami Nyasaye, uli Nyasaye wenyu, aheenzelitsanga shivala shienesho shia khumuhika kwosi.

13“Khulwa yako, mulonde nu mwoyo kwosi malako kamuheele nunundi; muyaanze Mwami Nyasaye, uli Nyasaye wenyu, khandi mumurumishile nu mwoyo kwosi. 14Niiva muliitsa khukhola ndio, aliitsa khuruma imbula mu shivala shienyu mumatukhu kenyekhanga, mumatukhu ku khuraaka viraakwa khandi ki shiuvwi, khu muliva ni imu, idivai, nende makura ku musayituni, 15khandi vunyasi mu milimi chienyu vwi miruku chienyu chiliitsa khwaya. Muliitsa khulia shiukhulia shiosi, shia mwenyanga. 16Muve vacheli, nikakhavele kario, muliitsa khukoyanyinywa, khu mulirumishila vanyasaye vandi, nu khusaala khuvo. 17Niiva kaliitsa khwikholekha kario, Mwami Nyasaye aliitsa khumuvukulila vurima, nu khwikalila imbula khuvula khukhuva; khukhola lilova khumakana khulomba viraakwa, khuvula khumeela. Muliitsa khukhutsilayo vwangu yuvu, khali niiva ni shivala shilahi shia amuheetsanga.

18“Muliitsa khwitsushitsa makhuva kamuvoolele, khandi mukanakane khulondokhana khuko. Muliitsa khukavoha khu mikhono chienyu khandi mwifwale khu vweni vwenyu, kave ka munyala khwitsushitsilakhu. 19Muliitsa khwechitsa vaana venyu, mulomolome khulondokhana khuko, lwa mwikhalanga hango khandi lwa muvetsanga mu luchendo, lwa mukonanga tsindolo vutukhu, khandi lwa muvukhanga mu mavwevwe. 20Muliitsa khukahandika khu tsifulemu tsi miliango nende khu vilivwa, 21khu munyi nende vaana venyu mu limenya khumatukhu manyishi mu shivala, shiu Mwami Nyasaye yalaaka aliitsa khuha vakuuka venyu, khumatukhu koosi ka muliitsa khuva numushili mwoyo mu shivala shienesho.

22“Niiva muliitsa khulonda nu mwoyo kwosi malako koosi ka mwechitsi nunundi, muyaanze Mwami Nyasaye, uli Nyasaye wenyu; mukhole shia shindu shiosi, shia muvoolela mukhole, mamuve vasuuvilwa khuye; 23nalwo lwa Mwami Nyasaye aliitsa khumukhunjila vandu vi tsimbia tsindi tsiosi, lwa muliitsa khuva numwisuundanga, khandi muliitsa khumenya mu shivala, shia vandu vi tsimbia vunyali khandi vi tsingulu tsinyishi khuvira munyi. 24Havundu hosi ha muliitsa khuseena, naho haliitsa khuva henyu. Lusomo lwenyu luliitsa khuraanjila mu shiangalangwi, khutsia khutukha mu vikulu via Lebanoni khuluveka luli ivuluka; khandi khurula khu Muchela kwa Efurate, khuluveka luli ivukwi, khutsia khutukha khu Inyanza ya Meditarenia khuluveka luli imbo. 25Mundu avulakhuho, uliitsa khuva ni tsingulu tsiu khumukuura. Mwami Nyasaye, uli Nyasaye wenyu aliitsa khulomba vandu vamenyanga mu shivala shienesho khumuria, khandi khutechela shia havundu hosi ha muliitsa khuseena, khuli yalaaka aliitsa khukhola.

26“Loli, muheetsanga nunundi vindu vivili murovolekhu shilala, khukasitswa inoho shilaamo: 27Khukasitswa, niiva muliitsa khulonda malako ku Mwami Nyasaye, uli Nyasaye wenyu, khuli muvoolele nunundi. 28Muliitsa khunyola shilaamo, niiva muliitsa khwambakhana khulonda malako ku Mwami Nyasaye, uli Nyasaye wenyu; navutswa muvuli khulonda injila yamuvoolele, mamusaale khu vanyasaye vandi vamushili khumanyakhu. 29Lwa Mwami Nyasaye aliitsa khumulera mu shivala, shia mutsitsanga khumenyamu, muliitsa khukasitsila vandu khu Shikulu shia Gerizimu nu khulaamila vandu khu Shikulu shia Ebali. 30Khuli lwa mwamanya, vikulu vivili yivi vili injelekha wu Muchela kwa Yorodani, khuluveka luli imbo, mu shivala shia Vakanaani vamenyanga mu luhoongo lwa Araba, himbi havundu hi misala chi miseno chia More, himbi mu litaala lia Gilugali. 31Lwa muliitsa khwambukha Muchela kwa Yorodani, mamumenye mu shivala shiu Mwami Nyasaye, uli Nyasaye wenyu amuheetsanga; khandi lwa muliitsa khuva numumenyamu, 32muve vacheli mulole ndi mulondanga malako nende mivaalo koosi, kamuheele nunundi.

Currently Selected:

LITSUSHITSWA 11: LLLPRO

Highlight

Copy

Compare