AMOSI 4
4
Vaisraeli Vambakhana Khukalukha khu Nyasaye
1“Munyi vakhali va Samaria,
munyi vamuli vakhomeelu khuli tsing'ombe tsili Bashani,
munyi vamutambitsanga vamanani,
nu muvavoolela vamulerele via mung'wa!
2Lwa inzi Mwami Nyasaye ndi mutakatifu mali khwisuuha,
‘Ni kilikali, matukhu kali himbi khutukha,
lwa valiitsa khumukhwesesa ni ingaka,
khali mundu uli inyuma khu munyi
ni tsingaka tsiu khuluvila tsisutsi.
3Muliitsa khusiuvilwa mu vwasasu mu lisisi,
shia mulala numuroonjela ilwanyi.
Inzi Mwami Nyasaye mali khuvoola.’ ”
Vaisraeli Vambakhana Khweka
4Mwami Nyasaye avoolanga,
“Munyi Vaisraeli, tsi mu litaala lia Betseli mukhole vutamanu;
mu litaala lia Gilugali -- khutsililila khukhola vutamanu;
rulitsi vihanwa vienyu viu khukholela misango shia mu mavwevwe,
khandi itsaka yenyu shia matukhu kavaka nikakhavira.
5Mukhole musango ku mukati kwalombwa
na mamela khuli shihanwa shiu khusanditsa,
nu mulanditsila shia mundu wosi
khuli muhaananga nu mwoyo kwosi vihanwa viu khwirulitsa,
numwichinjilila!
Shichila munyi Vaisraeli, mwayaanza khukhola ndio.
Inzi Mwami Nyasaye mali khuvoola.
6“Ninzi walera inzala mu mataala koosi ka mwamenyamu,
numuvula khuva ni shiukhulia shia havundu hosi,
khali ndio, mwambakhana khukalukha khwinzi.
Inzi Mwami Nyasaye mali khuvoola.
7“Ninzi wikalila imbula khukhuva mu milimi chienyu
mieli nichishili chivaka khutukha khu lichesa.
Nachila imbula nikhuva mu litaala lilala
nivula khukhuva mu lindi.
Imbula yakhuva mu mulimi mulala
khandi mulimi kwa imbula yavula khukhuvamu kumakana.
8Vandu vahuya huya khurula mu mataala nivatsia mu kandi
ni vakhavanga matsi ku khung'wa,
navutswa vuluhu vwatsililila khuvaleka;
khali ndio, vambakhana khukalukha khwinzi.
Inzi Mwami Nyasaye mali khuvoola.
9“Shia khase khosi nali namenya nindumanga matiinyu
mu viraakwa mu mulimi chienyu
khandi mu mulimi chi misabibu;
naruma muchio vushindu nende vukukhu.
Tsisichi tsiamala mikhuyu nende misayituni chienyu.
Khali ndio, mwambakhana khukalukha khwinzi.
Inzi Mwami Nyasaye mali khuvoola.
10“Naruma mu munyi vulwale khuli nakhola mu Misri.
Nasinza vayayi venyu vavukha ni shivavi;
nimunuula tsifarasi tsienyu;
nachila vukuundu khurulana khu vandu va nali ninziiri nu vumutuumushila.
Khali ndio, mwambakhana khukalukha khwinzi.
Inzi Mwami Nyasaye mali khuvoola.
11“Nativitsa valala khu munyi, khuli nativitsa Sodomu nende Gomora.
Vandu vihonolokha valolekha khuli shisala shiakhanga mulilu
shimali khurulitswa mu mulilu;
khali ndio, mwambakhana khukalukha khwinzi.
Inzi Mwami Nyasaye mali khuvoola.
12“Khulwa yako, niitsa khumukhola malala mele munyi Vaisraeli;
shichila nako ka nzitsanga khukhola,
mwirecheshe khukhalachilwa!”
13Nyasaye neye walomba vikulu,
khandi nalomba vushindu.
Neye uvoolelanga mundu kakhola;
neye wu kholanga mbasu kukwa shisuundi,
khandi aseena shia havundu hosi khulilova.
Lira lielie ni Mwami Nyasaye,
uli Nyasaye wi Mikaanda Chiliihe!
Currently Selected:
AMOSI 4: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
