2 SAMWELI 4
4
Ishibosheti Yiirwa
1Lwa Ishibosheti mwana wa Saulu yahulila ndi Abuneri umali khwiirila mu litaala lia Heburoni, yaria, khali vandu vi shivala shia Israeli voosi nivatechela. 2Ishibosheti yali na vandu veve vavili vimililanga mikaanda chiatsitsanga khuseera. Mulala khu vimilili venavo yalaangwangwa Bahana, na wundi nalaangwa Rekabu, nivali vaana va Rimoni wi litaala lia Beherotsi lili mu vandu vuluhia lwa Benyamini -- litaala lia Beherotsi liavukulwa, khuli lilala khu mataala kali mu lusomo lwa vandu vuluhia lwa Benyamini. 3Vandu vamenyanga khale mu litaala lia Beherotsi, vali vayilukha vatsia khumenya mu litaala lia Gitahimu; khandi vashimenyamu nunundi.
4Yonatsani mwana wa Saulu, yali wayivula mwana wali niyafwokoya vilenje. Yali nali ni mihika chiranu, lwa makhuva khulondokhana khu Saulu nende Yonatsani karulitswa mu litaala lia Yezireli. Muleli walelanga mwana mwenoyo, yamuvukula niyilukha; navutswa lwa muleli mwenoyo yakhola vwangu khurulaho, mwana yakwa hasi, nafwokoya. Mwana mwenoyo yalaangwangwa Mefiboshetsi.
5Rekabu nende Bahana, nivali vaana va Rimoni, warulanga Berotsi vasimukha nivatsia mu inzu ya Ishibosheti, nivatukhayo tsisaa sita mbasu, lwa Ishibosheti yali nahulukhanga. 6Vasimukha nivinjila mukari mu munzu mwenomo, nivikhola kholitsa venyanga khuvukula inganu, nivamulivira munda. 7Rekabu nende Bahana, nivali munzu mwenomo, vinjila isiisi wa Ishibosheti, yali nakoni, nivamwiira. Vakutuula murwi kwekwe, nivatsia nakwo, nivachenda chenda vutukhu vwosi mu Luhoongo lwa Yorodani. 8Valera murwi kwa Ishibosheti khu Mwami Daudi, wali nali mu litaala lia Heburoni. Vamuvoolela, “Yuku nakwo murwi kwa Ishibosheti mwana wa Saulu wali mutsiku wowo, wachelitsa khukhwiira. Yivi mwami, nunundi Mwami Nyasaye umali khukhuha vwiyangu, khuvanzila Saulu nende vitsukhulu veve.”
9Daudi yachipa Rekabu nende amwavo wewe Bahana, nivali vaana va Rimoni, warulanga Berotsi, “Nzisuuhanga khuvirila mu lira liu Mwami Nyasaye uli mwoyo, wambavina khurula mu vutiinyu. 10Lwa mundu yarumwa khwitsa khulola inzi mu litaala lia Zikulagi, nambolela ndi Saulu umali khwiirwa muliihe, yasuuvilanga anderelanga makhuva malahi. Namukumila, nimbola yiirwi. Nashio shiali shihanwa shia namuha, shichila makhuva malahi! 11Nilive lisalilitswa lirina lia vandu vatamanu viira mundu uvula vutamanu vwosi, wali nakoni tsindolo munzu mwemwe mwene valiitsa khuvirilamu! Nzitsanga khuvanzila ka mukholi shichila mumwiiri, khandi mumali khumutivitsa khurula mu shivala shinu!” 12Khulwa yako, Daudi yavoolela vasikali veve, “Yiiri vamwavo vavili yava! Kutuuli mirwi chiavo nende vilenje, musunji mivili chiavo himbi khu lituvwi lili mu litaala lia Heburoni. Navutswa muyeveele murwi kwa Ishibosheti mu shilindwa shia Abuneri, shili mu litaala lia Heburoni.”
Currently Selected:
2 SAMWELI 4: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013