2 SAMWELI 2
2
Daudi Yavekhwa Makura Khuva Mwami wa Yuda
1Nikamali khwikholekha, Daudi yareeva Mwami Nyasaye, “Nyala khutikulukha khutsia khuvukula lilala khu mataala kali mu lusomo lwa Yuda?”
Mwami Nyasaye yamuvoolela, “Tikulukha utsi.”
Daudi yamureeva, “Ni litaala shina lianyala khutikulukha khutsia khuvukula?”
Mwami Nyasaye yamuchipa, “Litaala lia Heburoni.” 2Nalwo lwa Daudi yatikulukha natsiayo, halala na vakhali veve vavili, mulala nali Ahinohamu wi litaala lia Yezireli, na wundi Abigaili, wali mukhutsakhali wa Nabali wi litaala lia Karameli. 3Daudi yavukula khandi vandu veve va yali nali navo, shia mulala na vandu vi inzu yeye; nivamenya mu mataala kali himbi mu litaala lia Heburoni. 4Vandu vu lusomo lwa Yuda vitsa mu litaala lia Heburoni; nivamihitsa Daudi khuva Mwami wa Yuda.
Lwa Daudi yavoolelwa ndi vandu vi litaala lia Yabeshi Gileadi vayeveela mu shilindwa mmbili kwa Saulu, 5yarumayo vandu ni likhuva liu khuvavoolela, “Mwami Nyasaye amukasitse lwa muheele mwami wenyu luyali; khandi lwa muyeveele mmbili kwekwe mu shilindwa! 6Mwami Nyasaye atsililile khumukholela malahi nu khuva musuuvilwa khu munyi. Khali inzi niitsa khumukholela malahi khulondokhana khu ka munyi vene mukholi. 7Muve ni tsingulu khandi muvuli khuria! Mwami wenyu Saulu umali khukhutsa. Vandu vu lusomo lwa Yuda, vanzamihitsi khuva mwami wavo.”
Ishibosheti Yamihitswa Khuva Mwami wa Israeli
8Mwimilili wa vasikali va Saulu, walaangwangwa Abuneri wali mwana wa Neri, yilukha nu mwana wa Saulu walaangwangwa Ishibosheti, nivambukha Muchela kwa Yorodani, khutsia mu litaala lia Mahanahimu. 9Yamihitsa Ishibosheti khuva mwami wi tsisomo tsia Gileadi, Ashuri, Yezireli, Efurahimu nende Benyamini, khali lusomo lwosi lwa Israeli. 10Ishibosheti wali mwana wa Saulu, yali nali ni mihika makhomi kane, lwa yamihitswa khuva Mwami wa Israeli. Yamiha khumihika chivili.
Navutswa vandu vuluhia lwa Yuda valonda Daudi, 11ma Daudi niyamiha vandu vuluhia lwa Yuda khumihika saba ni mieli sita, namenyanga mu litaala lia Heburoni.
Liihe Hakari ha Israeli nende Yuda
12Abuneri wali mwana wa Neri, halala na varumishi va Ishibosheti wali mwana wa Saulu, varula mu litaala lia Mahanahimu, nivatsia mu litaala lia Gibioni. 13Mwana wa Zeruya walaangwangwa Yohabu nende varumishi va Daudi vasimukha, nivatsia khwakanila ha lituvwi lili mu litaala lia Gibioni. Valala khuvo vasimukha, nivatsia khwikhala khuluveka lulala lwi lituvwi, na vandi nivikhala khuluveka lundi. 14Nalwo lwa Abuneri yavoolela Yohabu, “Lekha khurovole vayayi vavukha khurula mu shia luveka vakhuvayili mumbayo ku khukwana.”
Yohabu yamuchipa, “Nu vulahi; lekha vakwane.”
15Nalwo lwa vandu makhomi kavili na vane varovola. Vandu likhomi na vavili, khurula khuluveka lwa Ishibosheti nende luhia lwa Benyamini, khandi vandu vandi likhomi na vavili khurula khuluveka lwa Daudi. 16Shia mulala yakumila weshie mwing'ori, namulivira ni shivavi shieshie mumbalu, khutukha lwa vandu voosi makhomi kavili na vane vakwa, nivakhutsa. Havundu henaho nali mu litaala lia Gibioni hakulikhwa lira Helikatsi Hazurimu #2:16 Helikatsi Hazurimu: likhuva yili livoolanga shikuri shi liihe.
17Liihe liali lilulu khulitukhu lienelo. Varumishi va Daudi vakuura Abuneri nende vandu vu lusomo lwa Israeli. 18Vaana vi shiyayi vavaka va Zeruya nivali Yohabu, Abishai, nende Asaheli valiho khulitukhu lienelo. Asaheli uyu, yali na maliviri khuli ki shisutsi. 19Yaraanga khuhitsanyinya Abuneri, vulunji khutsia khumukumila. 20Abuneri yishevukha inyuma wewe nareeva, “Asaheli, nivi uyu?”
Asaheli yamuchipa, “Ninzi.”
21Nalwo lwa Abuneri yamuvoolela, “Lekha khumbitsanyinya!” Abuneri yamuvoolela, “Yilukhaka ulonde mulala khu vasikali yavo, uvukule shindu shiali nashio.” Navutswa Asaheli yatsililila khumuhitsanyinya. 22Abuneri yavoolela Asaheli khandi, “Lekha khumbitsanyinya! Shichila shina wenyanga inzi khwiiri? Mbele naheenza ndina amwavo wowo Yohabu mumoni?” 23Navutswa Asaheli yatsililila khumuhitsanyinya. Nalwo lwa Abuneri, yamulesa munda ni lirimu, nilirulila mu mukongo. Asaheli yakwa hasi nakhutsa, khandi mundu wosi watukha havundu ha yali nalaakalale yasinjilaho.
24Navutswa Yohabu nende Abishai vahitsanyinya Abuneri. Lwa liuva liali niliyeelanga, vatukha khu Shikulu shia Ama, khuluveka lwa Giha khu muhaanda ku khutsia mwichendanyama mwa Gibioni. 25Vandu vuluhia lwa Benyamini vavotokhana ha Abuneri yali nali khandi, nivirechekha khukwanila ha vutoonje vwi shikulu. 26Abuneri yalaanga Yohabu namureeva, “Nu vulahi khutsililila khukwana khumatukhu koosi? Unyala khuva ushili khulolakhu ndi mulimalilikha, khuliitsa khuva nilisalila lilulu muno? Khutsi khuli vamwavo venyu. Litukhu shina lia uliitsa khukaya vandu vovo khulekha khukhuhitsanyinya?”
27Yohabu yachipa, “Nzisuuhanga khuvirila mu lira lia Nyasaye uli mwoyo, ndi niiva wakhavuli khulomoloma kenako, vandu vaanje vavele vakhuhitsanyinya, khali khutukha mukamba mu mavwevwe.” 28Khulwa yako, Yohabu yakhuva shisiliva, ma vandu veve voosi nivalekha khuhitsanyinya vandu vu lusomo lwa Israeli inoho khuvakwana.
29Abuneri nende vandu veve vachenda, nivakhalakanyila mu Luhoongo lwa Yorodani, vutukhu vwenovo vwosi. Vambukha Muchela kwa Yorodani, khandi nivamali khuchenda khulitukhu lialondakhu mu mavwevwe, vatukha mu litaala lia Mahanahimu.
30Lwa Yohabu yali niyakhalekha khuhitsanyinya Abuneri, yalaanga halala vandu veve voosi, nanyola ndi vandu likhomi na tisa khuvo vavulaho, khumeeta khu Asaheli. 31Navutswa varumishi va Daudi yali nali navo, vali viiri vandu tsimia tsivaka na makhomi sita khurula mu vandu vuluhia lwa Benyamini, halala na vandu va Abuneri. 32Yohabu nende vandu veve, vavukula mmbili kwa Asaheli, nivakuyeveela mu vilindwa via vandu vi inzu yavo vili mu litaala lia Betselehemu. Yohabu nende vandu veve, vachenda vutukhu vwosi nivatukha mu litaala lia Heburoni, nu vwenyanga khu shia mu mavwevwe.
Currently Selected:
2 SAMWELI 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013