KŨGUŨRĨRIO 2
2
1ANDĨKĨRA mũraika wa kanitha ũrĩa ũrĩ Efeso atĩrĩ: Ũguo nĩguo oiga ũrĩa ũgwete njata icio mũgwanja na guoko kwa ũrĩo, ũrĩa ũcangacangaga gatagatĩ-inĩ ka mĩtĩ ĩo mũgwanja ya thahabu ya kũhangĩrũo matawa, atĩrĩ, 2Nĩnjũĩ ciĩko ciaku, o na wĩra waku mũritũ, o na ũkirĩrĩria waku, na ngamenya ndũngĩhota kũiguana na andũ oru, nao arĩa metuaga atũmwo, na tio, nĩwamaroririe, ũgĩkora nĩ a maheni; 3na ningĩ wĩ na ũkirĩrĩria, na ũkeũmĩrĩria nĩ ũndũ wa rĩĩtwa rĩakwa, na ndũrĩ wanoga. 4Ũndũ ngũgũcukĩra no atĩrĩ, atĩ nĩwatigire gũikara na wendani ũrĩa warĩ naguo mbere. 5No kĩririkane kũu uumĩte ũkagũa, wĩrire, ũcoke gwĩkaga maũndũ macio ma mbere; na waaga ũguo, nĩngũũka kũrĩ we, ’thengie mũtĩ waku wa tawa handũ haguo, wakĩaga kwĩrira. 6No wĩ na ũndũ ũyũ mwega, atĩrĩ, atĩ nĩũthũire ciĩko cia andũ arĩa metagwo Anikolai, iria ’thũire o na niĩ. 7#Kĩam 2.9; Kũg 22.2; Ezek 28.13; 31.8.Ũrĩa ũrĩ gũtũ, nĩakĩigue ũrĩa Roho arera makanitha. Ũrĩa wa gũtorania-rĩ, we nĩngamwĩtĩkĩria arĩage maciaro ma mũtĩ wa muoyo, ũrĩa wĩ mũgũnda wa kwa Ngai,#2.7 Mũgũnda wa kwa Ngai: Kiugo kĩu no kĩrĩa kĩandĩke Luk 23.43 na 2 Kor 12.4. Rora kohoro kaandĩkĩtwo Luk 23.43. kũrĩa maroho ma arĩa metĩkĩtie mathiaga.
8 #
Isa 44.6; 48.12; Kũg 1.17; 22.13. Nake mũraika wa kanitha ũrĩa ũrĩ Simurina mwandĩkĩre atĩrĩ:
Ũguo nĩguo oiga ũrĩa wa mbere na nowe wa kũrigĩrĩria, ũrĩa wakuire na agĩcoka muoyo, atĩrĩ, 9Nĩnjũĩ mĩnyamaro yaku, o na ũthĩni waku (no wĩ gĩtonga), na ngamenya irumi cia arĩa moigaga nĩ Ayahudi, na tio, nĩ thunagogi ya Shaitani. 10Ndũkae gwĩtigĩra maũndũ marĩa ũkiriĩ gũthĩnio namo; nĩ atĩrĩrĩ, mũcukani akiriĩ kũmũikia amwe korokoro-inĩ nĩguo mũgerio, na nĩmũkagĩa na mĩnyamaro matukũ ikũmi. Wee ikaraga wĩ mwĩhokeku kinya o gũkua, na nĩngakũhe thũmbĩ ya muoyo. 11#Kũg 20.14; 21.8.Ũrĩa ũrĩ gũtũ, nĩakĩigue ũrĩa Roho arera makanitha. Ũrĩa wa gũtorania-rĩ, ndakarĩo nĩ gĩkuũ kĩrĩa gĩa kerĩ. 12Nake mũraika wa kanitha ũrĩa ũrĩ Perigamo mwandĩkĩre atĩrĩ: Ũguo nĩguo oiga ũcio wĩ na rũhiũ rũu rũũgĩ, rũnoretwo mĩena yerĩ, atĩrĩ, 13Nĩnjũĩ kũu ũtũire, o kũu gwĩ gĩtĩ gĩa Shaitani kĩa ũnene; na no ũtũire ũgwatĩirie rĩĩtwa rĩakwa, na ndũigana gũkaana wĩtĩkio wakwa, o na matukũ-inĩ marĩa ma Antipa mũira wakwa, mũndũ wakwa mwĩhokeku, ũrĩa woragĩirũo kwanyu, o kũu Shaitani atũũraga. 14#Ndar 22.5,7; 31.16; Gũcok 23.4; Ndar 25.1-3.No rĩrĩ, ndĩ na maũndũ mamwe ngũgũcukĩra, matarĩ maingĩ, nĩ ũndũ mwĩ na andũ amwe kuo magwatĩte ũrutani wa Balaamu, ũrĩa warutire Balaki gũikia mũhĩnga mbere ya ciana cia Isiraeli, atĩ marĩage indo ihakĩirũo mĩhianano, o na mahũrage maraya. 15Noguo o nawe wĩ na andũ amwe magwatĩte ũrutani wa arĩa metagwo Anikolai, o ũndũ ũmwe. 16Tondũ ũcio no kĩĩrire; waaga ũguo, nĩngũũka kũrĩ we o narua, ndĩmarutĩre mbaara na rũhiũ rũrũ rũĩ kanua gakwa. 17#Thama 16.14,15; 16.33,34; Joh 6.48-50; Isa 62.2; 65.15.Ũrĩa ũrĩ gũtũ, nĩakĩigue ũrĩa Roho arera makanitha. Ũrĩa wa gũtorania-rĩ, we nĩngamũhe rũĩga rũa mana iria hithe, o na ndĩmũhe kahiga kerũ, nako kahiga kau igũrũ haandĩkĩtwo rĩĩtwa rĩa mũtuano, gũtarĩ ũrĩũĩ tiga o ũcio waheo.
18Nake mũraika wa kanitha ũrĩa ũrĩ Thuatira mwandĩkĩre atĩrĩ:
Ũguo nĩguo oiga Mũrũ wa Ngai, ũrĩa wĩ maitho matariĩ ta rũrĩrĩmbĩ rũa mwaki, na nyarĩrĩ ciake ihuana gĩcango kĩrĩa gĩthũe mũno, atĩrĩ, 19Nĩnjũĩ ciĩko ciaku, o na wendani waku, o na wĩtĩkio waku, o na ũtungatĩri waku, o naguo ũkirĩrĩria waku, na ngamenya atĩ ciĩko ciaku cia thutha nĩikĩrĩte iria cia mbere. 20#1 Ath 16.31; 2 Ath 9.22,30.Ũndũ ngũgũcukĩra no atĩrĩ, atĩ nĩũtũire ũrekereirie mũndũ mũka ũcio, Jezebeli, wĩtuaga mũrathi wa maũndũ; nake akaruta ndungata ciakwa ũhoro wake, agagĩcihĩtithia ihũrage maraya na irĩage indo ihakĩirũo mĩhianano. 21Nĩndamũheire ihinda rĩa kwĩrira, na nĩaregete kwĩrira atigane na ũmaraya wake. 22Atĩrĩ, ngũkĩmũrekania ũrĩrĩ igũrũ, na arĩa matharanagia nake ndĩmonie mĩnyamaro mĩnene, maarega kwĩrira matigane na ciĩko ciake. 23#Thab 7.9; Jer 17.10; Thab 62.12.Na nĩ kũũraga ngoraga ciana ciake na gĩkuũ; namo makanitha mothe makamenya nĩ niĩ mũtuĩria higo-inĩ o na ngoro-inĩ; na inyuĩ nĩngamũhe, o mũndũ o mũndũ, kũringana na ciĩko ciake. 24Na inyuĩ-rĩ, inyuĩ arĩa angĩ mũtigaire kũu Thuatira, inyuothe mũtagwatĩte ũrutani ũcio, na mũtoĩ maũndũ marĩa marikĩru ma Shaitani, ta ũguo andũ acio moigaga, inyuĩ ndamwĩra atĩrĩ, ndirĩ na mũrigo ũngĩ ngũkĩmũigĩrĩra. 25No rĩrĩ, maũndũ marĩa mwĩ namo, magwatagĩriei kinya o rĩrĩa ngoka. 26#Thab 2.8,9.Nake ũrĩa wa gũtorania, ũrĩa-ni wa gũtũũra amenyereire maũndũ makwa o nginya ithirĩro-rĩ, ũcio nĩngamũhe wathani aathage ndũrĩrĩ; 27nake nĩagaciriyĩraga na rũthanju rũa kĩgera, acimemende o ta ũrĩa nyũngũ cia mũũmbi imemendagwo; o ta ũrĩa niĩ na niĩ ’heetwo wathani nĩ Awa; 28O na nĩngamũhe njata ĩrĩa ya rũcinĩ. 29Ũrĩa ũrĩ gũtũ, nĩakĩigue ũrĩa Roho arera makanitha.
Currently Selected:
KŨGUŨRĨRIO 2: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
