MATHAYO 20

1TONDŨ rĩrĩ, ũthamaki wa Igũrũ ũhaana ta mũndũ mwene mũciĩ, ũrĩa woimagarire rũcinĩ tene akaandĩke andũ a wĩra makarĩme mũgũnda wake wa mĩthabibu. 2Na rĩrĩa aarĩkanĩire na andũ acio a wĩra magwate ciringi#20.2 Ciringi: rora karatathi ka 1,418. o mũthenya, akĩmarekia mũgũnda wake wa mĩthabibu. 3Agĩcoka akiumagara ta thaa ithatũ, akĩona andũ angĩ marũngiĩ kĩng’ang’a-inĩ matarĩ na wĩra; 4o nao akĩmera, O na inyuĩ tonyai mũgũnda wa mĩthabibu, na nĩndĩrĩmũhe kĩrĩa kĩagĩrĩire. Nao magĩthiĩ kuo. 5Agĩcoka akiumagara rĩngĩ ta thaa thita, na ta thaa kenda, agĩĩka o taguo. 6Agĩcoka akiumagara ta thaa ikũmi na ĩmwe, akĩona andũ angĩ marũngiĩ, akĩmoria, Nĩ kĩ gĩtũmĩte mũtinde mũrũngiĩ haha mũthenya wothe mũtarĩ na wĩra mũkũruta? 7Nao makĩmũcokeria, Nĩ ũndũ gũtirĩ mũndũ ũtwandĩkire. Agĩkĩmera, O na inyuĩ tonyai mũgũnda wa mĩthabibu. 8#Alaw 19.13; Gũcok 24.15.Na gwakinya hwaĩ-inĩ, mwene mũgũnda akĩĩra mũnene wa andũ ake a wĩra atĩrĩ, Ĩta andũ a wĩra ũmahe mũcara wao, na wambĩrĩrie na arĩa a thutha kinya arĩa a mbere. 9Nao arĩa maandĩkirũo thaa ikũmi na ĩmwe moka kũrĩ we, makĩheo o mũndũ ciringi. 10Nao arĩa a mbere moka, makĩĩgereria atĩ o nĩmekũmakĩria. No rĩrĩ, acio o nao makĩheo o mũndũ o ciringi. 11Na maarĩkia kũheo, makĩng’ong’orera mwene mũciĩ, 12makĩmwĩra atĩrĩ, Acio a thutha marutire wĩra o thaa ĩmwe, na wamaiganania na ithuĩ tũtindire twĩ na mĩnoga na tũgĩcinwo nĩ ũrugarĩ wa riũa. 13Nake agĩcokia ũhoro akĩĩra ũmwe wao, Mũrata wakwa, ndinagwĩka ũũru: githĩ tũtirĩkanĩire atĩ ũgwate ciringi? 14Oya o kĩrĩa gĩaku, wĩthiĩre; nĩ kwenda ndenda kũhe ũcio wa thutha o tawe. 15Githĩ ndiagĩrĩirũo nĩ gwĩka o ũrĩa ngwenda na indo ciakwa mwene? Kana hihi riitho rĩaku rĩĩ na rũitho, nĩ ũndũ niĩ ndĩ mwega? 16#Mat 19.30; Mar 10.31; Luk 13.30.Ũguo no taguo andũ arĩa marĩ a thutha magatuĩka a mbere, nao arĩa marĩ a mbere matuĩke a thutha.

17Na rĩrĩa Jesu aambataga Jerusalemu, agĩtwara arutwo ake ikũmi na erĩ handũ hataarĩ andũ angĩ; na marĩ njĩra akĩmera atĩrĩ, 18Twaambata Jerusalemu; nake Mũrũ wa Mũndũ nĩakaneanwo kũrĩ athĩnjĩri-Ngai arĩa anene, na aandĩki-marũa; nao nĩmakamũtuĩra ituĩro rĩa gũkua, 19na mamũneane kũrĩ andũ a Ndũrĩrĩ mamũnyũrũrie, na mamũhũre na kĩboko kĩĩ njaaga, na mamwambe mũtĩ igũrũ: nake mũthenya wa gatatũ nĩakariũkio.

20Thutha ũcio nyina wa ariũ a Zebedi agĩũka kũrĩ we me na ariũ ake, akĩmũturĩria ndu akĩmũthaitha ameke ũndũ mũna. 21Nake akĩmũũria Nĩ ũndũ ũrĩkũ ũkwenda? Akĩmwĩra atĩrĩ, Tua atĩ ariũ aya akwa erĩ magaikaraga ũmwe mwena waku wa ũrĩo, na ũrĩa ũngĩ mwena waku wa ũmotho ũthamaki-inĩ waku. 22Nowe Jesu agĩcokia akĩmera, Mũtiũĩ ũrĩa mũrahoya. Mwahota kũnyuĩra gĩkombe kĩrĩa ngirie kũnyuĩra? Nao kĩmwĩra, Twahota. 23Nake akĩmera, Kũnyuĩra nĩmũkanyuĩra gĩkombe gĩakwa: no rĩrĩ, gũikara mwena wakwa wa ũrĩo, o na mwena wakwa wa ũmotho, ti ũndũ ũkaheanwo nĩ niĩ, no nĩũkaheo o arĩa mathondekeirũo guo nĩ Awa.

24Na rĩrĩa arĩa angĩ ikũmi maaiguire ũndũ ũcio, makĩrakara nĩ ũndũ wa andũ acio erĩ a nyina ũmwe. 25#Luk 22.25,26.Nowe Jesu akĩmeta moke harĩ we, akĩmera atĩrĩ, Nĩmũũĩ atĩ athamaki a Ndũrĩrĩ nĩmetũũgagĩria igũrũ rĩa andũ ao, na anene acio ao nĩmamaathaga. 26#Mat 23.11; Mar 9.35; Luk 22.26.Tiguo gũgatuĩka thĩinĩ wanyu: no ũrĩa ũngĩenda gũtuĩka mũnene thĩinĩ wanyu nĩatuĩke o ndungata yanyu; 27na ũrĩa ũngĩenda gũtuĩka wa mbere thĩinĩ wanyu nĩatuĩke o ngombo yanyu: 28o ta ũrĩa Mũrũ wa Mũndũ atokire gũtungatĩrũo no atungatanĩre, na arute muoyo wake ũtuĩke wa gũkũũra andũ aingĩ.

29Na rĩrĩa moimaga Jeriko, kĩrĩndĩ kĩingĩ gĩkĩmuuma thutha. 30Na atĩrĩrĩ, atumumu erĩ magĩkorũo maikaire thĩ mũkĩra-inĩ wa njĩra, nao maaigua atĩ nĩ Jesu ũrahĩtũka, makĩanĩrĩra makiuga, Tũiguĩre tha Mwathani, wee Mũrũ wa Daudi. 31Nakĩo kĩrĩndĩ gĩkĩmakaania, gĩkĩmera makire: no-o magĩkĩria kwanĩrĩra, makiugaga, Tũiguĩre tha Mwathani, wee Mũrũ wa Daudi. 32Nake Jesu akĩrũgama, akĩmeta akĩmoria atĩrĩ, Mũkwenda ndĩmwĩke atĩa? 33Nao makĩmwĩra atĩrĩ, Mwathani, tũkwenda maitho maitũ mahingũrũo. 34Nake Jesu akĩringwo nĩ tha, agĩkĩmahutia maitho: na kahinda o kau magĩcoka kuona, makĩmũrũmĩrĩra.

Currently Selected:

MATHAYO 20: OGKBIBLE

Highlight

Copy