IBUKU RĨA JOSHUA 6

1(Na rĩrĩ, itũũra rĩu rĩa Jeriko rĩahingĩtwo o kũhingwo nĩ ũndũ wa ciana cia Isiraeli gũtirĩ mũndũ o na ũmwe woimaga na nja, o na gũtirĩ watonyaga kuo thĩinĩ.) 2Nake Jehova agĩkĩĩra Joshua atĩrĩ, Ta rora, itũũra rĩrĩ rĩa Jeriko nĩndĩrĩneanĩte moko-inĩ maku, hamwe na mũthamaki warĩo, o na njamba iria irĩ hinya ciarĩo. 3Na nĩ gũthiũrũrũka mũkũrĩthiũrũrũka, andũ anyu othe a ita marĩthiũrũrũke riita rĩmwe. Naguo ũndũ ũcio mũwĩke matukũ matandatũ. 4Na athĩnjĩri-Ngai mũgwanja magatongorie ithandũkũ rĩa Ngai, makuuĩte macoro mũgwanja mathondeketwo ma hĩa cia ndũrũme; naguo mũthenya wa mũgwanja mũgathiũrũrũka itũũra rĩu maita mũgwanja, nao athĩnjĩri-Ngai mahuhe macoro macio mao. 5Na nĩgũgatuĩka atĩrĩ, atĩ rĩrĩa makahuha hĩa icio cia ndũrũme na mũgambo mũraya, na inyuĩ mũigue mũgambo ũcio wa macoro, hĩndĩ ĩo andũ othe makĩanĩrĩre rĩanĩrĩra inene mũno, naruo rũthingo rũa itũũra rĩu nĩrũkagũa biũ rũaragane thĩ o hau rũrĩ, nao andũ othe, mũndũ o mũndũ atonye itũũra athiĩte na mbere o kũrĩa arorete. 6Nake Joshua wa Nuni agĩgĩĩta athĩnjĩri-Ngai, akĩmera atĩrĩ, Oyai ithandũkũ rĩa kĩrĩkanĩro, na mũreke athĩnjĩri-Ngai mũgwanja thĩinĩ wanyu makuue macoro mũgwanja ma hĩa cia ndũrũme, matongorie ithandũkũ rĩu rĩa Jehova. 7Nao magĩkĩĩra andũ atĩrĩ, Thiĩi mũthiũrũrũke itũũra, nao andũ arĩa meohete indo ciao cia ita mathiĩ matongoretie ithandũkũ rĩa Jehova. 8Gũgĩgĩtuĩka o ro ũguo, atĩ Joshua aarĩkia kũhe andũ ũhoro ũcio, athĩnjĩri-Ngai acio mũgwanja magĩthiĩ makuuĩte macoro mũgwanja ma hĩa cia ndũrũme mbere ya Jehova, nao makĩhuha macoro macio, narĩo ithandũkũ rĩa kĩrĩkanĩro kĩa Jehova rĩkĩmarũmĩrĩra. 9Nao andũ arĩa meohete indo ciao cia ita magĩtongoria athĩnjĩri-Ngai acio maahuhaga macoro macio, naguo mũrũrũngano wa arĩa maarĩ thutha ũkĩrũmĩrĩra ithandũkũ rĩu rĩa Jehova, nao athĩnjĩri-Ngai magĩthiĩ makĩhuhaga macoro macio. 10Nake Joshua agĩathana, akĩĩra andũ atĩrĩ, Menyai mwanĩrĩre, kana mũreke mĩgambo yanyu ĩiguwo, o na kana kiugo o na kĩmwe kiume tũnua twanyu, nginya o hĩndĩ ĩrĩa ngamwĩra mwanĩrĩre; hĩndĩ ĩo nĩguo mũgakĩanĩrĩra. 11Agĩgĩthiũrũrũkithia ithandũkũ rĩa Jehova itũũra rĩu ithiũrũrũka o rĩmwe; magĩgĩcoka kĩraaro-inĩ kĩao makĩraara ho.

12Nake Joshua akĩroka gũũkĩra rũcinĩ tene, nao athĩnjĩri-Ngai makĩoya ithandũkũ rĩu rĩa Jehova, 13ningĩ athĩnjĩri-Ngai mũgwanja o acio maakuuĩte macoro mũgwanja ma hĩa cia ndũrũme mbere ya ithandũkũ rĩu rĩa Jehova, magĩthiĩ o ro ũguo na mbere mategũtithia, makĩhuhaga macoro mao; nao andũ acio meohete indo ciao cia ita makĩmatongoria; naguo mũrũrũngano wa acio maarĩ thutha ũkĩrũmĩrĩra ithandũkũ rĩu rĩa Jehova, nao athĩnjĩri-Ngai magĩthiĩ makĩhuhaga macoro. 14Naguo mũthenya wa ĩĩrĩ, magĩthiũrũrũka itũũra rĩu ithiũrũrũka rĩmwe, magĩcoka kĩraaro-inĩ; magĩgĩĩka o ta ũguo matukũ matandatũ. 15Na gũgĩkinya atĩrĩ, atĩ mũthenya wa mũgwanja, makĩroka gũũkĩra rũcinĩ tene mũno, ruoro rũgĩtema, magĩthiũrũrũka itũũra rĩu mathiũrũrũka mũgwanja, o ta ũrĩa mekaga hĩndĩ ĩrĩa ĩngĩ, tiga atĩ no mũthenya ũcio wiki maarĩthiũrũrũkire mathiũrũrũka mũgwanja. 16Na gũgĩkinya atĩrĩ, atĩ ithiũrũrũka rĩa mũgwanja, rĩrĩa athĩnjĩri-Ngai maahuhire macoro macio-rĩ, Joshua agĩkĩĩra andũ atĩrĩ, Rĩu anĩrĩrai mũno; nĩ ũndũ Jehova nĩamũheete itũũra rĩrĩ. 17Narĩo itũũra rĩu nĩrĩkwamũrĩrũo Jehova rĩa kũninwo, rĩo rĩene, hamwe na kĩrĩa gĩothe kĩrĩ thĩinĩ warĩo; Rahabu wiki, mũka ũcio wa maraya, nowe ũgũtũũrio muoyo, we mwene, o na andũ arĩa othe me hamwe nake nyũmba, nĩ ũndũ wa ũrĩa aahithire andũ arĩa twareketie kuo. 18No rĩrĩ, wĩmenyererei mũtikahutie indo icio ciamũrĩtwo cia kũninwo, nĩ getha hihi mwarĩkia gũciamũra, mũtigacoke kuoya kĩndũ o na kĩ thĩinĩ wa indo icio ciamũrĩtwo; nĩ ũndũ-rĩ, mũngĩĩka ũguo nĩmũgũtũma andũ othe a kĩraaro gĩa Isiraeli magwatwo nĩ kĩrumi, o na mĩnyarirĩko. 19No rĩrĩ, betha yothe, o na thahabu, o na indo ciothe iria ithondeketwo na icango o na igera, nĩciamũrĩirũo Jehova, nacio igatwarũo mũthithũ-inĩ wa Jehova. 20#Ahib 11.30.Tondũ ũcio andũ magĩkĩanĩrĩra mũno, nao athĩnjĩri-Ngai makĩhuha macoro mao; nao andũ acio maaigua mũgambo wa coro, magĩkĩanĩrĩra rĩanĩrĩra inene, naruo rũthingo rũgĩkĩgũa biũ, rũkĩaragana thĩ o hau rũarĩ, o nginya andũ acio othe, mũndũ o mũndũ, agĩtonya itũũra rĩu, athiĩte o ro ũguo arorete na mbere ya hau aarĩ, nao magĩtunyana itũũra rĩu. 21Nao magĩkĩnina o kũnina biũ kĩrĩa gĩothe kĩarĩ itũũra rĩu na hiũ ciao cia njora, mũndũ mũrũme, o na mũndũ-wa-nja, na mũndũ ũrĩa mũnyinyi, o na ũrĩa mũkũrũ, o na ng’ombe, na mbũri, na ndigiri. 22Nake Joshua agĩkĩĩra andũ acio erĩ maathiĩte gũthigana bũrũri ũcio atĩrĩ, Thiĩi mũtonye nyũmba ya mũka ũcio mũmaraya, mũmũrute oime na nja, o na indo ciothe iria arĩ nacio, o ta ũrĩa mwehĩtire mũkĩmwĩra atĩ nĩmũkamwĩka. 23Nao aanake acio maarĩ athigani magĩgĩtonya kuo, makĩruta Rahabu, na ithe, na nyina, o na andũ a nyũmba yao, o na indo ciothe iria aarĩ nacio; na ningĩ andũ ao othe, o nao, makĩmaruta makĩmoimia na nja, magĩkĩmaiga na kũu nja handũ haraihanĩrĩirie hanini na kĩraaro gĩa Isiraeli. 24Nao magĩgĩcina itũũra rĩu na mwaki, o na indo ciothe iria ciarĩ kuo thĩinĩ; no betha, na thahabu, o na indo iria ithondeketwo na icango na igera, indo icio ciiki nocio mekĩrire mũthithũ-inĩ wa nyũmba ya Jehova. 25#Ahib 11.31.No rĩrĩ, Rahabu, mũmaraya ũcio, Joshua nĩaamũhonokirie, me hamwe na andũ othe a nyũmba ya ithe, o na indo ciothe iria aarĩ nacio; nake agĩgĩtũũra thĩinĩ wa Aisiraeli o na ũmũthĩ, nĩ gũkorũo nĩaahithire andũ arĩa Joshua aareketie, nĩguo magathigane Jeriko. 26#1 Ath 16.34.Na rĩrĩ, ihinda o ro rĩu Joshua akĩĩhĩtithia andũ acio akiuga atĩrĩ, Mũndũ ũrĩa ũkaarahũka acokererie itũũra rĩa Jeriko, arĩake rĩngĩ-rĩ, arogwatwo nĩ kĩrumi kĩa Jehova; aroya kũũrũo nĩ mwana wake wa irigithathi agĩaka gĩtina kĩarĩo, o na ningĩ aroorũo nĩ mwana wake wa kĩhinga-nda agĩĩkĩra mĩrango ihingo-inĩ ciarĩo. 27Jehova agĩgĩikara hamwe na Joshua, nayo ngumo yake ĩkĩiyũra bũrũri ũcio wothe.

Currently Selected:

IBUKU RĨA JOSHUA 6: OGKBIBLE

Highlight

Copy

Compare