IBUKU RĨA JOSHUA 3

1Nake Joshua agĩkĩroka gũũkĩra rũcinĩ tene, nake we mwene, hamwe na ciana cia Isiraeli ciothe, makiuma hau Shitimu, magĩkinya Jorodani; na matanaringa mũrĩmo-rĩ, makĩraara o hau ngurumo. 2Na gũgĩkinya atĩrĩ, atĩ matukũ matatũ maathira, anene arĩa maaroraga andũ magĩthiĩ kũndũ guothe kĩraaro-inĩ, 3magĩgĩatha andũ makĩmera atĩrĩ, Hĩndĩ ĩrĩa mũrĩona ithandũkũ rĩa kĩrĩkanĩro kĩa Jehova Ngai wanyu, o na Alawii arĩa athĩnjĩri-Ngai marĩkuuĩte, nĩmũkaarahũka muume harĩa mũikarĩte, mũrĩrũmĩrĩre. 4No rĩrĩ, gatagatĩ-inĩ kanyu narĩo nĩhagĩe ithenya, ta rĩa mĩkono ngiri igĩrĩ rĩgĩthimwo; mũkĩrĩrũmĩrĩre, nĩ getha mũmenyage njĩra ĩrĩa mwagĩrĩirũo nĩ kũgera, nĩ gũkorũo mũtirĩ mwagera njĩra ĩo rĩngĩ. 5Nake Joshua agĩkĩĩra andũ atĩrĩ, Wĩamũrei mwĩtherie, nĩ gũkorũo rũciũ Jehova nĩageka maũndũ manene ma kũgegania. 6Nake Joshua akĩarĩria athĩnjĩri-Ngai, akĩmera atĩrĩ, Oyai ithandũkũ rĩa kĩrĩkanĩro, mũthiĩ mbere ya andũ aya mũringe mũrĩmo. Nao magĩkĩoya ithandũkũ rĩu rĩa kĩrĩkanĩro, magĩthiĩ mbere ya andũ acio. 7Nake Jehova akĩĩra Joshua atĩrĩ, Mũthenya ũyũ wa ũmũthĩ nĩguo ngũitĩka gũkũnenehia, Aisiraeli othe makĩonaga, nĩ getha mamenye atĩ o ta ũrĩa ndarĩ hamwe na Musa, noguo ndĩrĩgĩaga hamwe nawe. 8Nawe ũgĩathe athĩnjĩri-Ngai arĩa megũkuua ithandũkũ rĩu rĩa kĩrĩkanĩro, ũmere atĩrĩ, Mwakinya hũgũrũrũ-inĩ cia rũũĩ rũa Jorodani, mũrũgame mwĩhande o ro ũguo hau Jorodani thĩinĩ.

9Nake Joshua agĩkĩĩra ciana cia Isiraeli atĩrĩ, Ũkai na gũkũ mũigue ũhoro wa Jehova Ngai wanyu. 10Ningĩ Joshua agĩkiuga atĩrĩ, Ũhoro ũyũ nĩguo ũgũtũma mũmenye atĩ Ngai ũrĩa ũrĩ muoyo arĩ hamwe na inyuĩ, na atĩ ndangĩaga kũmũingatĩra Akanaani o na atĩa mehere mbere yanyu, o na Ahiti, na Ahivi, na Aperizi, na Agirigashi, na Aamori, na Ajebusi. 11Atĩrĩrĩ, ithandũkũ rĩa kĩrĩkanĩro rĩa Mwathani wa thĩ yothe nĩrĩraringa Jorodani mbere yanyu. 12Tondũ ũcio rĩu oyai andũ ikũmi na erĩ mathurĩtwo mĩhĩrĩga-inĩ ya Isiraeli, o mũhĩrĩga mũndũ ũmwe. 13Na nĩgũgũkinya atĩrĩ, atĩ hĩndĩ ĩrĩa makinya ma magũrũ ma athĩnjĩri-Ngai acio makuuĩte ithandũkũ rĩu rĩa Jehova, o we ũrĩa Mwathani wa thĩ yothe, marĩtoboka marũgame maĩ-irĩ ma Jorodani thĩinĩ, hĩndĩ ĩo maĩ ma Jorodani, o marĩa megũtherera moimĩte na rũgũrũ, nĩmarĩtinĩka, mehande meyũmbe hĩba. 14Na gũgĩkinya atĩrĩ, atĩ hĩndĩ ĩrĩa andũ moimagarire moimĩte hema-inĩ ciao nĩ getha maringe Jorodani, matongoretio nĩ athĩnjĩri-Ngai arĩa maakuuĩte ithandũkũ rĩa kĩrĩkanĩro; 15o hĩndĩ o ĩo-rĩ, rĩrĩa acio maakuuĩte ithandũkũ rĩu maakinyire Jorodani, namo magũrũ ma athĩnjĩri-Ngai acio maarĩkuuĩte magĩtoboka hũgũrũrũ-inĩ cia rũũĩ o harĩa maĩ maarĩ, (nĩ gũkorũo rũũĩ rũu rũa Jorodani nĩrũiyũraga mũno rũgakĩra hũgũrũrũ-inĩ ciaruo ciothe o hĩndĩ ya magetha-rĩ,) 16hĩndĩ o ro ĩo maĩ marĩa moimaga na rũgũrũ makĩrũgama, namo magĩthiĩ na igũrũ makĩĩũmba hĩba, marĩ o kũndũ kũraya gũkuhĩ na Adamu, itũũra rĩrĩa rĩĩ gũkuhĩ na Zarethani, namo marĩa maathereraga marorete iria-inĩ rĩa Araba, na nĩrĩo Iria rĩa Cumbĩ, makĩhũa mothe; nao andũ magĩkĩringa mang’etheire o kũu Jeriko. 17Nao athĩnjĩri-Ngai arĩa maakuuaga ithandũkũ rĩa kĩrĩkanĩro kĩa Jehova makĩrũgama mehandĩte ki kũndũ kũũmũ gatagatĩ ka Jorodani; nao Aisiraeli othe makĩringĩra thĩ nyũmũ, o nginya hĩndĩ ĩrĩa andũ a rũrĩrĩ rũu ruothe maaringire Jorodani.

Currently Selected:

IBUKU RĨA JOSHUA 3: OGKBIBLE

Highlight

Copy

Compare