HOSEA 5

1Iguani ũhoro ũyũ, inyuĩ athĩnjĩri-Ngai; thikĩrĩriai, inyuĩ a nyũmba ya Isiraeli; na mũtege matũ, inyuĩ a nyũmba ya mũthamaki, amu cira ũyũ nĩ wanyu; tondũ-rĩ, mũkoretwo mũrĩ mũtego kũu Mizipa, na mũrĩ wabu ya gũtegana yarĩtwo o kũu Taboru. 2Nao arĩa aregi-watho-rĩ, nĩ gũkĩrĩrĩria makĩrĩrĩirie gũtonya ũũragani-inĩ, no niĩ nĩ niĩ wa kũmakaania othe. 3Nĩnjũĩ Efiraimu, ningĩ ndikĩhithĩtwo Isiraeli; amu wee Efiraimu-rĩ, rĩu nĩũhũrĩte maraya, nake Isiraeli nĩ gũthũka athũkĩte. 4Ciĩko ciao-rĩ, itingĩreka magarũrũkĩre Ngai wao; tondũ thuti cia kwĩrirĩria ũmaraya ii thĩinĩ wao, na matiũĩ Jehova. 5O na mwĩgerero wa ngoro wa Isiraeli nĩuumbũraga ũhoro wake o ũthiũ-inĩ wake; nĩkĩo Isiraeli na Efiraimu makahĩngwo wĩhia-inĩ wao, o na Juda nake agakĩhĩngwo hamwe nao. 6Nao nĩmagathiĩ na ndũru ciao cia mbũri, o na ndũru ciao cia ng’ombe, magacarie Jehova; no matikamuona; nĩeeheretie harĩ o. 7Nĩ kũgarũka magarũkĩte Jehova na wara, tondũ wa gũciara ciana itariĩ ta kĩruka gĩtoyaine na Ngai; nako karũgamo-inĩ ka mweri nĩrĩo makahukio o ene hamwe na mĩgũnda yao.

8Ta huhani thongori kũu Gibea, na mũhuhe karumbeta kũu Rama, mũcoke muuge mbu kũu Bethi-aveni mũkiugaga ũũ: Wĩ muume thutha, Benjamini! 9Efiraimu agakirio ihooru mũthenya o ũrĩa wa gũkaananio. Atĩrĩrĩi, nĩ kuonania nyonanĩtie gatagatĩ-inĩ ka mĩhĩrĩga ya Isiraeli ũndũ ũrĩa ũrĩoneka o ma. 10Anene a Juda-rĩ, matariĩ ta arĩa mangĩkũũra itoka cia mĩhaka; nĩkĩo ngamaitĩrĩria marakara makwa o ta mũiyũro wa maĩ. 11Efiraimu nake nĩ mũhinyĩrĩrie, naguo ũhoro wake ũkahotomio cira-inĩ, tondũ nĩonire arĩ wega arũmĩrĩre o maũndũ ma tũhũ. 12Nĩkĩo niĩ ndariĩ ta memenyi harĩ Efiraimu, o na ngatuĩka ta woru harĩ nyũmba ya Juda. 13Rĩrĩa Efiraimu eiguire ũrĩa aarũarĩte, nake Juda akĩona ũrĩa aagurarĩte-rĩ, hĩndĩ ĩo Efiraimu agĩthiĩ Ashuri, na akĩrekania kũrĩ mũthamaki ũrĩa wetagwo Jarebu; nowe-rĩ, ndarĩ hingo angĩkĩhota kũmũhonia ndũari yanyu; o na kana amũhonie nguraro cianyu. 14Amu-rĩ, niĩ nĩngatuĩka ta mũrũthi harĩ Efiraimu, o na ngakorũo ta ngatia nyanake harĩ nyũmba ya Juda. Niĩ, o niĩ, nĩngatamburanga, njoke ndĩĩthiĩre; o na ndahane, na gũtikagĩa mũndũ o na ũrĩkũ ũkahota kũhonokania. 15Nĩ gũthiĩ ngathiĩ njoke handũ hakwa mũira wa moimbũre mahĩtia mao, na marongorie ũthiũ wakwa; nao mona thĩna-rĩ, nĩmakanongoria na kĩyo.

Currently Selected:

HOSEA 5: OGKBIBLE

Highlight

Copy

Compare