HOSEA 10

1Isiraeli ahaana ta mũthabibu mũruru mũno ũrĩa ũciaraga maciaro maguo; na ta ũrĩa maciaro make maingĩhĩte-rĩ, no taguo aingĩhĩtie marutĩro make ma igongona; o na kũringana na ũrĩa bũrũri wake wagagĩrĩra-rĩ, noguo magakĩrĩrĩria kũrũgamia itugĩ thakaru cia kũhoyũo. 2Nacio ngoro ciao itikindagĩria. Rĩu-rĩ, hĩndĩ nĩ nginyu megũtuwo ehia; nake nĩ kwananga ekwananga igongona icio ciao, o na agathũkia itugĩ ciao cia kũhoyũo. 3Rĩu no kinya moige atĩrĩ, Tũtirĩ na mũthamaki ithuĩ, amu tũtiĩtigagĩra Jehova; nake mũthamaki-rĩ, nĩ atĩa angĩhota gũtwĩkĩra? 4Makĩaria-rĩ, maaragia ndeto itarĩ kĩene; ningĩ makĩrĩkanĩra-rĩ, makehĩta na maheni; nĩkĩo cira ũkunũkaga ta mahuti marũrũ marĩa mameraga mĩkũmũkũmũ-inĩ ya mũgũnda. 5Andũ arĩa matũũraga Samaria nĩmagetanga mũno nĩ ũndũ wa njaũ ya Bethi-aveni; amu-rĩ, andũ a kũu nĩmakamĩrĩrĩra, hamwe na athĩnjĩri-ngai akuo arĩa maamĩkenagĩra tondũ wa riri wayo, nĩ ũndũ-rĩ, riri ũcio nĩũmĩtigĩte. 6Nayo nĩ gũtwarũo ĩgatwarũo kũu Ashuri ĩtuĩke kĩheo kĩa Jarebu, ũcio mũthamaki; nake Efiraimu nĩagaconorũo, o na Isiraeli no aconokere wĩtaari wake mwene. 7Ha ũhoro wa Samaria-rĩ, mũthamaki wakuo nĩaninĩtwo o ta mũhũyũ ũrĩa ũtwaragwo nĩ rũũĩ. 8#Luk 23.30; Kũg 6.16.Namo matĩri ma kũndũ gũtũũgĩru kwa Aveni-rĩ, (nĩkuo kwene wĩhia wa Isiraeli) nĩ kwanangwo makaanangwo; na nĩ mĩigua na mahiũ makamera marutĩro-inĩ mao ma igongona. Nao nĩ gũkaĩra magakaĩra irĩma makiugaga atĩrĩ, Tũhumbĩreni; o na merage ithũngũri ũũ, Tũgũĩreni. 9#Atiir 19.1-30.Wũi! Wee Isiraeli, nĩũtũire wĩhagia kuuma matukũ macio ma Gibea. Kũrũgama nĩmaakĩrũgamire o kuo; no rĩrĩ, mbaara ĩrĩa yarũirũo Gibea na ciana cia waganu githĩ ndĩkũmakinyĩra? 10No niĩ, rĩrĩa ngenda-rĩ, nĩngamaherithia; nao andũ a ndũrĩrĩ nĩmakamonganĩra rĩrĩa makohanĩrĩrio na mahĩtia mao merĩ. 11Nake Efiraimu atariĩ ta mori ĩrĩa menyerie wĩra, ĩrĩa yendaga kũranga ngano ĩmĩkonyore; no-rĩ, niĩ nĩndũmĩte icoki rĩĩkĩrũo ngingo-inĩ yayo thaka. Nĩ gwĩka ngeka atĩrĩrĩ, nĩ gũtũma ngatũma Efiraimu akuue mũmũhaici; nake Juda nĩwe ũgacimba ta ũrĩa ng’ombe ĩcimbaga na mũraũ, o nake Jakubu nĩakehũrĩra hianyũ wake. 12#Jer 4.3.Rĩu-rĩ, wĩhandĩrei na ũthingu, na mwĩgethere kũringana na tha; tukuyani ngamba cia mĩgũnda yanyu; amu-rĩ, nĩ hingo mũngĩmatha Jehova, nginya agoka amuurĩrie ũthingu igũrũ rĩanyu. 13Inyuĩ-rĩ, gũcimba nĩmũcimbĩire ũmaramari, mũgakĩgetha waganu, na mũkarĩa maciaro ma maheni; tondũ nĩwehokaga njĩra yaku wee mwene, o na kũingĩhĩrũo nĩ makarau maku. 14Nĩ ũndũ ũcio-rĩ, nĩ ngũĩ ĩgakĩoneka gatagatĩ ka andũ aku, na matũũra maku marĩa mairige nĩmakaninwo, ta ũrĩa Shalimani aaninire Bethi-arabeli mũthenya ũrĩa wa mbaara, o nginya manyina ma twana magĩtungumanio makĩhehenjeka hamwe na twana twao. 15O ũguo noguo ũgekwo nĩ Beth-eli tondũ wa waganu waku mũnene; o na ta ũrĩa rũcinĩ rũtaagaga gũkĩa-rĩ, noguo mũthamaki wa Isiraeli akang’ũrio biũ.

Currently Selected:

HOSEA 10: OGKBIBLE

Highlight

Copy

Compare