AHIBIRANIA 7
7
1 #
Kĩam 14.17-20. TONDŨ rĩrĩ, ũcio Melikisedeki aarĩ mũthamaki wa Salemu na mũthĩnjĩri-Ngai, o Ngai-ũrĩa-wĩ-Igũrũ mũno. Nĩwe watũngire Iburahimu akĩinũka, aarĩkia kũũraga athamaki arĩa, na akĩmũrathima; 2ningĩ nĩwe wagaĩirũo nĩ Iburahimu gĩcunjĩ gĩa ikũmi kĩa indo ciothe. Nake wa mbere-rĩ, rĩĩtwa rĩake rĩataũrũo, nĩwe mũthamaki wa ũthingu, na wa kerĩ-rĩ, nĩwe mũthamaki wa Salemu, ũguo nĩ ta kuuga, mũthamaki wa thayũ. 3Ndarĩ na ithe kana nyina, kana kĩruka gĩake, na ndarĩ na kĩambĩrĩria kĩa matukũ make kana kĩrĩkĩro kĩa muoyo wake, no ahaananĩtio na Mũrũ wa Ngai. Ũcio-rĩ, aikaraga e mũthĩnjĩri-Ngai o nginya tene.
4Rĩu-rĩ, ta cũraniai ũrĩa mũndũ ũcio aarĩ mũnene, o ũcio wagaĩirũo nĩ mũtiga-irĩ Iburahimu gĩcunjĩ gĩa ikũmi kĩa indo iria njega aatahĩte. 5#Ndar 18.21.Na rĩrĩ, andũ a rũciaro rũa Lawii, arĩa matuagwo a wĩra wa gũthĩnjĩra Ngai, me na rĩathani maathĩtwo kũringana na watho, atĩ metagie andũ a kĩrĩndĩ gĩcunjĩ gĩa ikũmi, o arĩa marĩ a ithe ũmwe nao, o na gwatuĩka atĩ andũ acio nĩmoimĩte o mũthimo-inĩ wa Iburahunu. 6No rĩrĩ, mũndũ ũcio ũtoimĩte rũrĩra-inĩ rũu rũao, nĩaarutĩirũo nĩ Iburahimu gĩcunjĩ kĩu gĩa ikũmi, ningĩ akĩmũrathima o we ũcio werĩirũo ciĩranĩro. 7Ĩndĩ-rĩ, hatirĩ nganja atĩ nĩ ũrĩa mũnyinyi ũrathimagwo nĩ ũrĩa mũnene. 8Na ha ũhoro wa Alawii-rĩ, nĩ andũ a gũkua marutagĩrũo gĩcunjĩ kĩu gĩa ikũmi; no ha ũhoro wa mũndũ ũcio-rĩ, kĩrutagĩrũo ũrĩa woimbũrirũo ũhoro wake atĩ atũũraga o muoyo. 9Ũguo no ta kuuga atĩrĩ, atĩ o nake Lawii, ũcio ũrutagĩrũo gĩcunjĩ kĩu gĩa ikũmi-rĩ, we mwene nĩaarutire gĩcunjĩ kĩu na njĩra ya Iburahimu; 10tondũ aarĩ o mũthimo-inĩ wa ithe hĩndĩ ĩrĩa Melikisedeki aamũtũngire.
11Rĩu-rĩ, ũhoro ũrĩa mũkinyanĩru kũna ũngĩakĩonekire na njĩra ya athĩnjĩri-Ngai arĩa a mũhĩrĩga wa Lawii-rĩ, (nĩ ũndũ kĩrĩndĩ kĩareheirũo watho na njĩra ĩo), kaĩ gwakĩrĩ na bata ũngĩ ũrĩkũ atĩ gũũkĩre mũthĩnjĩri-Ngai ũngĩ wa irũngo rĩa Melikisedeki, na ndatuĩke wa irũngo rĩa Haruni? 12Nĩ ũndũ-rĩ, irũngo rĩrĩa rĩa athĩnjĩri Ngai rĩngĩgarũrũo, no mũhaka watho naguo ũgarũrũo. 13Tondũ mũndũ ũrĩa maũndũ macio meranĩtwo nĩ ũndũ wake oimanire na mũhĩrĩga ũngĩ, ũrĩa gũtarĩ mũndũ waguo ũrĩ aatungatĩra Ngai kĩgongona-inĩ. 14Amu ũhoro ũyũ nĩ muumĩru, atĩ Mwathani witũ oimire mũhĩrĩga-inĩ wa Juda; na ha ũhoro wa mũhĩrĩga ũcio-rĩ, Musa ndaigana kwaria ũhoro o na ũrĩkũ wa atĩ andũ aguo matuĩke athĩnjĩri-Ngai.
15Naguo ũhoro ũcio tũkwaragia watuĩka muumĩru o makĩria, kũngĩũkĩra mũthĩnjĩri-Ngai ũngĩ ũhaanaine na Melikisedeki, 16na ndatuwo mũthĩnjĩri-Ngai kũringana na watho wa kĩĩmwĩrĩ-rĩ, no kũringana na hinya ũrĩa uumanaga na muoyo ũrĩa ũtangĩninĩka. 17#Thab 110.4.Nĩ ũndũ nĩkuumbũrĩtwo ũhoro wake atĩrĩ:
Wee wĩ mũthĩnjĩri-Ngai o nginya tene,
O ta ũrĩa Melikisedeki aatariĩ.
18Na rĩrĩ, hau nĩ ha gũtharia watho ũrĩa wa mbere tondũ wa ũrĩa wagĩte hinya na ũkaaga bata, 19(tondũ watho ndũigana gũtũma ũndũ o na ũrĩkũ ũtuĩke mũkinyanĩru), na ithenya rĩaguo gũkarehwo kĩĩrĩgĩrĩro kĩega makĩria, arĩ kĩo tũkuhagĩrĩria Ngai na ũndũ wakĩo.
20Naguo ũndũ ũcio ndwekirũo hatarĩ mwĩhĩtwa. 21#Thab 110.4.Andũ acio a mbere nĩmaatuagwo athĩnjĩri-Ngai hatarĩ na mwĩhĩtwa, no mũndũ ũyũ aatuirũo mũthĩnjĩri-Ngai na mwĩhĩtwa wehĩtirũo nĩ ũrĩa wamwĩrire atĩrĩ:
Mwathani nĩehĩtĩte na ndangĩĩricũkwo,
Akoiga, Wee wĩ mũthĩnjĩri-Ngai o nginya tene.
22Ũguo noguo Jesu aatuĩkire mũrũgamĩrĩri wa kĩrĩkanĩro kĩega kũrĩ kĩrĩa gĩa tene. 23Ningĩ andũ acio a mbere nĩ aingĩ ao maatuagwo athĩnjĩri-Ngai, tondũ nĩmaagiragio gũtũũra wĩra-inĩ ũcio nĩ ũndũ wa gũkua: 24ĩndĩ we-rĩ, nĩ ũndũ wa ũrĩa atũũraga muoyo nginya tene, aikaraga arĩ mũthĩnjĩri-Ngai atarĩ hingo agatigĩra mũndũ ũngĩ wĩra ũcio. 25Ningĩ nĩ ũndũ wa ũguo, nĩahotaga kũhonokia kũna kũna andũ arĩa makuhagĩrĩria Ngai mathiĩrĩire harĩ we, kuona atĩ atũũraga muoyo hĩndĩ ciothe nĩguo amahoyagĩre.
26Tondũ rĩrĩ, nĩkwaagĩrĩĩre tũgĩe na mũthĩnjĩri-Ngai-mũnene ta ũcio, mũtheru na ũtarĩ na ũũru, kana ũũgũ, na mwamũre kũrĩ ehia, o na agatũũgĩrio o igũrũ rĩa matu-inĩ. 27#Alaw 9.7.Ndarĩ na bata wa kũrutaga magongona o mũthenya o mũthenya ta athĩnjĩri-Ngai-anene acio angĩ, rĩa mbere nĩ ũndũ wa mehia make mwene, na thutha ũcio nĩ ũndũ wa mehia ma kĩrĩndĩ, tondũ nĩekire ũguo ihinda o rĩmwe rĩa kũigana, rĩrĩa erutire we mwene. 28Tondũ watho-rĩ, nĩũtuaga andũ matarĩ hinya athĩnjĩri-Ngai-anene: ĩndĩ kiugo kĩrĩa kĩa mwĩhĩtwa, ũcio wokire thutha wa watho-rĩ, nĩgĩtuĩte Mũriũ mũthĩnjĩri-Ngai-mũnene, o we ũtuĩtwo mwagĩrĩru kũna o nginya tene na tene.
Currently Selected:
AHIBIRANIA 7: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
