AHIBIRANIA 3
3
1TONDŨ ũcio, ariũ a Ithe witũ atheru, o inyuĩ mũgwatanĩire ũhoro wa gwĩtwo ũrĩa uumĩte Igũrũ-rĩ, cũraniai ũhoro wa Jesu, o we wĩ Mũtũmwo na Mũthĩnjĩri-Ngai-Mũnene wa ũhoro ũrĩa tuumbũraga. 2#Ndar 12.7.Aarĩ wa kwĩhokeka nĩ ũrĩa wamũtuire ũguo, o ta ũrĩa Musa nake aarĩ wa kwĩhokeka maũndũ-inĩ mothe ma nyũmba ya Ngai. 3Amu Jesu atuĩtwo wa kũheo riri mũnene gũkĩra Musa, kũringana na ũrĩa mwaki wa nyũmba arĩ wa gũtĩwo gũkĩra nyũmba yo nyene. 4Nĩ ũndũ-rĩ, gũtirĩ nyũmba ĩtarĩ na ũrĩa wamĩakire; ĩndĩ mwaki wa indo ciothe no Ngai. 5Nake Musa ti-itherũ aarĩ wa kwĩhokeka maũndũ-inĩ mothe ma nyũmba ya Ngai arĩ o ndungata, nĩ getha atuĩke mũira wa kũmenyithanagia mohoro marĩa ma gũkaheanwo thutha; 6No Kristo, akĩrĩ Mũriũ, aarĩ wa kwĩhokeka atuĩtwo mũnene wa nyũmba ya Ngai. Nayo nyũmba ĩo yake nĩyo ithuĩ, tũngĩikara o nginya ithirĩro o tũrũmĩtie mũno ũhoro witũ wa kũũmĩrĩria, o na kĩĩrĩgĩrĩro kĩrĩa twĩrahaga nĩ ũndũ wakĩo.
7 #
Thab 95.7-11. Nĩ ũndũ ũcio, o ta ũrĩa Roho Mũtheru ekuuga-rĩ,
Ũmũthĩ, mwetĩkĩra kũigua mũgambo wake,
8Tigai kũũmia ngoro cianyu, ta hĩndĩ ĩrĩa mwanjũkĩrĩire,
O mũthenya ũrĩa ndagereirio werũ-inĩ,
9O kũrĩa maithe manyu maangereirie nĩ kũndoria,
Magĩkĩona mawĩko makwa mĩaka mĩrongo ĩna.
10Nĩ ũndũ ũcio ngĩira ngoro nĩ ũndũ wa rũciaro rũu,
Ngĩkiuga, Aya nĩ kĩruka gĩtũire kĩĩ na ngoro nyũngũtũki,
Na njĩra ciakwa nĩmaregete gũcimenya.
11O ta ũrĩa ndehĩtire nĩ ũrĩa ndarakaire, ngiuga atĩrĩ,
Matigatonya kĩhurũko-inĩ gĩakwa.
12Wĩmenyererei, ariũ a Ithe witũ, atĩ mũndũ o na ũrĩkũ wanyu ndakanagĩe na ngoro njũru ĩtetĩkagia, ĩrĩa ĩngĩtũma atigane na Ngai ũrĩa wĩ muoyo: 13nĩ kaba mũtaaranage o mũthenya o mũthenya, mũira wa ihinda rĩrĩa rĩĩtagwo “Ũmũthĩ” rĩgũtũũra, nĩ getha mũndũ o wothe wanyu ndakae kũũmio ngoro nĩ maheni ma wĩhia. 14Nĩ ũndũ-rĩ, ũhoro ũrĩa twaambĩte kwĩrĩgĩrĩra o mbere-rĩ, tũngĩtũũra tũũrũmĩtie o nginya ithirĩro-inĩ, nĩtũgakorũo tũtuĩkĩte a ngwatanĩro ĩmwe na Kristo: 15#Thab 95.7,8.o ihinda rĩrĩa rĩothe kuugagwo atĩ,
Ũmũthĩ-rĩ, mwetĩkĩra kũigua mũgambo wake,
Tigai kũũmia ngoro cianyu, ta hĩndĩ ĩrĩa mwanjũkĩrĩire.
16 #
Ndar 14.1-35. Tondũ rĩrĩ, nĩ andũ arĩkũ maaiguire na makĩmũũkĩrĩra? Githĩ ti arĩa othe moimire Misiri matongoretio nĩ Musa? 17Na rĩrĩ, nĩ arĩkũ maamũiririe ngoro mĩaka ĩo mĩrongo ĩna? Githĩ ti arĩa maahĩtirie magĩgĩkua, na ciimba ciao igĩtigwo werũ-inĩ? 18Ningĩ nĩ arĩkũ ehĩtĩire atĩ matigatonya kĩhurũko-inĩ gĩake, tiga o andũ acio maamũremire? 19Tũgakĩona atĩrĩ, atĩ matiahotire gũtonya kuo nĩ ũndũ wa ũrĩa mataigana gwĩtĩkia.
Currently Selected:
AHIBIRANIA 3: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
